بۇل رەتتە ءبىر عانا Magnum Cash&Carry ساۋدا جەلىسىنىڭ ءوزى شامامەن 11 ملرد تەڭگە شىعىنعا ۇشىراعان. كومپانيانىڭ PR-مەنەدجەرى دميتري شيشكيننىڭ حابارلاۋىنشا, تارتىپسىزدىكتەر كەزىندە الماتى قالاسىنداعى Magnum-نىڭ 15 دۇكەنى تولىقتاي تونالعان. ال 11 دۇكەن ءىشىنارا شىعىنعا باتىپتى.
– قازىر مۇمكىندىگىمىزشە دۇكەندەردى قايتا اشىپ جاتىرمىز. ماسەلەن, 10 قاڭتار كۇنى الماتىداعى 56 دۇكەن جۇمىسقا كىرىستى. جۇمىس ۋاقىتى دۇكەندەردىڭ ورنالاسقان جەرىنە بايلانىستى كەشكى 18.00-19.00-گە دەيىن دەپ كورسەتىلگەن, – دەدى ول.
كومپانيا وكىلى تارتىپسىزدىكتەر كەزىندە كومپانيا قىزمەتكەرلەرىنىڭ زارداپ شەككەنىن, ءيا شەكپەگەنىن ناقتى ايتا المادى. تەك بۇزاقىلار كەلگەن كەزدە قىزمەتكەرلەردىڭ ءبارى دەرلىك قاۋىپسىز جەرگە جەتكىزىلگەنىن ايتتى.
– 15 دۇكەندەگى تاۋارلاردىڭ ءبارى تونالدى. توتەنشە جاعداي ەنگىزىلگەن ساتتەن باستاپ دۇكەن سورەلەرىنەن اراق-شاراپتى تولىقتاي الىپ تاستادىق. تەحنيكالار دا قولدى بولدى. كاسسالاردى قيراتتى. ءبارىن قالپىنا كەلتىرۋ وتە قيىن. سوندىقتان مەملەكەتتەن قولداۋ كۇتەمىز. زارداپ شەككەن بيزنەسكە «اتامەكەن» ۇلتتىق كاسىپكەرلەر پالاتاسى, ساۋدا جانە ينتەگراتسيا مينيسترلىگى تاراپىنان قولداۋ كورسەتىلەدى دەگەن سەنىمدەمىز. قازىر جۇمىستى ءوز كۇشىمىزبەن قالپىنا كەلتىرىپ جاتىرمىز. الماتىداعى قورىمىزدا تاۋار جەتكىلىكتى. جاقىن كۇندەرى تاۋار تاسىمالدارى قالپىنا كەلەدى دەگەن سەنىم بار, – دەدى دميتري شيشكين.
ول كومپانيا قىرۋار شىعىنعا ۇشىراعانىنا قاراماستان, جەرگىلىكتى ءتارتىپ ساقشىلارىنا, اسكەريلەرگە, ءورت سوندىرۋشىلەرگە كومەكتەسىپ جاتقانىن, اۋرۋحانالاردى ازىق-ت ۇلىكپەن قامتاماسىز ەتىپ وتىرعانىن مالىمدەدى.
– كومپانيا ورىن العان جاعدايلارعا قاراماستان جۇمىس ورىندارىن تولىق ساقتايدى. قىزمەتكەرلەردىڭ جالاقىسى ۋاقتىلى تولەنەدى. كومپانيا قارجىلىق جاعدايدى رەتتەۋ ءۇشىن ءتيىستى شارالاردى قابىلدايدى. ازىرشە دۇكەندەردىڭ جۇمىس كەستەسى ءبىر قالىپتى ەمەس. وزگەرىپ تۇرادى. سوندىقتان تولىق اقپاراتتى كومپانيانىڭ رەسمي سايتىنان الۋعا شاقىرامىز. قاۋىپسىزدىكتى قامتاماسىز ەتۋ ءۇشىن كۇزەت قىزمەتى كۇشەيدى. بۇل تۇرعىدان بىزگە الماتى قالاسىنىڭ اكىمدىگى ۇلكەن قولداۋ كورسەتىپ وتىر. قاۋىپتى اۋماقتارداعى دۇكەندەردى ءالى اشپادىق, – دەدى Magnum Cash&Carry ساۋدا جەلىسىنىڭ وكىلى.
وتكەن نومىردە حابارلاعانىمىزداي, قازىرگى ۋاقىتتا «اتامەكەن» ۇلتتىق كاسىپكەرلەر پالاتاسى بيزنەس وكىلدەرىنە قولداۋ كورسەتۋ جەلىسىن ىسكە قوستى. ول بىرنەشە باعىتتى قامتيدى. ماسەلەن, 10 قاڭتارداعى دەرەككە سۇيەنسەك, تىكەلەي جەلىگە كاسىپكەرلەردەن 2 774 قوڭىراۋ تۇسكەن. ونىڭ 1 406-سى مارودەرلىق ارەكەتتەرگە بايلانىستى.
39 قوڭىراۋ فورس-ماجور كۋالىگىن راسىمدەۋگە ارنالعان. بۇدان بولەك, بلوك-بەكەتتەردىڭ جۇمىسىنا قاتىستى 2 قوڭىراۋ, زارداپ شەككەن كاسىپكەرلەردى قولداۋ قورى بويىنشا
3 قوڭىراۋ تۇسكەن. جەكە تۇلعالاردان تۇسكەن قوڭىراۋلاردىڭ سانى – 1 324.
«اتامەكەننىڭ» حابارلاۋىنشا, ەلىمىزدىڭ 9 وڭىرىندە 1 488 نىساندا ورنالاسقان 1 319 زارداپ شەككەن بيزنەس سۋبەكتىسى انىقتالعان. ونىڭ ىشىندە الماتى قالاسىندا 1 234 سۋبەكتى زارداپ شەككەن. بۇل رەتتە 1 245 ساۋدا ورنىنا, 25 قوعامدىق تاماقتانۋ ورنىنا زالال كەلگەن. سونداي-اق قارجى سەكتورىنىڭ 37 سۋبەكتىسى, لوگيستيكا قىزمەتىنىڭ 9 سۋبەكتىسى, باق سالاسىنىڭ 2 سۋبەكتىسى زالال كورگەن.
وسى ورايدا زارداپ شەككەن بيزنەستى قولداۋ ماقساتىندا «كۇشىمىز بىرلىكتە» – «سيلا ۆ ەدينستۆە» قورى قۇرىلدى. ونى الماتى كاسىپكەرلەر پالاتاسى وڭىرلىك كەڭەسىنىڭ توراعاسى ماكسيم بارىشەۆ باسقارادى. قارجىلاي قولداۋ كورسەتەمىن دەگەن ازاماتتار ۇلتتىق پالاتانىڭ سall-ورتالىعىنا جانە الماتى قالاسىنىڭ وڭىرلىك كەڭەسىنە حابارلاسا الادى. كەلەسىدەي تەلەفون نومىرلەرى تاۋلىك بويى قىزمەت كورسەتەدى: +7778 4101758; +7775 1261839 جانە +7777 79470077 (باۋىرجان ورازعاليەۆ, الماتى وڭىرلىك كاسىپكەرلەر پالاتاسى).
«كۇشىمىز بىرلىكتە» – «سيلا ۆ ەدينستۆە» قورىنا تۇسكەن قاراجات الماتى قالاسى جانە باسقا دا ايماقتا زارداپ شەككەن كاسىپكەرلەرگە ارنايى كوميسسيانىڭ شەشىمىنەن كەيىن بولىنەتىن بولادى. قور قارجىنىڭ ءتۇسۋى جانە ءبولىنۋى اشىق بولاتىنىنا كەپىلدىك بەرىپ وتىر. بارلىق قارجى وپەراتسياسى تسيفرلاندىرىلعان جانە جۇرتشىلىققا جاريالانىپ وتىرادى.
اتالعان قورعا قوماقتى قارجى اۋدارعان كاسىپكەرلەردىڭ ءبىرى – بەلگىلى مەتسەنات, «قازازوت» اق باسشىسى باحاريدين ابلازيموۆ. ول زارداپ شەككەن كاسىپكەرلەردى قولداپ, 500 ملن تەڭگە كومەك كورسەتتى. بۇل قورعا تۇسكەن العاشقى قوماقتى قارجى.
– الماتىدا شاعىن كاسىپكەرلەردىڭ اسحانالارى, دۇكەندەرى, شاشتارازدارى قيراتىلىپ, ورتەلدى. قانشاما زات قيرادى. ولارعا كومەكتەسەتىن قور اشىلدى دەگەن سوڭ, ءوزىمنىڭ ازاماتتىق بورىشىمدى وسىلاي وتەگىم كەلدى. وزگە دە كاسىپكەرلەردى بۇزاقىلاردىڭ ارەكەتتەرىنەن كەيىنگى شىعىندى قالپىنا كەلتىرۋگە اتسالىسۋعا شاقىرامىن. ءبىزدىڭ كۇشىمىز – بىرلىكتە, – دەيدى باحاريدين ابلازيموۆ.
