ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترى 2022 جىلعا ەكى پرەمەرا دايىنداپ وتىر. ءبىرى ميگەل دە سەرۆانتەستىڭ الەم ادەبيەتىنىڭ جاقۇتىنا اينالعان «دون كيحوت» رومانىنىڭ جەلىسىمەن ساحنالانباق. رەجيسسەرى – حالىقارالىق ءتۇرلى تەاتر فەستيۆالدەرىندە ۇزدىك رەجيسسەرلىك جۇمىس جۇلدەسىنىڭ يەگەرى الىبەك ومىربەك ۇلى.
سونداي-اق ۋيليام شەكسپير شىعارمالارىنىڭ نەگىزىندە «شەكسپيرمەن بەتپە-بەت» سپەكتاكلى دايىندالىپ جاتىر. بۇل قويىلىمدى ماسكەۋ قالاسىنداعى ە.ۆاحتانگوۆ اتىنداعى تەاتر رەجيسسەرى, ريماس تۋميناستىڭ شاكىرتى گۇلناز بالپەيىسوۆا قويماق.
ال م.اۋەزوۆ اتىنداعى ۇلتتىق دراما تەاترى الداعى ۋاقىتتا ءابدىجامىل نۇرپەيىسوۆتىڭ شىعارماسى جەلىسىمەن «قان مەن تەر. اقبالا», راحمەتوللا رايىمقۇلوۆتىڭ شىعارماسى جەلىسىمەن «ماقشار تۇنگى ماحاببات» سپەكتاكلدەرىن كورەرمەنگە ۇسىنباق. بۇدان بولەك بەرنارد شوۋدىڭ «پيگماليون» كومەدياسى مەن مۇحتار اۋەزوۆتىڭ «اقان-زايرا» دراماسى جوسپارلانىپ وتىر.
«استانا وپەرا» مەملەكەتتىك وپەرا جانە بالەت تەاترىن دا قادام باسقان جاڭا جىل وتە مازمۇندى بولماق. ماسەلەن, يرجي كيلياننىڭ «التى بي» بالەتى جانە ءوزىنىڭ وتە جەڭىل سالماعىنا قاراماستان, ۇلكەن الىپتاردى جەڭىپ, الاياق تۇلكىدەن قۋلىعىن اسىرىپ, تۇتقىنداردى بوساتاتىن قاڭباق شال وقيعالارى تۋرالى جولان داستەنوۆتىڭ «قاڭباق شال» بالالار وپەراسىنىڭ پرەمەراسى جوسپارلانۋدا. بۇدان بولەك حورەوگراف رايموندو رەبەكتىڭ قويىلىمىندا سەرگەي پروكوفەۆتىڭ «كۇلبيكەش» بالەتى مەن دجواكينو ءروسسينيدىڭ «الجيردەگى يتاليالىق قىز» اتتى وپەراسى دايىندالىپ جاتىر. ەڭ باستىسى, تەاترسۇيەر جاندار ءۇشىن باستى سىيلىق – ەۆگەني برۋسيلوۆسكيدىڭ «ەر تارعىن» ۇلتتىق وپەراسىنىڭ پرەمەراسى بولماق.
سونداي-اق نۇر-سۇلتان قالاسى اكىمدىگىنىڭ مۋزىكالىق جاس كورەرمەن تەاترىندا دا بيىل رەپەرتۋارعا بىرنەشە جاڭا قويىلىم قوسىلادى. جۇسىپبەك ايماۋىتوۆتىڭ «سىلاڭ قىز» ساتيرالىق شىعارماسى جەلىسىمەن دايىندالىپ جاتقان سپەكتاكلدىڭ پرەمەراسى اقپان ايىنا جوسپارلانىپ وتىر (رەج. ا.ماەميروۆ). ال ن.ۆ.گوگولدىڭ «ۇيلەنۋ» قويىلىمى (رەج.م.جۇماباەۆ) مەن «كۇن استىنداعى كۇنەكەي قىز» ەرتەگىسىنىڭ پرەمەرالارى ءساۋىر-ماۋسىم ايلارىندا وتپەك.
