الماتىنىڭ تىنىس-تىرشىلىگى بىرتىندەپ قالپىنا كەلمەك. تەرروريزمگە قارسى شۇعىل ارەكەت ءالى دە جالعاسۋدا. شاھاردىڭ كىرەبەرىس قاقپالارىنا قويىلعان بلوك-بەكەتتەر كىرگەن-شىققان كولىكتەر مەن جەكە تۇلعالاردى ءجىتى تەكسەرۋدە. قالا كومەنداتۋراسى تاراتقان سوڭعى اقپارعا سايكەس لاڭكەستىك, توناۋ جانە باسقا دا قىلمىستاردىڭ 508 قاتىسۋشىسى قولعا ءتۇستى. 22 بىرلىك اتىس قارۋى مەن 1 412 وق-ءدارى تاركىلەندى. بلوك-بەكەتتەردە 56 ادام, 9 كۇدىكتى كولىك ۇستالعان. «102» باسقارۋ پۋلتىنە مىڭنان اسا حابارلاما, كومەنداتۋرانىڭ كول-ورتالىعىنا ازاماتتاردان جەدەل ارەكەت ەتۋدى تالاپ ەتەتىن 525 دابىل تۇسكەن. بۇل اقپاراتتار كۇن سايىن جاڭارۋدا.
قالا اكىمى باقىتجان ساعىنتاەۆ شاھار تۇرعىندارىنا تىنىشتىق پەن باتىلدىق تانىتىپ, جاعدايدى تۇراقتاندىرۋعا جانە ءتارتىپ ورناتۋعا ىقپال ەتكەنى ءۇشىن العىس ايتتى. ول پرەزيدەنتتىڭ شۇعىل ءىس-قيمىلىنىڭ ناتيجەسىندە ەلدىڭ كۇيرەۋىنىڭ الدىن الۋعا قول جەتكەنىن اتاپ ءوتتى.
«قازاقستان بۇكىل الەمگە ەلىمىزدى جانە حالقىمىزدى كۇيرەتۋ مۇمكىن ەمەستىگىن دالەلدەدى. ءبىز حالقىمىزدىڭ قيىن كەزەڭدەردە ۇيىمشىل بولىپ, جۇدىرىقتاي جۇمىلىپ ارەكەت ەتەتىنىنە تاعى دا كوز جەتكىزدىك. الماتىلىقتارعا تارتىپسىزدىك كەزىندە بىزگە كورسەتكەن كومەكتەرى ءۇشىن العىس ايتامىن», دەدى ب.ساعىنتاەۆ.
الماتىنىڭ تىنىس-تىرشىلىگىن قالپىنا كەلتىرۋ جونىندەگى قالالىق شتاب تاۋلىك بويى جۇمىس ىستەيدى. بارلىق قىزمەتتەر انتيتەرروريستىك ورتالىقپەن تىعىز قارىم-قاتىناستا. قالانىڭ بۇكىل اۋداندارىندا تازالىق جۇمىستارى جۇرگىزىلۋدە. كوشەلەردەن 200 توننادان استام قوقىس, اۋلالاردان 1 مىڭ تونناعا جۋىق قالدىق شىعارىلدى. كوممۋنالدىق قىزمەتتەر اسكەري قىزمەتشىلەر زالالسىزداندىرعان اۋماقتارعا كىرەدى. قالانى تازارتۋ جۇمىستارىنا قۇقىق قورعاۋ قىزمەتكەرلەرى دە اتسالىسۋدا. ايتا كەتسەك, ورىن العان قيىن جاعدايعا قاراماستان قالانىڭ تىنىس-تىرشىلىگىن قامتاماسىز ەتۋ جۇيەسى ءۇزىلىسسىز جۇمىس ىستەدى. حالىقتى سۋمەن جابدىقتاۋ, كارىز, گازبەن جابدىقتاۋ, جىلۋ قىزمەتتەرىندە ىركىلىس جوق.
الماتىنىڭ ازىق-ت ۇلىك قاۋىپسىزدىگى, ونىمدەردىڭ تاپشىلىعى بىرتىندەپ رەتكە كەلىپ جاتىر. 80-گە جۋىق سۋپەرماركەت, ءۇش ءىرى ازىق-ت ۇلىك بازارى, 70-كە جۋىق جقس, 111 ءدارىحانانىڭ ەسىگى قايتا اشىلدى. ءۇش ءدارىحانا تاۋلىك بويى جۇمىس ىستەيدى. اۆتوگاز باعاسى ليترىنە 70 تەڭگەگە دەيىن تومەندەدى. قابىلدانىپ جاتقان شارالار قالا ءومىرىن بىرتىندەپ قالىپقا كەلتىرۋگە مۇمكىندىك بەردى.
«تەك سابىرلىق, شىدامدىلىق پەن تۇسىنىستىك قاجەت», دەگەن ب.ساعىنتاەۆ تج رەجىمىنىڭ تالاپتارىن مۇلتىكسىز ساقتاۋ جانە كومەندانتتىق ساعاتتى بۇزباۋ قاجەتتىگىن ەسكە سالدى.
«بولعان جاعداي ءبارىمىزدى قىنجىلتتى. ارۋ قالامىزدىڭ كوز الدىمىزدا قيراۋى قابىرعامىزدى سىزداتتى. ەندى ەس جيماستاي كورىنىپ ەدىك. شۇكىر, تىرشىلىك قايتا جاندانا باستادى. بۇل وقيعا بارىمىزگە ۇلكەن ساباق بولدى. باستاپقى كۇندەرى جۇرت دۇكەننەن نان تاپپاي سەندەلگەنىن كوردىك. وسىدان كەيىن تىنىشتىقتىڭ, تاۋەلسىزدىكتىڭ باعاسى ءبىزدىڭ سانامىزدا ودان سايىن بيىكتەي تۇسەتىنى ءسوزسىز», دەيدى قالا تۇرعىنى ەرعانات قۋاتبەك ۇلى.
الماتى
