ارناۋلى شتابتىڭ دەرەكتەرى بويىنشا سۋمەن جابدىقتاۋ, سۋ بۇرۋ, گازبەن جابدىقتاۋ, ەنەرگيا جانە جىلۋمەن جابدىقتاۋ جۇيەلەرى ۇزدىكسىز جۇمىس ىستەپ تۇر. جاپپاي تارتىپسىزدىك كەزىندە دە بۇل قىزمەتتەردە ىركىلىس بولعان جوق.
جول ينفراقۇرىلىمىن قالپىنا كەلتىرۋ جۇمىستارى دا قارقىندى جالعاسۋدا. جول قوزعالىسىن رەتتەۋدىڭ تەحنيكالىق قۇرالدارىن جوندەۋگە 13 بريگادا جۇمىلدىرىلعان. قيراعان 46 باعدارشام نىسانىنىڭ 38-ءى قالپىنا كەلتىرىلسە, قالعان 5-ءى ۋاقىتشا سىزبا بويىنشا قىزمەت كورسەتىپ تۇر. سونداي-اق, كەلەڭسىزدىك كەزىندە 120 جول بەلگىسى ب ۇلىنگەن, ونىڭ 96-سى تولىق قالپىنا كەلتىرىلدى. بۇل جۇمىستاردى 4 بريگادا جۇرگىزىپ جاتىر.
قالا بيلىگى تالقان بولعان تاس توسەمدەر 13 قاڭتارعا دەيىن رەتكە كەلەتىنىن جەتكىزدى. جول جابىنىن تازارتۋ قارقىن العان. بۇلىنگەن 43 ايالداما پاۆيلوندارى دا بىرتىندەپ جوندەلۋدە. باسىم بولىگىنىڭ اينەكتەرى تۇتاس قيراعان. بۇل جۇمىستارعا جەكە كومپانيالار دا اتسالىسۋدا. قالانىڭ تىنىس-تىرشىلىگىن قامتاماسىز ەتۋدى قولعا العان ماماندار زالالدى باعالاۋ ءالى دە جالعاسىپ جاتقانىن ايتادى.
ايتا كەتۋ كەرەك, بارلىق قىزمەتتەر انتيتەرروريستىك ورتالىقپەن تىعىز قارىم-قاتىناستا. بۇگىنگە دەيىن كوشەلەردەن 200 توننادان استام قوقىس, اۋلالاردان 1 مىڭ تونناعا جۋىق قالدىق شىعارىلدى. كوممۋنالدىق قىزمەتتەر اسكەري قىزمەتشىلەر زالالسىزداندىرعان اۋماقتارعا كىرەدى. قالانى تازارتۋ جۇمىستارىنا قۇقىق قورعاۋ قىزمەتكەرلەرى مەن ەرىكتىلەر دە ۇلەس قوستى.
جاۋاپتى ۆەدومستۆو, تۇرعىندار تاراپىنان قالانىڭ كوممۋنالدىق قىزمەتىنە قاتىستى كەز كەلگەن ساۋال تۋىنداعان جاعدايدا تومەندەگى تەلەفون نومىرلەرىنە حابارلاسۋعا بولاتىنىن مالىمدەدى.
«الماتى سۋ» مكك 274-66-66, +7 771 852 9101 (تاۋلىك بويى) – «التس» جشس اۆاريالىق-ديسپەتچەرلىك قىزمەتى 378-06-65 (تاۋلىك بويى), بايلانىس ورتالىعى: 341-07-77, قوڭىراۋلاردى قابىلداۋ ۋاقىتى: 09:00-دەن 17:00-گە دەيىن – «الماتى قالا جارىق» مكك 300-75-41, 300-75-42 – اۆاريالىق گاز قىزمەتى: 104.
الماتى
