بۇگىنگى كۇننىڭ ءبىر تالابى – ءوندىرىس ورنىن اشىپ, تابىس تابۋمەن قاتار كاسىپكەرلەرىمىز وزدەرى وندىرگەن وتاندىق ءونىم ساپاسىن ارتتىرىپ, ەل مەرەيىن ۇستەم ەتۋ. «قازاقستان-2050» ستراتەگياسى اياسىندا الماتى وبلىسى, جامبىل اۋدانىنىڭ كاسىپكەرلەرى وسى ۇدەدەن شىعىپ, اتالعان اۋداننىڭ جاعرافيالىق ورنالاسۋ ىڭعايلىعىن ۇتىمدى پايدالانا بىلۋدە. ناقتىلاي تۇسسەك, ءدال ىرگەسىندەگى, ياعني ەلىمىزدەگى ەڭ ءىرى مەگوپوليس – الماتى قالاسىنداعى ساۋدا ورىندارىنا شىعارىپ ساتۋ ءۇشىن ەلەكتر جارىعىن بەرەتىن سان الۋان لامپالاردى ەكى تاراپقا دا ءتيىمدى باعامەن تۇتاستاي وتكىزۋ جولىن ينۆەستورلارىنا دالەلدەپ, ءىرى مولشەردە قاراجات تارتا ءبىلدى. ءسويتىپ, تۇركيانىڭ «Teksan Aydinlatma Dis Ticaret Ltd Sirketi» كومپانياسىنىڭ الەمگە تانىمال 5000 ءتۇرلى ەلەكتر جارىعىن بەرەتىن لامپالارىنىڭ 174 ءتۇرى جەتىسۋ جەرىندە ءوندىرىلىپ, رىنوكقا شىعارىلعان ەدى. ەندى جامبىل اۋدانىنىڭ اكىمى ماحاببات بيگەلديەۆتىڭ قامقورلىعىمەن ءوندىرىس ورنىنىڭ جەر تەلىمى كەڭەيتىلىپ, زاڭناما شەڭبەرىندە ارەكەت ەتكەن زاۋىت ەلەكتر جارىعىن بەرەتىن لامپالاردىڭ 1000 ءتۇرىن شىعارۋعا مۇمكىندىك الدى. جالپى, جەتىسۋلىق زاۋىت ءونىمى ساپالىلىعىمەن ءبىرگە ۇنەمشىلدىگىمەن ءھام زاماناۋيلىعىمەن, جارىقتىعىمەن ەرەكشەلەنەدى. تاعى ءبىر ايتا كەتەر اقپارات, الەمدىك دەڭگەيدە جوعارى جەتىستىككە جەتكەن كومپانيانىڭ فيليالى بولىپ ەل زاڭناماسىنا سايكەس الماتى وبلىسى, جامبىل اۋداندىق ادىلەت دەپارتامەنتىندە «تەكسان قازاقستان ينۆەست» جشس 2011 جىلدىڭ 20 قازانىندا زاڭدى تۇلعا رەتىندە مەملەكەتتىك تىركەۋ تۋرالى قۇجات العان. بۇل انىقتاما دا ءبىراز جايتتى اڭعارتسا كەرەك.
«ماحاببات بيگەلديەۆ جامبىل اۋدانىنا اكىم بولىپ تاعايىندالعان ءبىر جىلدان استام ۋاقىتتان بەرى تۇرعىندارمەن بىرلەسە بىرقاتار شارۋانىڭ باسىن قايتاردىق دەۋگە نەگىز بار. وسىعان دەيىن ءوندىرىس ورنىندا 135 ادام جۇمىس ىستەسە ەندى ءوندىرىس ورنىن كەڭەيتىپ سوعان وراي قوسىمشا تارتىلاتىن ينۆەستيتسيا كولەمىن ءوسىرىپ 200 ادامدى تۇراقتى جۇمىسپەن قامتاماسىز ەتەمىز. ەڭ تومەنگى ايلىق جالاقى 45000 تەڭگە بولادى. تاجىريبەلەرى تولىسىپ, ەڭبەك ساپاسىن ارتتىرعان جۇمىسشىعا ەلۋ-الپىس مىڭ تەڭگەگە دەيىن ايلىق جالاقى تولەنەتىنى ءوز الدىنا. زاۋىتقا كورشى اۋىلداردان قاتىناپ ەڭبەك ەتەتىن جۇمىسشىلارعا ارنايى اۆتوبۋس بولىنگەن. بارلىعى جۇمىس كيىمىمەن تولىق قامتىلىپ, تاۋلىگىنە ەكى رەت تەگىن تاماقتاندىرۋ دا زاۋىت ەسەبىنەن وتەلۋدە», دەدى «تەكسان قازاقستان ينۆەست» جشس باس ديرەكتورىنىڭ ورىنباسارى جوكەن اياتاەۆ.
«جالپى, ەلەكتر جارىعىن بەرەتىن لامپالاردى شىعاراتىن زاۋىتىمىزعا قاجەتتى تەمىر قاراعاندىدان ارنايى ولشەمدەر بويىنشا كەسىلىپ جەتكىزىلسە, قۇددى بۇرشاق ىسپەتتى جەلىم ونىمدەرى تايۆاننان اكەلىنەدى. ەكى جارىم جىلدان بەرى ءوندىرىس ورنىندا قاجەتتىلىكتىڭ بارلىعىن وتەپ تۇرعان قۇرال-جابدىقتار جاپونيا, گەرمانيا, تۇركيا مەملەكەتتەرىنەن الىنىپ, ورناتىلدى. بۇل قوندىرعىلاردى باسقارۋدى قازاقستاندىق جۇمىسكەرلەرگە جان-جاقتىلى ۇيرەتۋ ءۇشىن شەتەلدەن كەلىسىمشارت بويىنشا 4 مامان كەلگەن ەدى. بۇگىندە ولار 20 ادامدى جۇمىس بارىسىندا وقىتىپ تا, ۇيرەتىپ تە ءوز ورىندارىنا دايىنداۋدا. مىنە, سول 20 مامان كوكەيلەرىنە ءتۇيىپ-بىلگەندەرىن وزگە جۇمىسشىلارعا بىرتىندەپ ۇيرەتۋدە. شەتەلدەن اكەلىنگەن ساپالى قۇرالدارمەن بۇرشاق ىسپەتتى تۇيىرشىكتەلگەن تۇرىندە قاپقا سالىنىپ جەتكىزىلەتىن جەلىمدەردى بالقىتىپ, قاجەتتى قالىپقا ساي ولشەپ قۇيىپ, سان الۋان ءمولشەردەگى تەمىرلەرگە بەكىتىپ 174 ءتۇرلى ەلەكتر جارىعىن بەرەتىن شامدار شىعارۋدامىز.
شىعارىلعان ءونىمدى مەنەدجەرلەر تاپسىرىس بويىنشا كەلىسىلگەن ورىندارعا جەتكىزىپ بەرەدى. ايتا كەتەر تاعى ءبىر جايت, وسىعان دەيىن زاۋىتىمىزدا وندىرىلگەن 174 ءتۇرلى ەلەكتر جارىعى لامپالارىنىڭ ۇزىن سانى ەندى «قازاقستان-2050» ستراتەگياسىنا سايكەس, 1000 تۇرگە جەتكىزىلەتىن بولدى. حالىقارالىق تالاپقا ساي وقىپ, بىلىكتىلىكتەرىن كوتەرگەن مامانداردىڭ تەكسەرۋلەرىنەن وتكەن سوڭ, ءونىمنىڭ تيەسىلى جەرىنە زاۋىت بەلگىسى باسىلىپ, بەلگىلى ۋاقىتقا دەيىن جارامدىلىعىن تانىتاتىن كەپىلدىك بەرىلەدى. ەگەر مىڭنىڭ ءبىرى جازاتايىم جارامسىز بولىپ جاتسا ساراپتامالىق مەكەمە تەكسەرۋىنەن وتكەن سوڭ, زاۋىت كەمشىلىگىنەن كەتكەن ءونىم قولما-قول زاتتاي الماستىرىپ بەرىلەدى. شىنى كەرەك, قازىرگە ايتا قويارلىقتاي كەمشىلىك جىبەرىلگەن جوق. وعان زاۋىت ونىمدەرىنە سۇرانىستىڭ كۇننەن-كۇنگە ارتۋى دالەل بولادى», دەدى «تەكسان قازاقستان ينۆەست» جشس باس ينجەنەر-ەلەكتريگى نۇرمۇحان مادەليەۆ.
نەگىزى قاسىمبەك, ۇزىناعاش, مىڭباي, فابريچنىي, ۇشقوڭىر اۋىلدارى تۇرعىندارىنىڭ باسىم بولىگى اتالعان زاۋىتتا جۇمىس ىستەيدى. جامبىل اۋدانىنىڭ اكىمى ماحاببات بيگەلديەۆتىڭ ۇنەمى نازارىندا ۇستاپ, قولداۋىمەن سالىنعان زاماناۋي بالاباقشاعا بالالارىن ەرتەلەتىپ اپارىپ كىرگىزگەن سوڭ, ارنايى اۆتوبۋسپەن ءوندىرىس ورنىنا كەلىپ جۇمىسىنا كىرىسەدى. ۋاقىت تالابىنا ساي زەينەتاقى قورلارىنا دا تيەسىلى مولشەردە ءوز قاراجاتتارى اۋدارىلىپ, ەرتەڭگى كۇنگە دەگەن سەنىمدەرىن نىعايتا تۇسكەنى تاعى بار. قۇربان ايت, ورازا ايت, 22 ناۋرىز جانە تاعى باسقا مەرەكەلەردىڭ بارلىعىندا زاۋىت جۇمىسشىلارىنا سىيلىقتار تاراتۋ داستۇرگە اينالعان.
قورىتا ايتقاندا, ءوڭىر ەكونوميكاسىن دامىتقان ۇستىنە دامىتا ءتۇسىپ, ەلدىڭ الەۋمەتتىك جاعدايىن جاقسارتۋ جامبىلدىقتاردىڭ باستى ۇستانىمىنا اينالعان.
نۇربول الدىباەۆ,
«ەگەمەن قازاقستان».
الماتى وبلىسى,
جامبىل اۋدانى.
