وتكەن جىلى 21 قاراشادا يۋنەسكو-نىڭ 41-ءشى باس كونفەرەنتسياسىنىڭ ارنايى قارارىمەن 2022-2023 جىلدارعا ارنالعان حالىقارالىق مەرەيتويلار ءتىزىمى قابىلدانىپ, وعان قازاقستاننىڭ ۇسىنىسىمەن ەل قايراتكەرى, ۇلت ۇستازى احمەت بايتۇرسىن ۇلىنىڭ 150 جىلدىعى مەن ءانشى روزا باعلانوۆانىڭ 100 جىلدىعى ەندى.
ايتۋلى كۇندى اتاپ ءوتۋ بارىسىندا ەلىمىزدىڭ وقۋ ورىندارىندا عىلىمي-پراكتيكالىق كونفەرەنتسيالار, وقۋلار جانە باسقا دا ءىس-شارالار كەڭىنەن ۇيىمداستىرىلادى.
تۇركسوي ۇيىمى مۇشەلەرىنىڭ قاتىسۋىمەن حالىقارالىق تۇركولوگيالىق كونگرەسس وتكىزۋ جوسپارلانعان. الاش قايراتكەرىنىڭ شىعارماشىلىعى بويىنشا ءبىلىم بەرۋ ورىندارىندا اشىق ساباقتار, تاقىرىپتىق كونكۋرستار وتكىزىلەدى.
سونىمەن قاتار, احمەت بايتۇرسىن ۇلىنىڭ تاڭدامالى ەڭبەكتەرىن ورىس, اعىلشىن جانە تۇرىك تىلدەرىنە اۋدارۋ, عىلىمي ەڭبەكتەرىنىڭ تولىق جيناعىنىڭ 12 تومدىعىن باسپادان شىعارىپ, عىلىمي اينالىمعا ەنگىزۋ بويىنشا زەرتتەۋ جۇمىستارى جۇرگىزىلەدى.
مەملەكەتتىك كوميسسيا احمەت بايتۇرسىن ۇلىنىڭ 150 جىلدىق مەرەيتويىنا دايىندىقتى پىسىقتاپ شىقتى.
