بۇل جادىگەردى 2015 جىلى «مۋزەيگە سىي تارتۋ» اكتسياسى اياسىندا اقىننىڭ قىزى ايكەن تاپسىرعان. پيدجاك ەكى تۇيمەلى, قارا ءتۇستى بىلعارىدان تىگىلگەن. ونى اقىن ماسكەۋدەگى ادەبيەت ينستيتۋتىندا وقىپ جۇرگەندە ساتىپ الىپتى. قۇندى ەكى جادىگەر دە جاقسى ساقتالعان. ارقالى اقىن «جوق, ۇمىتۋعا بولمايدى!», «جارىق پەن جىلۋ», «كۇي كىتابى», «مەزگىل اۋەندەرى», « ۇلىم, ساعان ايتام», «قىزعالداق جايلى باللادا», «مەن تۋعان كۇن», «جەتى بوياۋ», «مەنىڭ توپىراعىم», «ۇرپاعىم, ساعان ايتام» جانە تاعى باسقا جىر جيناقتارىمەن ۇلتتىق پوەزيامىزعا وزگەشە ورنەك, جاڭا لەپ اكەلدى. پروزا جانرىندا دا تاباندى ەڭبەك ەتىپ, «اق شاعىل», «كىشكەنتاي», «داڭق پەن داقپىرت» اتتى روماندارىن جازدى. سونداي-اق جۇمەكەن اعامىزدىڭ ەسىمىن مەملەكەتتىك ءانۇران اۆتورىنىڭ ءبىرى رەتىندە قۇرمەتپەن ايتامىز. ساڭلاق سۋرەتكەردىڭ «مەنىڭ قازاقستانىم» اتتى ولەڭدەر مەن داستاندار جيناعىنا 2010 جىلى مەملەكەتتىك سىيلىق بەرىلدى.
اقىننىڭ دوسى, بەلگىلى جازۋشى, مەملەكەتتىك سىيلىقتىڭ لاۋرەاتى ورازبەك سارسەنباي «جۇمەكەننىڭ جۇرەگى» دەگەن ەستەلىگىندە: «قازاق پوەزياسىنىڭ وقشاۋ تۇرعان ءۇش بايتەرەگى – قاسىم, مۇقاعالي, جۇمەكەن ءبىر-بىرىمەن تاعدىرلاس ءومىر كەشىپتى. جاس جاعىنان ۇشەۋى دە قىرىقتىڭ قىرقاسىنا شىققانىمەن, ەلۋدىڭ ەتەگىنەن ۇستاپ ۇلگەرمەگەندەر. ال شىعارماشىلىق ءومىربايان تۇرعىسىنان كەلسەك, بىزدىڭشە بۇل ۇشەۋى دە نەگىزىنەن ايتارىن ايتىپ, جازارىن جازىپ كەتكەندەر», دەپ سالماقتى ءسوز ايتقان ەكەن.
