قالالىق Cانيتارلىق-ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى جاننا پىراليەۆا ىندەتتىڭ بەتىن تەك بەلسەندى ۆاكتسينالاۋ شاراسى عانا قايتاراتىنىن ايتتى.
«جالپى, ەلدەگى جاعداي كۇردەلەنە ءتۇستى. ۆاكتسيناتسيا ۇلكەن اعىنمەن ءجۇرىپ جاتقان جوق. بىراق كەز كەلگەن جاعدايدا ۆاكتسينالاۋ جانە قايتا ۆاكتسينالاۋ قاجەت. سەبەبى بۇگىنگى تاڭدا جالعىز قورعانىس ۆاكتسيناتسيا جانە رەۆاكتسيناتسيا بولىپ قالا بەرەدى. نەعۇرلىم كوبىرەك ۆاكتسينا الساق, ىندەتتى تەزىرەك جەڭۋ مۇمكىندىگى سوعۇرلىم جوعارى بولادى», دەدى دەپارتامەنت وكىلى قالا تۇرعىندارىنا.
ونىڭ ايتۋىنا قاراعاندا, «وميكرون» دەلتا-شتامعا قاراعاندا 70 ەسە جىلدام تارايدى.
«ەڭ ءبىرىنشى تاماق اۋرۋدان باستالادى. دەنە قىزۋى كوتەرىلەدى. تاعى ءبىر ەرەكشەلىگى – ادام تەز ارادا شارشاپ, جاتىپ قالادى. ەگەر تاڭەرتەڭ ويانعاندا ءوزىڭىزدى ناشار سەزىنسەڭىز, ۇيدەن شىعۋدىڭ قاجەتى جوق. ەگەر ءسىز ناۋقاسپەن بايلانىستا بولعانىڭىزدى ۇقساڭىز, دارىگەرگە بارۋىڭىز كەرەك. ۆيرۋستى تاراتپاۋ ماڭىزدى. رەسپۋبليكانىڭ باس مەملەكەتتىك سانيتارلىق دارىگەرىنىڭ قاۋلىسى بويىنشا, بەس كۇننىڭ ىشىندە قالادا اۋرۋشاڭدىق وسسە, شەكتەۋلەر قابىلدانادى», دەدى ول.
