بۇل تۋرالى ەڭبەك جانە حالىقتى الەۋمەتتىك قورعاۋ مينيسترلىگىنىڭ ءباسپاسوز قىزمەتى ءمالىم ەتتى.
«ەلىمىزدە مۇگەدەك جانداردىڭ قۇقىعىن قورعاۋ جانە ءومىر ءسۇرۋ ساپاسىن جاقسارتۋ جونىندەگى ۇلتتىق جوسپاردى ىسكە اسىرۋ شەڭبەرىندە الەۋمەتتىك قىزمەت پورتالى ىسكە قوسىلدى. جانە ول 2025 جىلعا دەيىن كەزەڭ-كەزەڭىمەن ەنگىزىلەدى.
سونداي-اق پورتال قولدانۋشىعا وڭالتۋدىڭ تەحنيكالىق قۇرالدارى مەن قىزمەتىن دەربەس تاڭداۋعا مۇمكىندىك بەرەدى. كەز كەلگەن قىزمەتكە قول جەتكىزۋ ءۇشىن الدىمەن ەلەكتروندىق تسيفرلىق قولتاڭبانى راستاۋ تالاپ ەتىلەدى. سول سياقتى قىزمەتتى الۋ مەرزىمىن 6 ايدان 15 كۇنگە دەيىن قىسقارتتى. قولدانۋشىلاردىڭ ماسەلەسىن جىلدام شەشۋ ءۇشىن ەڭبەك رەسۋرستارىن دامىتۋ ورتالىعىمەن تىكەلەي بايلانىس قۇرىلعان», دەلىنگەن حابارلامادا.
سونداي-اق بيىل 7 شىلدەدەن باستاپ وتىنىشتەردى قابىلدايتىن 1414 ءنومىرلى call ورتالىعى ىسكە قوسىلدى.
«تۇرعىنداردان قوڭىراۋلار تەگىن قابىلدانادى. بايلانىس ورتالىعىنا كەلىپ تۇسكەن پورتال جۇمىسىنا قاتىستى سۇراقتار مەن ۇسىنىستارعا ورتالىق مامانى وڭدەپ وعان جاۋاپ بەرەدى. جالپى بيىل الەۋمەتتىك قىزمەتتەر پورتالى ارقىلى 360 مىڭنان استام مۇگەدەكتىگى بار ادامدار قىزمەت الدى. ودان بولەك, جىل باسىنان بەرى 266 مىڭنان استام مۇگەدەكتىگى بار ادام اتالعان پورتال ارقىلى وڭالتۋدىڭ تەحنيكالىق قۇرالدارى, 6 مىڭنان استام ىمداۋ ءتىلى قىزمەتى, 33 مىڭنان استام جەكە كومەكشىنىڭ قىزمەتىن, 55 مىڭعا جۋىق جان شيپاجايدا ەم الدى. بۇگىندە پورتالدا ارناۋلى الەۋمەتتىك قىزمەت كورسەتەتىن 795 مەديتسينالىق-الەۋمەتتىك مەكەمە تىركەلگەن», دەيدى اتالعان ۆەدومستۆودان.
