«قالامىزدا جاعداي تۇراقتى, قاۋىپسىزدىك جاعدايى قامتاماسىز ەتىلگەن. بىراق سوڭعى كۇندەرى ەپيدەميولوگيالىق جاعدايدىڭ كۇرت ناشارلاعانى تۋرالى ايتۋ قاجەت. ەلوردا «قىزىل ايماققا» ءوتتى.
بۇرىن تاۋلىگىنە ورتا ەسەپپەن كوروناۆيرۋس جۇقتىرعان 100-گە جۋىق ناۋقاس تىركەلسە, قازىر بۇل جاعداي 1200-دەن 1,5 مىڭعا دەيىن وزگەردى! كۇنىنە 100-گە جۋىق ناۋقاس اۋرۋحاناعا جاتقىزۋدى قاجەت ەتەدى. بۇل جاي عانا سان ەمەس, ونىڭ ارقايسىسىنىڭ ارتىندا ءار ازاماتتىڭ دەنساۋلىعى تۇر. ال بۇل قالانىڭ مەديتسينالىق مەكەمەلەرىنە ۇلكەن جۇكتەمە!
كالامىزدا كوروناۆيرۋستىڭ جاڭا شتامى – «وميكرون» پايدا بولعالى بەرى ناۋقاستار قاتارى كۇرت وسكەنىن بايقاپ وتىرمىز. دارىگەرلەر ايتقانداي, بۇل جاعداي وتكەن مەرەكەلىك كۇندەرمەن تىكەلەي بايلانىستى. وميكرون شتامى جىلدام تارايتىن, بارلىق جاستاعى ادامعا جۇعاتىن تەرىس قاسيەتكە يە! جەدەل مەديتسينالىق جاردەم ستانتسياسىنا تاۋلىگىنە 4,5 مىڭنان اسا ادام جۇگىنەدى; شاقىرۋلار – 2 مىڭنان استام.
بۇگىن №10 ەمحاناعا باردىم. نەگىزگى كۇش قالانىڭ ەمحانالارىنا ءتۇسىپ وتىر. امبۋلاتوريالىق قىزمەتتەردىڭ جۇمىسىن كۇشەيتۋدى تاپسىردىم. وسىعان دەيىن كوروناۆيرۋسپەن اۋىراتىن ناۋقاستاردىڭ ۇيىنە قاتىنايتىن ءموبيلدى بريگادالاردىڭ سانى 300-گە دەيىن ارتقان, سول سياقتى قالانىڭ مەديتسينالىق مەكەمەلەرى قوسىمشا جابدىقتارمەن جانە ءدارى-دارمەكتەرمەن جابدىقتالعان.
قوسىمشا تاعى 4 اۋرۋحاناعا ينفەكتسيالىق ستاتسيونارلار ورنالاستىرىلدى. بۇل بىزگە توسەك سانىن ەكى ەسە ارتتىرۋعا مۇمكىندىك بەرىپ وتىر. جالپى العاندا 1200-دەن استام توسەك-ورىن بار.
ناۋقاستار سانىنىڭ ودان ءارى وسۋىنە جول بەرمەۋ ءۇشىن قالا تۇرعىندارىن سانيتارلىق نورمالاردى قاتاڭ ساقتاۋعا, ادام كوپ جينالاتىن ورىندارعا بارماۋعا, ءبىر-بىرىنە قوناققا بارماۋعا, ءىرى وتىرىستارعا قاتىسپاۋعا شاقىرامىن.
مەن ءالى ەكپە الماعان بارلىق ازاماتتى ۆاكتسينا الۋعا, سونداي-اق رەۆاكتسيناتسيا ۋاقىتى جاقىنداعانداردى قايتادان وتۋگە شاقىرامىن.
كوروناۆيرۋس جۇقتىرعان جاعدايدا ۆاكتسيناتسيالانعان ازاماتتار ۆيرۋستى الدەقايدا جەڭىل وتكىزەدى. ۆاكتسيناتسيا ارقىلى عانا ءسىز ءوزىڭىزدىڭ جانە جاقىندارىڭىزدىڭ دەنساۋلىعىن قورعاي الاسىز. ءوز اعزاڭىزدى ادامنىڭ ءومىرى مەن دەنساۋلىعىنا قاۋىپ توندىرەتىن قاۋىپتى ۆيرۋسپەن سىناماڭىز», دەپ جازدى ەلوردا اكىمى.
