ددۇ باسشىسى COVID-19-دىڭ جاڭا شتامدارى سالدارىنان كوپ ادام اۋىرىپ جاتقانىن جانە اۋرۋحاناعا جاتقىزۋ, ءولىم-ءجىتىم سانى دا ارتىپ جاتقانىن مالىمدەدى. سونىمەن قاتار فرانتسيا, ۇلىبريتانيا, دانيا, يتاليا, يسپانيا, پورتۋگاليا, گرەكيا, كيپر, يتاليا, مالتا, اقش, بوليۆيا, اۋستراليادا كەيىنگى كۇندەرى اۋىرعاندار سانى ارتقان.
«دەلتا» مەن «وميكرون» قازىر ەكى ەسە قاۋىپ توندىرەدى. جۇقتىرعاندار سانى ارتۋىنا, اۋرۋحاناعا جاتقىزۋ قاۋپىنە, ءولىمنىڭ كۇرت ارتۋىنا اكەلەدى. «وميكرون» ءترانسميسسيۆتى سيپات الىپ, دەلتامەن ءبىر ۋاقىتتا تارالۋى جاعدايدى ۋشىقتىرا ما دەپ قاتتى الاڭدايمىن», دەدى ددۇ باسشىسى Twitter-دە وتكەن بريفينگتە.
ددۇ باسشىسىنىڭ ايتۋىنشا, كوروناۆيرۋس ينفەكتسياسىن جەڭۋ ءۇشىن دەنساۋلىق ساقتاۋ سالاسىنداعى تەڭسىزدىكتى جويۋ قاجەت.
«بۇل بۇكىل الەمدەگى دەنساۋلىق ساقتاۋ جۇيەلەرىنە قىسىم كورسەتۋى مۇمكىن. سوندىقتان ءبىز باي ەلدەر مەن وندىرۋشىلەردىڭ كوشباسشىلارىن بولىپ جاتقان جايلاردان ساباق الىپ, ءار ەل تۇرعىندارىنىڭ 70 پايىزىن ۆاكتسينالاۋ ءۇشىن بىرگە جۇمىس ىستەۋگە شاقىرامىز», دەپ تۇيىندەدى ول.
ددۇ ەسەبىنە سايكەس, ءبىر اپتا ىشىندە ەۋروپادا COVID-19 ينفەكتسياسىنىڭ جاڭا جاعدايلارى 57 پايىزعا, امەريكادا 30 پايىزعا ارتقان. قازىر الەمدە كۇن سايىن 900 مىڭعا جۋىق جاڭا جاعداي تىركەلەدى.
