الەم • 16 قاڭتار، 2022

وزبەكستان تابيعي گاز ەكسپورتىن توقتاتتى

132 رەت كورسەتىلدى

وزبەكستان تابيعي گاز ەكسپورتىن توقتاتتى. مۇنداي شەشىمدى كورشىلەس ەلدىڭ ەنەرگەتيكا مينيسترلىگى قابىلداعان. وزبەكستان ورتالىق ازيا مەملەكەتتەرىنە، سونىڭ ىشىندە قازاقستانعا دا تابيعي گاز جەتكىزەتىن، دەپ حابارلايدى Egemen.kz «حابار 24» ارناسىنا سىلتەمە جاساپ.

وزبەكستان گاز قورى بويىنشا ورتا ازيادا تۇركمەنستەن مەن قازاقستاننان كەيىنگى ءۇشىنشى ورىندا. ەلدەگى كولىكتەردىڭ باسىم بولىگى كوگىلدىر وتىندى تۇتىنادى. بۇعان دەيىن كورشى رەسپۋبليكالار ءبىر-ءبىرىن قاجەتتى ەنەرگيا رەسۋرستارىمەن قامتاماسىز ەتىپ كەلدى. الايدا بيىلدان باستاپ جاعداي وزگەرمەك.

«وزبەكستان ۇكىمەتى گاز ەكسپورتىن شەكتەۋ جونىندە شەشىم قابىلدادى. ونىڭ ورنىنا ىشكى نارىقتا كاسىپورىندار قۋاتىن ارتتىرۋ ءۇشىن قولدانىلادى. شيكى كۇيىندە ەمەس، سول ارقىلى دايىن ونىمدەر جاساپ، سىرت ەلدەرگە تاسىمالدايمىز»، دەدى وزبەكستاننىڭ ەنەرگەتيكا مينيسترلىگى باسقارماسىنىڭ باسشىسى جامال حۇسانجانوۆا.

كورشى ەلدە وسى سالادا بۇعان دەيىن قابىلدانعان شەشىمدەر دە كۇشىن جويۋى ىقتيمال. ماسەلەن، قولدانىستاعى كەلىسىم بويىنشا وزبەكستان الداعى بىرنەشە جىل بويى قىتايعا كوگىلدىر وتىن جەتكىزۋگە مىندەتتى. ەندى بۇل قۇجاتتىڭ كەلەشەگى كۇمان تۋدىرىپ تۇر.

«قازاقستانمەن عاسىرلار بويى قالىپتاسقان بايلانىس بار. ءبىز ءبىر-بىرىمىزگە ترانزيت سالاسىندا كومەكتەسەمىز. ماسەلەن، قازاقستاننىڭ سولتۇستىگىندە وندىرىلگەن گازدى وڭتۇستىك ايماقتارعا بىزدەگى ماگيسترالدى قۇبىرلار ارقىلى جەتكىزىپ بەرەمىز. ينفراقۇرىلىم كەڭەس ۇكىمەتى كەزىنەن بار. سونى ساقتاپ قالعانبىز»، دەدى جامال حۇسانجانوۆا.

2020 جىلى وزبەكستان پرەمەر-ءمينيسترى ابدۋللا اريپوۆ ەل ىشىندە قايتا وڭدەۋگە تولىعىمەن كوشۋ جانە قوسىلعان قۇنى جوعارى ءونىم شىعارۋدى جولعا قويۋ ءۇشىن 2025 جىلعا قاراي گاز ەكسپورتىن توقتاتۋ جوسپارلارى تۋرالى مالىمدەدى. 

سوڭعى جاڭالىقتار

ۇقساس جاڭالىقتار