– 1997 جىلى ەكراندالعان «ۆرەميا تانتسورا» دراماسىنداعى كاتيا بەينەسى چۋلپان حاماتوۆانى كەز كەلگەن جانردا دا توسىلىپ قالمايتىن اكتريسا رەتىندە تانىتتى, كينو يندۋسترياسىنداعى جۇلدىزدى توپتىڭ قاتارىنا قوستى: 15 جىل بۇرىن, 30 جاسىڭىزدا شىعارماشىلىعىڭىزدىڭ شىرقاۋ شەگىندە ء«ومىر سىيلا» قايىرىمدىلىق قورىن اشۋعا شەشىم قابىلدادىڭىز. بۇل شەشىمىڭىزدى كەيبىر ارىپتەسىڭىز رۋحاني كەمەلدەنۋدىڭ باسى دەپ قابىلدادى.
– مەن بۇل سالادا جالعىز ەمەسپىن. كونستانتين حابەنسكي, ەۆگەني ميرونوۆتىڭ قايىرىمدىلىق قورلارى بار. سوڭعى كەزدەرى سۋرەتشىلەر دە وسى باعىتقا دەن قويا باستادى.
ء«ومىر سىيلا» – ونكوگەماتولوگيالىق دەرتكە شالدىققان بالالارعا قارجىلاي كومەك بەرۋ ءۇشىن قۇرىلعان قور. مەملەكەتتىڭ مۇمكىندىگى جەتە بەرمەيتىن كەڭىستىككە قايىرىمدىلىق قورلارىنىڭ قولى جەتەدى. مەن بۇل شەشىمگە ءسىز ايتىپ وتىرعانداي ساياسي مانساپ نەمەسە جاقسى اتتى بولىپ كورىنە بەرەيىن دەپ بارعان جوقپىن. كينو نەمەسە تەاتر الەمىندەگى «چۋلپان حاماتوۆا» دەگەن ءبىر اۋىز ءسوز قاجەت دەپ تاپقان كەزدە ليفت مىندەتىن اتقارۋعا جەتەر ەدى.
ءاربىر جاڭالىقتان, ءتىپتى ءاربىر شەشىمنەن «نە ءۇشىن؟» دەپ كۇدىكپەن قاراپ, استار ىزدەي بەرسەك, قوعام قالاي العا جىلجيدى؟ مەن بۇل شەشىمدى وزگەنىڭ قاسىرەتىنە بەي-جاي قاراي المايتىنىما, كومەك سۇراپ, قوڭىراۋ شالعان ءاربىر ازاماتقا «كورەمىز» دەپ جىلى جاۋىپ قويۋعا ءداتىمنىڭ جەتپەيتىندىگىن تۇسىنگەننەن كەيىن بارىپ قابىلدادىم.
– تانىمالدىلىق پەن قايىرىمدىلىقتىڭ ارا-جىگى تۋرالى ايتىپ بەرىڭىزشى. ەكەۋى ءبىر-بىرىنە كەدەرگى كەلتىرمەي مە؟
– وزىمە قاتىستى ايتايىن, تانىمالدىلىعىمدى ء«ومىر سىيلا» قايىرىمدىلىق قورىنا كومەك كورسەتۋدىڭ مۇمكىندىگى دەپ قابىلدايمىن. بىراق تانىمالدىلىقتىڭ دا مۇمكىندىگى شەكتەۋلى. باق پەن سوردىڭ اراسى ءبىر-اق قادام.
– سىرت كوزگە اشىلا بەرمەيسىز. جۋرناليستەرمەن دە سيرەك كەزدەسەدى ەكەنسىز. قوعامدىق جۇمىس پەن شىعارماشىلىعىڭىزدى قاتار الىپ ءجۇرۋ جەكە ءومىرىڭىزدى, ەگوڭىزدى جۇتىپ قويماي ما؟ قاراپايىم ومىردە چۋلپان كىم؟ ونىڭ قاسىندا كىم بار؟
– اياۋلى جاننىڭ پەرزەنتىمىن, انامىن, ءوزىم سۇيگەن جاننىڭ سۇيىكتىسىمىن.
ءسىز ەسكە سالىپ وتىرعان مىندەتتەرىمدى ءبىر-بىرىنەن ءبولىپ جارىپ نەمەسە ءبىرىنشى كەزەككە شىعارىپ جىبەرۋگە تىرىسىپ كورمەپپىن. ءومىرىمدى بەلگىلى ءبىر تارتىپكە باعىندىرۋعا دا, جوسپارلاۋعا دا تىرىسىپ كورمەپپىن. ءبارى ساتىمەن كەلىپ جاتقان دۇنيە.
مەن ءۇشىن وتباسىم, تەاتر, كينو, مەن باسقارىپ وتىرعان قايىرىمدىلىق قورى وربيتانى شىر اينالىپ جۇرەتىن, كۇننەن قۋات الاتىن پلانەتا ءتارىزدى. ماتەماتيكا تىلىمەن ايشىقتاسام, قايىرىمدىلىق قورىنا ۋاقىتىمنىڭ 90 پايىزىن, ەرتەڭ قوياتىن سپەكتاكلىمە 150 پايىزىن جۇمسايمىن. بۇل ولشەمدەردىڭ ءبىر ساعاتتان كەيىن وزگەرىپ شىعۋى دا ابدەن مۇمكىن. ەشكىمنىڭ باسا-كوكتەپ كىرۋىنە جول بەرمەيتىن كەڭىستىكتە مەنىمەن ءبىر ءومىردى ءسۇرىپ جاتقان انام, پەرزەنتىم جانە سۇيگەنىم قيىن جاعدايعا تاپ بولسا, سوڭعى ەكى مىندەتىمنىڭ ءبارىن ۇمىتىپ, قاسىنان تابىلاتىنىم انىق.
– ءسىزدىڭ كەڭىستىگىڭىزدە سىزبەن بىرگە ءومىر ءسۇرىپ جاتقان ادامداردىڭ ءسىزدى تولىق ءتۇسىنىپ, قولدايتىنىنا سەنىمدىسىز بە؟
– ولار مەنى تولىق قولداپ, تۇسىنۋگە مىندەتتى ەمەس. ءتىپتى ىشتەن شىققان پەرزەنتىڭنىڭ دە سەنى 100 پايىز ءتۇسىنۋى مۇمكىن ەمەس. مەن جاقىندارىمنان قولداۋ ەمەس, مەنى اياعانىن, باسىما قيىنشىلىق تۇسسە, قاسىمنان تابىلعانىن قالايمىن. سەبەبى ءسىز ءتارىزدى جۋرناليستەر مەنىڭ بەينەمنەن وتقا سالسا جانبايتىن, سۋعا سالسا باتپايتىن تەرميناتور بەينەسىن قالىپتاستىرىپ الدى. بىراق مەن نازىك جاندى, بىرەۋگە ەركەلەگىسى كەلەتىن, بىرەۋدى ەركەلەتەتىن ايەلمىن. مەن سياقتى ايەلدىڭ جارى بولۋ, اناسى مەن پەرزەنتى بولۋ وتە قيىن ەكەنىن تۇسىنگەنمىن. ولار دا مۇنى تۇسىنەدى...
– چۋلپان, رەسەي كينويندۋسترياسى سياقتى قازاق كينويندۋسترياسى دا تاريحتان تىرەك ىزدەۋگە باعىت الدى. قازاق كينوسى تۋرالى نە ايتاسىز.
– حالىقتىڭ قاجەتتىلىگىمەن ساناسقان كينونىڭ ءومىرى ۇزاق. قازىر تەك قازاقتاردا عانا ەمەس, كەشەگى كسرو ەلدەرىندە بۇل باعىت باسىمدىققا يە بولا باستادى. رەسەي بۇل كەزەڭدى باستان كەشتى. كينونىڭ وزەگىنە اينالعان تاقىرىپتار ءارتاراپتانىپ, سالماقتانا باستاعانىن سەزىپ جۇرگەن شىعارسىز. يدەيانىڭ پسيحولوگيالىق استارىن اشۋعا تالپىنىس بار. مەن مۇنى قولدايمىن.
– قازاق رەجيسسەرى ساتىبالدى نارىمبەتوۆ ءبىر سۇحباتىندا مۇستافا شوقاي فيلمىندەگى باس كەيىپكەر ماريا گورينانىڭ رولىنە ءسىزدى شاقىرعىسى كەلگەنىن ايتقان ەدى.
– راس, ونداي ۇسىنىس بولدى. بىراق ۋاقىتىمنىڭ, جۇمىس كەستەسىنىڭ تىعىزدىعىنان كەلىسىم بەرە المادىم. مۇستافا شوقاي تۇلعاسى قازاقتار ءۇشىن تاريحي-تاعدىرلى تۇلعا ەكەنىن بىلەمىن. ساياساتتا دا, ومىردە دە حالىقتىڭ قالاۋىنان شىققان قايراتكەرلەردىڭ سوڭىندا مىقتى, اقىلدى ايەل تۇرادى. ماريا گورينا دا قايراتكەرگە لايىق ايەل. ماعان ونى سومداۋ ءۇشىن ونىڭ تاعدىرىنا تەرەڭ بويلاۋىم كەرەك, قابىلداۋىم كەرەك. بۇل ءۇشىن ۋاقىت كەرەك. مەنىڭشە, كارينا ابدۋللينا ماريانى جاقسى سومداپ شىقتى.
– سوڭعى بىرەر جىلدا رەسەي كينويندۋسترياسى ورىس ادەبيەتىن ەكرانداۋعا دەن قويا باستادى. رەجيسسەر ەگور اناشكين جازۋشى گۇزەل ياحينانىڭ «زۋلەيحا وتكرىۆاەت گلازا», كيريلل سەرەبرەننيكوۆ اندرەي سالنيكوۆتىڭ «پەتروۆى ۆ گريپپە» شىعارماسىن ەكراندادى. ەكەۋىندە دە ءسىز باستى كەيىپكەر بولدىڭىز.
– قازىرگى كوركەم ادەبيەتتىڭ ەكراندالۋى كۇردەلى پروتسەسس. ونىڭ جاۋاپكەرشىلىگى اۋىر. سەبەبى ءاربىر كىتاپتىڭ ءوزىنىڭ كينوسى, ءوزىنىڭ باتىرلارى بار. ءاربىر وقىرمان ونى ءارتۇرلى فورمادا ءوزى جاساپ الادى. سودان سوڭ جازۋشىنىڭ يدەياسى, رەجيسسەردىڭ قولتاڭباسى دەگەن تاعى بار. پەتروۆتاردى تۇسىرەر الدىندا كيريلل مەنىڭ ءتۇسىرىلىم بارىسىندا وزگەرىستەر ەنگىزۋ, كەيىپكەردى ءوزىمنىڭ بولمىسىما قاراپ بەيىمدەۋ تۋرالى ۇسىنىستارىما كەلىسپەيتىنىن بىردەن ايتتى. ناتيجەسىندە, ءوزىمدى ۇمىتىپ, كەيىپكەرلەرىمنىڭ كەڭىستىگىنە كىرۋدەن وزگە جول بولمادى.
دەگەنمەن, كەلىسىم بەردىم, ءساتتى شىعۋىنا بارلىق مۇمكىندىگىمدى جۇمىلدىردىم. ازىرگە كورەرمەننىڭ پىكىرى وڭ... كەيىپكەرلەردى ويناۋ بارىسىندا ءوز كەمشىلىگىمدى ءوزىم بىلەمىن. بۇل دا مەنىڭ كەڭىستىگىمنەن شىعارعىم كەلمەيتىن جەكە قۇپيام.
– «زۋلەيحا وتكرىۆاەت گلازا» سەريالىندا زۋلەيحا ۆالەەۆانىڭ رولىندە ەكرانعا شىقتىڭىز. وسى اتتاس كىتاپتىڭ اۆتورى, جازۋشى گۇزەل ياحينا جۋرناليستەرمەن كەزدەسكەن كەزدە باستى رولگە تەك قانا شولپان حاماتوۆانى كورگىسى كەلەتىنىن ايتىپتى.
– ءتۇسىرىلىم الدىندا جازۋشى گۇزەل ياحينانىڭ وسى اتتاس رومانىن وقىپ, بالالىق شاعىما ورالعانداي بولدىم. بۇل كىتاپتىڭ ماعان ەرەكشە اسەر ەتكەنىن, ۇلتتىق بولمىسىما اسەر ەتكەنىن ايتۋعا ءتيىسپىن. بالالىق شاعىمنىڭ وتە ەرتە كەزەڭدەرىندە سانامدى ساۋلەلەندىرىپ تۇرعان, مەنىمەن بىرگە تۋعان سەزىمدەرىمنىڭ كەيبىر بولشەكتەرىن جوعالتىپ الدىم, ولار مەنەن كەتىپ قالدى دەۋشى ەدىم. بۇل سەزىم ەشقايدا كەتپەپتى. كىتاپتىڭ سوڭعى بەتىن جاپقاندا جۇرەكتىڭ ءبىر قالتارىسىنان اتويلاپ شىعىپ, ەرتەگى كەيپىندە, جىپ-جىلى سالت-داستۇرلەر تۇرىندە ساناما قۇيىلىپ جاتقانداي اسەردە بولدىم. مەن ۇمىتتىم دەسەم دە جۇرەك ۇمىتپاپتى. مۇنىڭ ءبارى مەنىڭ ومىرىمدە بولعان ەكەن, تەك قانا سانامنىڭ ءبىر قالتارىسىندا ويانۋعا وڭتايلى ءساتتى كۇتىپتى. ولار وياندى.
كىتاپ وقۋعا دەن قويسام, ءوز ءومىرىمدى, ماعان جاقىن ادامداردى دا ۇمىتىپ, كىتاپتاعى كەيىپكەرلەرمەن بىرگە ءومىر ءسۇرىپ كەتەتىنىم بار. كىتاپتى وقىپ شىققان سوڭ تاتار ءتىلىن بىلمەگەنىم ءۇشىن وكىندىم.
بالالىق شاعىم كەڭەس وداعىنىڭ سوڭعى جىلدارىنا تۋرا كەلدى. ۇيدە دە, دالادا دا, مەكتەپتە تە ورىس تىلىندە سويلەدىك. مەن سومداعان كەيىپكەردىڭ ەگوسى باسقاشا. ول وزىنە تيەسىلىنى ەشكىمگە بەرگىسى كەلمەيدى. سونداي قاسيەت مەندە دە بار. كەيدە ءوز بولمىسىڭمەن وسىلايشا كەزدەيسوق تابىسادى ەكەنسىڭ. بۇل – تاعدىر.
– ءسىز قازان دالاسىندا تۋىپ ءوستىڭىز. ماسكەۋدە ازامات, تۇلعا بولىپ قابىلداڭىز. ءوزىڭىزدى شەتەلدىك ازامات رەتىندە سەزىنەسىز بە؟
– ءوزىمدى ەشقاشان شەتەلدىك نەمەسە «بوتەن» دەپ ەسەپتەگەن ەمەسپىن. 17 جاستان بەرگى ءومىرىم وسىندا ءوتىپ كەلە جاتىر. بىزدە مۋلتيمادەنيەت باسىم. ەۆرەيلەر, گرۋزيندەر ءوزىنىڭ تىم بولماعاندا قوناق كۇتۋ, اس دايىنداۋ ادەبىمەن ەرەكشەلەنەدى, ءبىر-ءبىرىنىڭ سالت-داستۇرىنە قۇرمەتپەن قارايدى. مىسالى, تاتارلاردا گرۋزيندەر سياقتى تاعامدى دايىنداۋ مادەنيەتى وزگەشە. ەگەر ءبىر قوناق كەلسە دە 10 ادامعا لايىقتاپ داستارقان جايىلماسا, ءۇي يەسى ءۇشىن ءسوز باسقاشا بولادى. كەيدە ۇيگە الدىن-الا كۇتپەگەن قوناق كەلىپ قالسا دا داستارقانداعى اس مازىرىنە كوڭىلىم تولماي قارادان قاراپ وتىرىپ قىسىلامىن. بۇل اتا-انامنان جۇققان ادەت. ءبارىبىر كەز-كەلگەن تۇلعادا شىققان تەگىن تانىتىپ تۇراتىن ءبىر بەلگى قالادى ەكەن. مەندەگى بەلگى وسى.
دەگەنمەن, مەن ماسكەۋلىكتەردىڭ قوناق كۇتۋ داستۇرىنە بەيىمدەلىپ قالدىم. ال اكەم, ماسكەۋدەگى پاتەرىمە كەلگەن كەزدە توڭازىتقىشىمدى اشىپ «جەيتىن ەشتەڭە جوق» دەيدى. جاڭا جىل قارساڭىندا قوناققا كەلگەندە قوناقتاردى ءبىرىنشى جانە ەكىنشى تاماقپەن شىعارىپ سالاتىنىمدى قابىلداي المايدى...
– ءاربىر جەكە تۇلعانىڭ ءون بويىندا التىن ارقاۋداي ەسىلىپ تۇراتىن مادەني-رۋحاني كودى بولادى, كەيدە ول ۇلتتىقتان دا جوعارى تۇرادى دەيدى. ءسىز بۇل تۋرالى نە دەيسىز؟ ءسىزدىڭ رۋحاني كودىڭىز نەدەن قۋات الىپ تۇر.
– XIX- XX عاسىرداعى ورىس ادەبيەتى وكىلدەرىنىڭ ىشىندە مارينا تسۆەتاەۆانىڭ پروزاسى, پوەزياسى جاقىن. پاستەرناك پەن تسۆەتاەۆا حاماتوۆاعا كۇش بەرىپ تۇرعان نەگىز دەۋگە بولادى. بۋلگاكوۆ, حارمس, ۆۆەدەنسكي, زابولوتسكي, احماتوۆا مەن گۋميلەۆتەردىڭ شىعارمالارى جانىما جاقىن.
– ءسىز كەيىپكەرلەرىڭىزدى قالاي تاڭدايسىز؟
– مەن بۇل جاعىنان پروبلەمالى توپقا جاتامىن. كەيدە جاقىن دوستارىم وسى مىنەزىم ءۇشىن ۇرسىپ, رەنجىپ جۇرەدى. كەيىپكەردى تاڭداۋ – ستسەناريدى وقۋدان باستالادى. مەن ءۇشىن كينونىڭ ستراتەگياسى ەمەس, ماعان ۇسىنىلعان كەيىپكەردى جۇرەگىمنىڭ قابىلداعانى ماڭىزدى. جۇرەگىڭ قابىلداماعان كەيىپكەردى كورەرمەن قالاي قابىلدايدى...
– رەسەيلىك كينورەجيسسەر كيريلل سەرەبرەننيكوۆتىڭ «پەتروۆى ۆ گريپپە دوسەلمىندە» ءسىز سومداعان كەيىپكەر – پەتروۆا حانىم كوپ قىرلى بولىپ كورىندى. باتىل ءھام قورقىنىشتى كەيىپكەردى ءتۇسىنۋ كورەرمەنگە جەڭىل بولماعان ءتارىزدى. كينونى سان قايتارا كورسەم دە پەتروۆانىڭ بولمىسىن بويىما سىڭىرە المادىم. ال بۇل كەيىپكەردى ءسىز قالاي قابىلدادىڭىز؟
– مەن ءۇشىن ۇلكەن-كىشى نەمەسە سۇيكىمدى نەمەسە سۇيكىمسىز ءرول جوق. ەڭ باستىسى, سونىڭا تابيعاتىڭا ءوزىڭدى بەيىمدەۋ. بۇل مەنىڭ قولىمنان كەلەتىن سياقتى.
كەيىپكەردى قابىلداۋ – رەجيسسەردىڭ ۇسىنىسىن قابىلداعان كۇننەن باستالادى. پەتروۆانى ويناۋعا دايىندىقتى مانياك, كىسى ولتىرگىشتەر تۋرالى ءوزىم بىلەتىن كينولاردى قايتا كورىپ شىقتىم. كەيىپكەرىم كۇردەلى تۇلعا بولعاندىقتان ءومىرىن وزگەرتۋگە سەبەپكەر بولعان پسيحولوگيالىق فاكتورلاردى ءتۇسىنۋىم كەرەك.
راس, كورەرمەن كينوداعى «جاڭا بولمىسىمدى» بىردەن قابىلدامادى. «چۋلپانعا نە بولعان, ول مەيىرىمدى «دوكتور ليزا» ەمەس پە ەدى؟» دەگەن پىكىرلەر ايتىلىپ قالدى.
قازىر ءتۇسىرىلىمنىڭ اياقتالىپ, مونتاجدالعانىنا 1,5 جىل ءوتتى. كيريلل ەكەۋمىزدىڭ ونىڭ يدەياسى, ءتىپتى كينوداعى ءتۇرلى-ءتۇستى گامما تۋرالى تۇسىنىگىمىز ەكى ءتۇرلى. بىراق بۇل ونىڭ سوڭعى نۇكتەسىنىڭ ءساتتى قويىلۋىنا كەدەرگى كەلتىرگەن جوق. مىسالى, مەن اندرەي سالنيكوۆتىڭ وسى كىتابىن وقىپ شىققان كەزدە ونىڭ كۇنگەي جاعىنا عانا نازار اۋداردىم. ال كيريلل ونىڭ يدەياسىن رەسەيدىڭ 1990 جىلداردان بەرگى تاريحىنىڭ ءبىر بولشەگى دەپ قابىلدادى.
– فيلم اندرەي سالنيكوۆتىڭ «پەتروۆى ۆ گريپپە ي ۆوكرۋگ نەگو» دەپ اتالاتىن كىتابى بويىنشا جازىلدى. وقيعا جەلىسى – تۇماۋ, كارانتين... پاندەميانى العاش رەت تۇيسىكپەن سەزگەن, سونى اشىپ ايتقانداي اسەر قالدىردى.
– سالنيكوۆتاعى تۇماۋ دەيسىز بە؟ بۇل تاقىرىپتى ءارى قاراي تەرەڭدەتۋدى كينوسىنشىلاردىڭ ەنشىسىنە قالدىرايىقشى. پەتروۆتاردىڭ وتباسى – قاراپايىم. وتاعاسى – اۆتوسلەسار, وتاناسى – كىتاپحاناشى. مەكتەپتە وقيتىن ۇلدارىمەن بىرگە تۇرادى. سىرت كوزگە قالىپتى جاعدايدان اۋىتقىمايتىن وتباسىنىڭ ءومىرىن تۇماۋ دەرتى مۇلدەم باسقا ارناعا بۇرىپ, فانتاستيكا, سيۋررەاليزممەن بەتپە-بەت قالادى. كەيىپكەر ونىڭ قايسىسىنىڭ ءتۇس, ەستەلىك نەمەسە شىندىق ەكەنىن اجىراتىپ الۋدى كورەرمەننىڭ ەنشىسىنە الدىرادى.
مەنىڭ بۇل كينو تالعامى جوعارى كورەرمەنگە ارنالعان دەۋىمنىڭ سەبەبى وسى.
– جالپى, بۇل كينو جانرى جاعىنان مەتافورالىق فيلمدەرگە كوبىرەك ۇقسايدى ەكەن.
– ءداپ سولاي. ونداعى ءاربىر كورىنىستىڭ استارىنان جاڭا يدەيالار تۋىنداپ جاتادى. مەن ءفيلمدى ەكى رەت كوردىم, ەكىنشى رەت سوڭعى كادرلاردا جۇگىرىپ جۇرگەن ءمايىتتى سومدايتىن حاسكيدىڭ شىندىقتىڭ ءابسوليۋتتى سيمۆولىنا اينالعانىن ءتۇسىندىم.
جالپى, كۇردەلى ماسەلەنى كورسەتكىسى كەلگەن سۋرەتكەر ودان شىعاتىن جولدى دا كورسەتۋ كەرەك. ءتىپتى اشىق كورسەتە الماسا دا ونىڭ يدەياسى الداعى جاڭا تۋىندىلاردىڭ وزەگىنە اينالۋى ءتيىس. ال شىعارماشىلىق ادامدارى ءوزى ءومىر ءسۇرىپ جاتقان ورتانىڭ اتموسفەراسىنا بەي-جاي قاراي المايدى.
– ءسىز جاسىراق كۇنىڭىزدە جاننا د’ارك ءرولىن ويناۋدى ارماندايتىنىڭىزدى ايتىپسىز. كەيىن ونىڭ قىزىقسىز ەكەنىن ايتىپ, ارمانىڭىزدان وپ-وڭاي باس تارتىپسىز. قايىرىمدىلىق قورىن اشۋدى دا جاس كەزدەن ارماندادىڭىز با؟
– راس, جاس كۇنىمدە جاننا د’اركتى ويناۋدى ارماندادىم. ءسىز بەن ءبىزدىڭ بالالىق شاعىمىز كسرو-نىڭ سوڭعى جىلدارىنا تۋرا كەلدى. سول كەزەڭدە ونىڭ تۇلعاسىنا كۋمير رەتىندە قاراماعان جاستار از بولدى. ونىڭ بەينەسى – قىزىقتى, تاعدىرلى بەينە. بىراق ونىڭ تۇلعاسى زامان, ساياسات وزگەرگەن سايىن جاڭارىپ, اۋىسىپ وتىرادى. بۇل ەندى قوعامنىڭ كوزقاراسىنا دا بايلانىستى.
ال قايىرىمدىلىق تۋرالى ارمانداعان كەزىم ەسىمدە جوق. مەن بۇل ماقساتىمدى ورىنداۋعا سانالى تۇردە كىرىستىم. قور ارقىلى كەيبىرەۋلەردىڭ ورىندالماي قالعان, ءتىپتى وزىمەن بىرگە كەتەتىندەي كورىنەتىن ارمانىن كوزى تىرىسىندە ورىنداعىم كەلدى. قايىرىمدىلىق قورى ارقىلى ءبارىن تۇزەتۋگە بولادى دەگەن كوزقاراس تا ەسكىرىپ بارادى. ءبىزدىڭ زامانىمىز مۇلدەم جاڭا زامان. مۇنداي ءولىارا كەزدى تەك ءبىزدىڭ تولقىن عانا باستان كەشۋى مۇمكىن. سول سەبەپتى ءبىز تەك قانا SOS پروبلەمامەن عانا اينالىسامىز. ءبىز بالالار ونكولوگياسىنا, ونى ەمدەۋگە قاتىستى جۇيەنى وزگەرتە المايمىز. قاتەرلى ىسىكتى باستاپقى كەزىندە ەمدەيتىن دارىلەردى ساتىپ الۋ ءۇشىن قارجى كوزىن ىزدەيمىز. ون بەس جىل بۇرىن جاعداي وسىنداي ەدى, ءالى وزگەرگەن جوق.
– بالالار ونكولوگياسى پروبلەماسىمەن اينالىسۋ شىعارماشىلىعىڭىزعا قالاي اسەر ەتەدى؟ سەبەبى بۇل ورتا كۇنگەيى مەن كولەڭكەسى قاتار جۇرەتىن ورتا ەمەس پە؟
– بۇل ماسەلەگە پەسسيميستىك كوزقاراسپەن قاراۋعا بولمايدى.ءتىپتى قايعىرۋدىڭ قاجەتى جوق. اۋىر دەرتتى جەڭىپ شىققان بالالاردى, ولاردىڭ اتا-اناسىنىڭ قۋانعان ءساتىن كورۋدىڭ ءوزى ءبىر باقىت. ءتىپتى و دۇنيەلىك بولعاندارى دا سوڭعى دەمى ۇزىلگەنشە ءومىرىن ساقتاپ قالۋ ءۇشىن قولدان كەلگەن مۇمكىندىكتىڭ ءبارى جاسالعانىن ءبىلىپ كەتكەنىن سەزىنۋدىڭ ءوزى قۋانىش. ادامنىڭ ساناسى قايعىنى ەمەس, قۋانىشتى ساتتەردىڭ ساقتالىپ قالعانىن قۇپ كورەدى ەكەن. مەن ءتىپتى دەرتتى جەڭە الماي كەتكەن بالالاردىڭ دا كوڭىلدى ساتتەرىن جيىرەك ويلاۋعا تىرىسامىن.
مەن ءوزىمدى وتە باقىتتى اداممىن دەپ ويلايمىن. ومىرىمدە, دوستارىمنىڭ ورتاسىندا, شىعارماشىلىعىمدا جانە وتباسىمدا ەشكىمگە كەرەك بولماي قالعان ساتتەردى سەزىندىرمەگەنى ءۇشىن تاعدىرىما ريزامىن.
– اڭگىمەڭىزگە راحمەت.
اڭگىمەلەسكەن
گۇلبارشىن ايتجانبايقىزى,
«ەgemen Qazaqstan»
الماتى
