1972 جىلدىڭ 26 تامىزى مەن 10 قىركۇيەگى ارالىعىندا ميۋنحەندە XX جازعى وليمپيا ويىندارى دۇركىرەپ وتكەن ەدى. المانياداعى دودادا 121 مەملەكەتتەن كەلگەن 7 مىڭنان اسا سپورتشى جارىس جولىنا شىقتى. ەكى اپتا بويى ولار سپورتتىڭ 23 ءتۇرى بويىنشا سايىسقا ءتۇسىپ, بارلىعى 195 جۇلدە جيىنتىعىن ساراپقا سالدى.
باسكەتبول جارىسىندا ءالجان جارمۇحامەدوۆ ونەر كورسەتكەن كسرو قۇراماسى توپتىق كەزەڭدە جەتى ويىن وتكىزىپ, بارلىعىندا جەڭىسكە جەتتى. ءبىرىنشى ورىنمەن جارتىلاي فينالعا شىققان كسرو الدىمەن كۋبانى 67:51 ەسەبىمەن جەڭسە, دراماعا تولى بولعان فينالدا ازۋلى اقش قۇراماسىن جولدان تايدىرىپ, وليمپيادا چەمپيونى بولدى.
ميۋنحەندەگى باسەكەدە سولتۇستىكقازاقستاندىق جەڭىل اتلەت ۆەنيامين سولداتەنكو, قاراعاندىلىق ءجۇزۋشى ۆيكتور ابويموۆ جانە الماتىلىق بالۋان اناتولي نازارەنكو كسرو قۇرامىندا كۇمىس جۇلدە جەڭىپ العان ەدى.
تاۋەلسىزدىكتەن كەيىنگى العاشقى وليمپيادا
بيىل قازاقستاندىق سپورتشىلار ەلىمىز تاۋەلسىزدىكتەن العاننان كەيىنگى قاتىسقان العاشقى وليمپياداعا 30 جىل تولدى. 1992 جىلى يسپانيانىڭ بارسەلونا قالاسىندا وتكەن جازعى وليمپيا ويىندارىنا تمد قۇرامىنداعى 12 مەملەكەت ءبىر تۋدىڭ استىنا بىرىگىپ, وليمپيادادا ونەر كورسەتتى. بارسەلوناداعى دودادا وتاندىق سپورتشىلار التىن, كۇمىس, قولا جۇلدەگە قول جەتكىزدى.
اتاپ ايتقاندا, باسكەتبولدان ايەلدەر قۇرامىندا پاۆلودارلىق يرينا گەرليتس وليمپيادا چەمپيونى اتانسا, قاراعاندىلىق ەلەنا چەبۋكينا مەن تاتيانا مەنشوۆا ۆولەيبولدان, ەلمادي جابرايلوۆ كۇرەس تۇرلەرىنەن كۇمىس جۇلدە يەلەندى. ال وق اتۋدان قاراعاندىلىق ۆلاديمير ۆوحميانين مەن بالۋان داۋلەت تۇرلىحانوۆ بارسەلونادان قولا مەدالمەن ورالدى.
بيىلعى جىلدىڭ باستى باسەكەلەرى
m 2022 جىلدىڭ العاشقى ايىندا قىسقى سپورتشىلارىمىز بەيجىڭدە وتەتىن وليمپيا ويىندارىنا ليتسەنزيا الۋ ءۇشىن بارىن سالادى. ال قاڭتاردىڭ ەكىنشى جارتىسىندا مەلبۋرندە تەننيستەن «ۇلكەن دۋلىعا» ساناتىنا جاتاتىن ءبىر جىل بەدەرىندەگى ءتورت جارىستىڭ باسى – اۋستراليانىڭ اشىق بىرىنشىلىگىنىڭ جالاۋى جەلبىرەيدى. جۇلدە قورى مول جانە الەمدىك رەيتينگتەگى جاعدايدى جاقسارتۋ ءۇشىن تاماشا مۇمكىندىك بەرەتىن ءدۇبىرلى دوداعا تەك تاڭداۋلى تەننيسشىلەر عانا قاتىسادى. سولاردىڭ قاتارىندا قازاقستاننىڭ دا وكىلدەرى بار.
m فۋتزالدان بىلتىرعى الەم چەمپيوناتىندا ءتورتىنشى ورىن الىپ, ايبىنىمىزدى اسقاقتاتقان قازاقستان ۇلتتىق قۇراماسى بيىل ەۋروپا بىرىنشىلىگىندە باق سىنايدى. 19 قاڭتار مەن 6 اقپان ارالىعىندا نيدەرلاندتىڭ امستەردام جانە گرونينگەن قالالارىندا وتەتىن قارت قۇرلىقتىڭ دوپ دوداسىنا ەۋروپانىڭ ەڭ ۇزدىك 32 قۇراماسى قاتىسادى. جەرەبە قورىتىندىسى بويىنشا قازاقستان ۆ توبىندا يتاليا, سلوۆەنيا جانە فينليانديا فۋتزالشىلارىمەن وينايدى.
m ناۋرىز ايىندا تەننيستەن قازاقستان ەرلەر قۇراماسى دەۆيس كۋبوگىنىڭ فينالدىق كەزەڭىنە جولداما الۋ ءۇشىن نورۆەگيامەن كۇش سىناسادى. جارىس 4-5 ناۋرىز كۇندەرى نورۆەگيادا وتەدى. دەۆيس كۋبوگىنىڭ ىرىكتەۋ ماتچتارى ءتورت جەكەلەي جانە ءبىر جۇپتىق باسەكەدەن تۇرادى جانە ءۇش سەتتىك فورماتتا وتەدى. فينالعا ىرىكتەۋ كەزەڭىندە ۇزدىك اتانعان 12 كوماندا جولداما الادى. ولارعا بيىلعى دەۆيس كۋبوگىنىڭ فيناليستەرى – رەسەي مەن حورۆاتيا قوسىلادى. سونداي-اق ۇلىبريتانيا مەن سەربيا قۇرامالارى ارنايى شاقىرتۋمەن بارادى.
m قازاقستان قۇراماسى 2022 جىلى قاتىساتىن ماڭىزدى جارىستىڭ ءبىرى – جازعى ازيا ويىندارى. سارى قۇرلىقتىڭ شاعىن وليمپياداسى سانالاتىن دودا 10-25 قىركۇيەك كۇندەرى قىتايدىڭ حانچجوۋ قالاسىندا وتەدى. حانچجوۋداعى ازيا ويىندارى قىتاي تاريحىندا وتكىزىلەتىن ءۇشىنشى ازيادا بولماق. بۇعان دەيىن 1990 جىلى بەيجىڭدە, 2010 جىلى گۋانچجوۋدا وتكەن بولاتىن. 2018 جىلعى دجاكارتادا وتكەن جازعى ازيا ويىندارىندا قازاقستان 15 التىن, 17 كۇمىس, 44 قولا مەدالمەن (جيىنى 76 جۇلدە) جالپىكوماندالىق ەسەپتە 9-ورىن العان.
m بيىل فۋتبولدان الەم چەمپيوناتىنىڭ جالاۋى 21 قاراشا مەن 18 جەلتوقسان ارالىعىندا قاتار استاناسى – دوحادا جەلبىرەيدى. دوپ دوداسى الەم چەمپيوناتتارىنىڭ تاريحىندا تۇڭعىش رەت كۇزدىڭ سوڭى مەن قىستىڭ باسىندا وتكەلى وتىر. قاتاردا جاز مەزگىلى تىم ىستىق بولادى. ءتىپتى ارابيا تۇبەگىنىڭ شىعىسىندا ورنالاسقان ەلدە اۋا تەمپەراتۋراسى جاز مەزگىلىندە +50 گرادۋسقا دەيىن جەتەدى. مۇنداي اپتاپ ىستىق الەم چەمپيوناتى بارىسىندا فۋتبولشىلاردىڭ دەنساۋلىعىنا قاۋىپ توندىرەدى دەيدى ماماندار. سوندىقتان دا فيفا باسشىلارى 2022 جىلعى بىرىنشىلىگىن قىستا وتكىزۋ تۋرالى توقتامعا كەلىپتى. 28 كۇنگە سوزىلاتىن جاھاندىق دودا «مۋنديال» تاريحىنداعى قىسقا مەرزىمدە وتكەن العاشقى بىرىنشىلىك بولماق.
m بيىل قازاقستاندىق سپورتشىلار قىسقى وليمپيادا, پاراليمپيادا ويىندارى, بەلگرادتا وتەتىن جەڭىل اتلەتيكادان جابىق سپورت كەشەندەگى, شايبالى حوككەي, دزيۋدو, كوركەم گيمناستيكا, سۋ سپورتى جانە باسقا سپورت تۇرلەرىنەن الەم چەمپيوناتتارىندا باق سىناپ, سول دودالاردا ءانۇرانىمىزدى شىرقاتۋدى كوزدەيدى.
