تورتكۇل دۇنيەنىڭ ءتورتىنشى قۇراماسى
بيىل فۋتزالدان قازاقستان ۇلتتىق قۇراماسى ليتۆانىڭ ۆيلنيۋس, كاۋناس جانە كلايپەدا قالالارىندا ۇيىمداستىرىلعان VIII الەم چەمپيوناتىندا ءتورتىنشى ورىن الىپ, ەل تاۋەلسىزدىگىنىڭ 30 جىلدىعىنا تاماشا تارتۋ جاسادى. سەبەبى كۇنى بۇگىنگە دەيىن قازاقستاننىڭ بىردە-ءبىر كوماندالىق قۇرامى الەم چەمپيوناتتارىنىڭ تاريحىندا جارتىلاي فينالعا دەيىن جەتكەن ەمەس.
قازاقستاندىق فۋتزال شەبەرلەرى قىركۇيەكتىڭ سوڭى مەن قازان ايىنىڭ باسىنداعى الەم چەمپيوناتىندا ابىرويلى ونەر كورسەتىپ, جەر-جاھاننىڭ ەڭ ۇزدىكتەرى باس قوسقان الاماندا بارىمەن تەرەزەسى تەڭ دارەجەدە وينادى. جەرلەستەرىمىز توپتىق كەزەڭدە كوستا-ريكا (6:1) مەن ليتۆانى (3:0) جەڭسە, ءۇشىنشى تۋردا ۆەنەسۋەلامەن (1:1) تەڭ ءتۇستى. پلەي-وففتىڭ العاشقى ەكى ماتچىندا تايلاند (7:0) پەن يراندى (3:2) جارىس جولىنان ىعىستىردى. جارتىلاي فينالدا پورتۋگاليامەن نەگىزى ۋاقىتتا 2:2 ەسەبىمەن تەڭ ويناپ, ماتچ سوڭىنداعى پەنالتي سەرياسىندا عانا 4:3 ەسەبىمەن جول بەردى.
ال قولا جۇلدە ءۇشىن وتكەن باسەكەدە وسىعان دەيىن سەگىز مارتە ۇيىمداستىرىلعان الەم چەمپيوناتىنىڭ بەسەۋىندە باس جۇلدەنى ولجالاعان ازۋلى برازيليا قۇراماسىنا ەسە جىبەردى.
ءبىرجان ورازوۆ, فۋتزالدان ۇلتتىق قۇرامانىڭ ويىنشىسى:
– بيىلعى الەم چەمپيوناتى قازاقستان قۇراماسى ءۇشىن وتە تابىستى ءوتتى. ويتكەنى تاريحتا تۇڭعىش رەت دۇنيەجۇزىنىڭ ۇزدىك ءتورت قۇراماسىنىڭ قاتارىنان كورىندىك. بۇل قازاقستان ءۇشىن زور جەتىستىك ەكەنى بەلگىلى. مەن ءۇشىن وسى دوداداعى ەڭ تارتىستى ويىن – يران مەن پورتۋگالياعا قارسى وتكەن كەزدەسۋ بولدى. سەبەبى ەكى ماتچتىڭ دا تاعدىرى سوڭعى مينۋتتاردا شەشىلدى. ءبىز يراندى سوڭعى ساتتە سان سوقتىرىپ كەتسەك, پورتۋگاليا ءدال سونداي جاعدايدا ءبىزدى جەڭىپ كەتتى.
قازىرگى تاڭدا ەلدەگى فۋتزال سپورتىن لەگيونەرسىز ەلەستەتۋ دە, دامىتۋ دا قيىن. ۇلتتىق قۇراماداعى, كلۋبتاعى ويىنشىلار لەگيونەرلەرگە قاراپ بوي تۇزەپ, ەندى-ەندى شەبەرلىگىن شىڭداپ كەلەدى. ەگەر الداعى ۋاقىتتا ءار وبلىسقا سپورت مەكتەپتەرىن سالىپ, فۋتزال ۇيىرمەلەرىن اشاتىن بولسا, قازاقستان قۇراماسى لەگيونەرلەرسىز-اق الەمنىڭ الدىڭعى قۇرامالارىنىڭ قاتارىنا قوسىلا الادى.
داۋرەن تۇرساعۇلوۆ, فۋتزالدان ۇلتتىق قۇرامانىڭ ويىنشىسى:
– ءبىز بيىلعى الەم چەمپيوناتىندا بۇرىن-سوڭدى ەل تاريحىندا بولماعان ناتيجەگە قول جەتكىزدىك. الەم چەمپيوناتىنا اتتانار كەزدە ءوز الدىمىزعا لاتۆيادان تەك جۇلدەمەن قايتامىز دەگەن ماقسات قويعان ەدىك. وكىنىشكە قاراي, ماقساتىمىزعا ءبىر قادام قالعان جەردە سۇرىندىك. دەسە دە ءتورتىنشى ورىننىڭ ءوزى جاقسى ناتيجە.
مەن ءۇشىن بىرىنشىلىكتەگى ەڭ تارتىستى ويىن – يرانعا قارسى ماتچ بولدى. ءبىرىنشى تايمدا 0:2 ەسەبىمەن جەڭىلىپ, ءۇزىلىس كەزىندە باس باپكەر كاكانىڭ جىگەرلى, رۋحتى سوزدەرىنەن كەيىن ەكىنشى تايمدا مۇلدە باسقاشا ويىن كورسەتىپ, جەڭىستى ج ۇلىپ الدىق. ۇلتتىق قۇراماداعى يگيتا, لەو, تاينان, دۋگلاس جوعارى دەڭگەيدەگى ويىنشىلار ەكەنى ءسوزسىز. ولار قازاق فۋتزالىن وسى دەڭگەيگە كوتەرىلۋىنە زور ۇلەس قوسىپ كەلەدى. سولاردىڭ ارقاسىندا ءبىزدىڭ قازاق جىگىتتەرىنىڭ دە تاجىريبەسى ارتىپ, شەبەرلىكتەرى شىڭدالۋ ۇستىندە.
بەلگرادتا
بوكسشىلار اتويلادى
توكيو وليمپياداسىندا نەبارى ەكى قولا مەدال الىپ, جانارىمەن جەر شۇقىپ قايتقان بوكسشىلار جانكۇيەرلەر تاراپىنان سىنعا ۇشىراعان ەدى. ايتسە دە وليمپيادادان تۋرا ەكى اي وتكەننەن سوڭ, بەلگرادتاعى الەم چەمپيوناتىندا وتاندىق بىلعارى قولعاپ شەبەرلەرى
2 التىن, 2 كۇمىس جانە 1 قولا مەدالدى ولجالاپ, مىقتىلار تىزىمىنە قايتا قوسىلدى.
الەم چەمپيوناتىنىڭ ەڭ جەڭىل سالماعىندا ونەر كورسەتىپ, تۋرنيردە قارسىلاس شىداتپاعان تەمىرتاس ءجۇسىپوۆ بۇل ءساتتى 16 جىل كۇتتى. 2005 جىلى بوكس قولعابىن قولىنا كيگەن ءجۇسىپوۆ ءار جىلدارى ۇلتتىق قۇرامامەن بىرگە ازيا بىرىنشىلىگىنە قاتىسىپ, 2013 جىلى قۇرلىق چەمپيونى, 2019 جىلى قولا جۇلدەگەرى بولدى. ال بيىل ەكى بىردەي الەم چەمپيوناتىندا توپ جاردى. ءبىرى اسكەريلەر اراسىنداعى دۇنيەجۇزىلىك دودادا بولسا, ارادا ءبىر جارىم اي وتكەندە بەلگرادتا الدىنا جان سالمادى.
ال 51 كيلوداعى ساكەن بيبوسىنوۆ توكيو وليمپياداسىندا تورەشىلەردىڭ ادىلەتسىزدىگىنە ۇشىراپ, ەلگە قولا مەدالمەن ورالعان-دى. توكيودا كەتكەن ەسەسىن بەلگرادتا قايتارىپ, تۇعىردىڭ ەڭ بيىك ساتىسىنان كورىندى. سونداي-اق سەربيا تورىندە جاس تالانتتى بوكسشى سابىرحان ماحمۇد (54 كگ) پەن سەرىك تەمىرجانوۆ (57 كگ) كۇمىس, قۇراما كاپيتانى ابىلايحان ءجۇسىپوۆ ءۇشىنشى مارتە الەم چەمپيوناتىنىڭ قولا جۇلدەگەرى اتاندى.
ساكەن بيبوسىنوۆ,
الەم چەمپيونى:
– توكيو وليمپياداسىنا التىن الامىن دەپ بارعان ەدىم. وكىنىشكە قاراي, ول جاقتان التىن بۇيىرماي, قولانى قاناعات تۇتتىق. ەلگە كەلگەن سوڭ باپكەرىممەن اقىلداسىپ, توكيو شارشى الاڭىنداعى كەتكەن ەسەمدى بەلگرادتا قايتارامىن دەپ شەشتىم. توكيودان ورالعان بويدا تاكتيكامىزدى وزگەرتتىك. دايىندىق جۇيەسىنە وزگەرىس ەنگىزدىك. مىنە, وسىنىڭ ناتيجەسىن بەلگراد تورىندە كوردىك. حالقىمدى قۋانتا بىلسەم, سودان ارتىق باقىت جوق.
تەننيسشىلەر
تورگە وزدى
بيىل تەننيسشىلەر ءۇشىن دە ەرەكشە جىل بولدى. كەيىنگى جىلدارى الەمدىك ارەنالاردا جارقىراپ ونەر كورسەتىپ جۇرگەن ەلەنا رىباكينانىڭ ءبىر ءوزى ەل تەننيسىن ورگە سۇيرەپ كەلەدى. اتاپ ايتار بولساق, ول پاريجدە وتكەن Roland Garros تۋرنيرىندە «ۇلكەن دۋلىعا» ساناتىنداعى جارىستاردا 23 مارتە توپ جارىپ, تالاي ءدۇلدۇل تەننيسشىلەردى جولدان تايدىرعان ايگىلى سەرەنا ۋيليامستى جەڭىپ, كارەراسىندا العاش رەت اتالعان جارىستىڭ شيرەك فينالىنا دەيىن جەتتى.
سونىمەن قاتار رىباكينا بيىلعى توكيو وليمپياداسىنىڭ شيرەك فينالىندا ونەر كورسەتىپ, تاعى ءبىر تاريحي ناتيجەنى تىركەدى. سەبەبى بۇعان دەيىنگى جەتى وليمپيادادا قازاقستاننىڭ بىردە-ءبىر تەننيسشىسى بۇل مەجەگە جەتە الماعان ەدى. جۇپتىق جانە كوماندالىق سىندا دا جەتىستىگىمىز از بولعان جوق. الەكساندر بۋبليك پەن اندرەي گولۋبەۆ جۇبى «ۇلكەن دۋلىعا» ساناتىنداعى Roland Garros اتتى ايگىلى جارىستىڭ فينالىندا ونەر كورسەتتى.
ەلەنا رىباكينا, تەننيستەن ۇلتتىق قۇراما مۇشەسى:
– وليمپيادانىڭ جارتىلاي فينالىنداعى ساتسىزدىكتەن سوڭ كوپشىلىكتىڭ ماعان قولداۋ كورسەتكەنىنە تاڭعالدىم. شىنى كەرەك, ريزا بولدىم. ماتچتا قولىمنان كەلگەنشە جەڭىسكە جەتۋگە تىرىستىم, بىراق ساتتىلىك جولداس بولمادى. وليمپيا ويىندارىنىڭ باسقا تۋرنيرلەردەن باستى ايىرماشىلىعى – حالىقتىڭ شەكسىز قولداۋىندا. ەندى پاريجدە وتەتىن وليمپيادادا بارىمدى سالامىن.
تەننيستەن ەرلەر قۇراماسى بيىل دا دەۆيس كۋبوگىنىڭ فينالدىق كەزەڭىنە قاتىسىپ, ءتۋرنيردىڭ شيرەك فينالىنا دەيىن جەتتى. مادريدتەگى (يسپانيا) جارىستا ونەر كورسەتكەن جەرلەستەرىمىز توپتىق كەزەڭنەن سۇرىنبەي وتكەنىمەن, شيرەك فينالدا نوۆاك دجوكوۆيچ باستاعان سەربيا جىگىتتەرىنەن جەڭىلىپ قالدى. وسىلايشا, قازاقستاندىق تەننيسشىلەر التىنشى مارتە الەمنىڭ ەڭ ۇزدىك سەگىز كومانداسىنىڭ قاتارىنان كورىندى.
«التاي» – ازيانىڭ
ازۋلى كومانداسى
كوماندالىق جارىستاعى قازاقستاننىڭ تاعى ءبىر جەتىستىگى – «التايدىڭ» كلۋبتار اراسىنداعى ۆولەيبولدان سارى قۇرلىق بىرىنشىلىگىندە جەڭىمپاز اتانۋى. بۇل جەڭىس تە ۆولەيبولدان ەل تاريحىنداعى اسا ءىرى جەتىستىكتىڭ ءبىرى. ازيا چەمپيوناتىنا اۋتسايدەر رەتىندە بارعان وسكەمەندىك ۇجىم جارىس بارىسىندا بارلىق قارسىلاسىن قوعاداي جاپىرىپ, «ازيانىڭ تەڭدەسسىز كومانداسى» دەگەن اتاققا يە بولدى. جەرلەستەرىمىز چەمپيونات بارىسىندا سارى قۇرلىقتىڭ الدىڭعى قاتارلى كلۋبتارىمەن شەبەرلىك بايقاستى. اتاپ ايتار بولساق, ىرىكتەۋ كەزەڭىندە ءفيليپپيننىڭ «رەبيسكو», تايلاند, يراننىڭ «سايپا» جانە ەكى دۇركىن ازيا چەمپيونى «سۋپريم چونبۋري» كلۋبتارىمەن وينادى. «التاي» ءۇش ماتچتا دا ازۋلى قارسىلاستارىن بىردەي ەسەپپەن (3:0) جەڭدى. سونداي-اق فينالدا تايلاندتىڭ «ناكحون راتچيساما» كلۋبىن دا ءدال وسىنداي ەسەپپەن ۇتىپ, العاش رەت ازيا چەمپيوناتىندا جەڭىس تۇعىرىنان كورىندى.
تولاعايلاردىڭ قارقىنى
تاۋ قوپارعانداي
بيىل اۋىر اتلەتتەرىمىز ءۇشىن دە ولجالى جىل بولدى. يليا ءيليننىڭ ءىزباسارلارى جاستار جانە ەرەسەكتەر اراسىنداعى الەم بىرىنشىلىگى مەن سارى قۇرلىق دوداسىندا باق سىناپ, ءتورت مارتە ءانۇرانىمىزدى شىرقاتتى. ءبىر ەرەكشەلىگى, بۇل جارىستىڭ ۇشەۋى تاشكەنتتە, بىرەۋى ساۋد ارابياسىنىڭ دجيددا قالاسىندا ۇيىمداستىرىلدى.
تاشكەنتتەگى جاستار جانە دجيدداداعى جاسوسپىرىمدەر اراسىنداعى الەم چەمپيوناتىندا 102 كيلو سالماقتا كۇش سىناسقان راحات بەكبولاتقا ايرىقشا سەنىم كورسەتىلدى. ويتكەنى ول بىلتىرعى الەم كۋبوگىندا دارا شىعىپ قانا قويماي, الەمدىك رەكوردتى دا جاڭارتقان ەدى. تاشكەنتتەگى دودانىڭ قوسسايىسىندا 377 (175+202) كيلونى ەڭسەرىپ, التىن تۇعىرعا كوتەرىلسە, اراب تۇبەگىندەگى دودادا ول جۇلقا كوتەرۋدە 155, سەرپە كوتەرۋدە 200 كيلونى باعىندىرىپ, 355 كيلومەن ءبىر جىلدا ەكى مارتە الەم چەمپيونى بولدى.
سونداي-اق ەرەسەكتەر اراسىنداعى تاشكەنتتەگى دودادا 55 كيلو سالماقتا ونەر كورسەتكەن ارلي چونتەي دە الدىنا جان سالعان جوق. قوسسايىستا 260 (118+142) كيلو زىلتەمىردى ەڭسەرىپ, الەم چەمپيونى اتاندى. چونتەي وسى جىلدىڭ ءساۋىر ايىندا ءدال وسى تاشكەنتتە وتكەن ازيا چەمپيوناتىندا 255 (115+140) كيلو زىلتەمىردى باسىنان اسىرا كوتەرىپ, ءوز سالماعىندا سارى قۇرلىقتىڭ تەڭدەسسىز اۋىر اتلەتى اتاعىن يەلەنىپ ەدى.
