الىپتار قاتارى تولىعۋدا

اقمولا وبلىسىندا 2014 جىلى 93 ميلليارد تەڭگەنىڭ 11 نىسانى يندۋستريالاندىرۋ كارتاسىنا ەنىپ وتىر. اۋقىمدى جۇمىستىڭ ويداعىداي ورىندالاتىنىنا نەگىز دە جوق ەمەس. وتكەن جىلى وڭىردە 9 نىسان قاتارعا قوسىلىپ, 433 تۇراقتى جۇمىس ورنى قۇرىلدى. ال, بيىل ونىڭ سانى ءتورت مىڭعا جەتكىزىلمەك. ونىڭ ۇستىنە جاڭا جوبالاردىڭ باسىم بولىگى جو­عارى قوسىمشا قۇندى ەسەلەۋگە باعىتتالاتىنى نازار سالار­لىق ءۇردىس دەپ بىلەمىز. بۇلار­دىڭ قاتارىنا ستەپنوگور قالا­سىنداعى كۇكىرت قىشقىلى زاۋىتىن, تسەلينوگراد اۋدانىنداعى ترانسفورماتور جانە ەمۋلسيا ماتريتسالارى زاۋىتتارىن, شورتاندى اۋدانىنداعى پوليەتيلەن ونىمدەرى كاسىپورنىن قوسۋعا بولادى. ال, ەرەيمەنتاۋ اۋدانىندا قۋاتتىلىعى 45 مۆت جەل ەلەكتر ستانساسى پايدالانۋعا بەرىلەدى دەپ كۇتىلۋدە. يندۋستريالىق سەكتورعا قوسىمشا قۋاتتار ەنگىزۋ ەسەبىنەن ءوندىرىس كولەمى 100,2 پايىزعا ءوسىپ وتىر. مۇندا جۇك اۆتوكولىكتەرىن شىعارۋدى 1,5 ەسەگە ارتتىرعان «كاماز-ينجينيرينگ» اق, استىق كومبايندارىن دايىندىق ساپىنا قويۋدى 8 ەسە وسىرگەن «ۆەكتور» زاۋىتىنىڭ, ارنايى تەحنيكالار دايىنداۋدى 3 ەسەگە كوبەيتكەن «كايك» جشس مەن كەراميكالىق كىرپىش ءوندىرۋدى 27 پايىزدان اسىرعان «ENKI» جشس جانە ستەپنوگورداعى «ارىستان» پوليەتيلەن قۇبىرلارى زاۋى­تىنىڭ ۇلەسى سالماقتى. سونداي-اق, «سپ «SARECO», «استانا ويل» مۇناي ءۇيى», «KZ تاۋ-كولىك كومپانياسى», «Ak Su Steel» جشس سياقتى جاڭا كاسىپورىندار ەكپىندى ىسىمەن الىپتار ساپىنا قوسىلىپ ۇلگەردى. باقبەرگەن امالبەك, «ەگەمەن قازاقستان». اقمولا وبلىسى.