زەينەتاقىسىنىڭ كولەمى 100 تەڭگە قۇرايتىن قاريا شىمكەنتتە تۇرادى

وڭتۇستىك قازاقستاندا 100 تەڭگە الاتىن زەينەتكەر بار. وسى وبلىستاعى ورداباسى اۋدانى, شۇبارسۋ ساياجايىندا تۇراتىن جالعىزباستى اتايدىڭ ىزدەۋشىسى جوق. ال جەرگىلىكتى اتقامىنەرلەر ونىڭ بۇل مۇشكىل حالىنەن بەيحابار بولىپ شىقتى. بۇل تۋرالى Otyrar.kz حابارلادى. سايتتىڭ تانىستىرۋىنشا, ەكى بولكە نانعا عانا جەتەتىن پۇلدى زەينەتاقى رەتىندە الاتىن قاريانىڭ اتىن-ءجونى ۆاسيلي ليوۆوچكين ەكەن. قازىر جاسى 83-كە كەلگەن قارت سوڭعى 10 جىلدان بەرى شۇبارسۋداعى اۋزى-مۇرنى جوق لاشىقتى مەكەن ەتەدى. ىشەرگە تاماعى, كيەرگە كيىمى جوق. سە­بەبى, الاتىن جاردەمىنىڭ ءتۇرى الگىندەي. بالكىم, مۇنى بىرەۋلەر قارتتىقتىڭ كەلىپ, اتايدىڭ ەسەپتەن جاڭىلعانىنا سانار. جوق, ءتىپتى دە ولاي ەمەس ەكەن. جوق­­شىلىقتىڭ قامىتىن كيگەن ۆا­سي­لي الەكسەەۆيچ قۇدايى كورشىسى احمەت ۇسەنوۆتىڭ 45 مىڭ تەڭگە زەينەتاقى الاتىنىن ءبىلىپ وتىر. الايدا, اقشانى ەگدە كىسى ەمەس, احمەتتىڭ  ءوزى ۇستايدى. ايتۋىنشا, ساياجاي تۇرعىندارىنىڭ وتىنىشىمەن قارتتى قاراۋىنا العان. كومەك قولىن سوزىپ, تاماقتاندىرىپ, شومىلدىرىپ تۇراتىن كورىنەدى. «دەگەنمەن, ۆاسيلي اتاي توق ادامعا ۇقسامايدى. بىزگە ءۇش كۇننەن بەرى ەشتەڭە جەمەگەنىن ايتتى. ارقالاي بارعان نانىمىزدى قوماعايلانىپ جەپ الدى. ال جەرگىلىكتى بيلىك جالعىزىلىكتى جاننىڭ جاعدايىنان بەيحابار. ماماندار «بۇل اتانى العاش كوردىك, جاعدايى تۋرالى ەندى ەستىدىك», دەيدى. الداعى كۇندەرى ارنايى كوميسسيا قۇرىپ, تەكسەرەمىز دەپ وتىر», – دەگەندى العا تارتادى تىلشىلەر. ال ورداباسى اۋداندىق اكىمدىگىنىڭ الەۋمەتتىك قىزمەت بويىنشا باس مامانى ءانۋار تۇرسىنباەۆ: «كوميسسيا قۇرامىز, تەكسەرەمىز. اۋدانعا, وبلىسقا حاتپەن شىعاتىن بولامىز. ەگەر مەملەكەت تاراپىنان كومەك بولسا, كورسەتەمىز», – دەيدى. زەينەتاقىسىن تۇگەندەمەك تۇگىلى, ىشەرگە اس-اۋقات تاپپاي وتىرعان ۆا­سيلي الەكسەۆيچ شىمكەنت قالاسىندا تىركەۋدە تۇرادى. بىراق كوشەدە قالعان قاريا قۇجاتتارىنىڭ قايدا ەكەنىن دە بىلمەيدى. قارتتار ۇيىنە ءوز اياعىمەن بارا دا المايدى. سول ءۇشىن الەۋمەتتىك ءبولىمنىڭ كومەگىنە ءزارۋ. ساكەن مايلىباي.