ءبىلىم جانە عىلىم مينيسترلىگى پرەزيدەنتتىڭ تاپسىرماسى بويىنشا قولداۋ شارالارىنىڭ ءتيىستى پاكەتىمەن اتالعان وڭىرلەرگە ۇزدىك پەداگوگتەردى تارتۋ جونىندە ارنايى باعدارلاما ازىرلەپ جاتىر.
«پەداگوگتەردىڭ وسى سالالاردا جۇمىس ىستەۋىنە مۇددەلى بولۋى ءۇشىن ءبىز جالاقىنىڭ ارتتىرۋ كوەففيتسيەنتىن بەلگىلەۋ, تۇرعىن ءۇي بەرۋ نەمەسە تۇرعىن ءۇيدى جالعا الۋ قۇنىن وتەۋ, كوممۋنالدىق قىزمەتتەردى تولەۋ وتەماقىسى جانە ت.ب. وسى سياقتى الەۋمەتتىك قولداۋ شارالارىن ۇسىنامىز.
مۇنداي الەۋمەتتىك پاكەت ارنايى راسىمنەن ءوتىپ, بەلگىلى ءبىر ولشەمدەرگە سايكەس كەلەتىن جانە بەلگىلى ءبىر مەكتەپتەرگە جۇمىسقا اۋىساتىن مۇعالىمدەرگە بەرىلەدى. ناقتى ىسكە اسىراتىن كەيبىر تەتىكتەرىن ءالى دە تالقىلىيتىن بولامىز», دەپ جازدى ءبىلىم ءمينيسترى الەۋمەتتىك جەلىدە.
سونداي-اق تاعى ءبىر باعىت بويىنشا قازاقستاندا شەتەلدىك 5 جوو فيليالدارىن اشىلادى. بۇل شارا وتاندىق ۋنيۆەرسيتەتتەر اراسىندا باسەكەلەستىكتى ارتتىرۋعا مۇمكىندىك بەرۋى مۇمكىن. مينيستر وسى باعىتتاعى جۇمىسقا كىرىسىپ كەتكەندەرىن دە جەتكىزدى.
«2021 جىلدىڭ قىركۇيەگىندە دە مونتفورت لەستەر بريتان ۋنيۆەرسيتەتىنىڭ (De Montfort University Leicester) فيليالى اشىلدى.
سونىمەن قاتار, قوزىباەۆ اتىنداعى ۋنيۆەرسيتەتتى اريزونا ۋنيۆەرسيتەتىنە سەنىمگەرلىك باسقارۋعا بەرۋ ماسەلەسى پىسىقتالۋدا.
ەلىمىزدىڭ باتىس وڭىرلەرىندەگى جاستاردىڭ جوعارى بىلىمگە قول جەتكىزۋىن ارتتىرۋ ءۇشىن وندا ەكى جەتەكشى شەتەلدىك تەحنيكالىق ۋنيۆەرسيتەتتىڭ فيليالدارى اشىلاتىن بولادى.
سونداي-اق پرەزيدەنتتىڭ تاپسىرماسىنا سايكەس رەسەيدىڭ ۇزدىك تەحنيكالىق ۋنيۆەرسيتەتىنىڭ فيليالىن اشۋ بويىنشا جۇمىستار جۇرگىزىلۋدە», دەدى ول.
ونىڭ ايتۋىنشا, باسقا دا الەمدىك دەڭگەيدەگى ۋنيۆەرسيتەتتەردىڭ فيليالدارىن اشۋ بويىنشا جۇمىس جۇرگىزىلىپ جاتىر.
