پرەزيدەنتكە مينيسترلىكتىڭ بيىلعى اتقارعان جۇمىستارىنىڭ قورىتىندىلارى جانە جولداۋدا ايتىلعان ماسەلەلەردىڭ جۇزەگە اسىرىلۋ بارىسى تۋرالى ەسەپ بەرىلدى. اتاپ ايتقاندا, جاڭا جىلدان باستاپ تومەنگى جالاقى دەڭگەيى 60 مىڭ تەڭگەگە دەيىن جەتكەنى جانە تاعى 591 مىڭ ازاماتتىق قىزمەتكەردىڭ جالاقىسى وسەتىنى جونىندە ايتىلدى.
سونىمەن قاتار مينيستر جۇمىسسىزدىقپەن كۇرەس باعىتىنا دا توقتالدى. قازىرگى ۋاقىتتا جۇمىسسىزدىق دەڭگەيى 4,9 پايىزدى قۇراپ وتىر. سەرىك شاپكەنوۆ جۇمىسپەن قامتۋ ورتالىقتارىن تسيفرلاندىرۋ بويىنشا مالىمەت بەردى. ونىڭ ايتۋىنشا, جۇمىس ىزدەگەن ازاماتتاردىڭ 33 پايىزى ونلاين قىزمەت ءتۇرىن پايدالانعان, 26 مىڭ جاردەماقى ەلەكتروندى تۇردە راسىمدەلگەن.
سونداي-اق بيىل 988,8 مىڭ ادام اتاۋلى الەۋمەتتىك كومەك العان. بۇدان بولەك مەملەكەت باسشىسىنا مينيسترلىكتىڭ الداعى ۋاقىتتا اتقاراتىن جۇمىستارى تۋرالى باياندالدى. سونىڭ ىشىندە سەرىك شاپكەنوۆ الەۋمەتتىك كودەكس ازىرلەۋ, زەينەتاقى جۇيەسىن جاڭعىرتۋ, كاسىبي بىلىكتىلىكتى ارتتىرۋ تۋرالى زاڭ جوباسىن جانە 2022-2026 جىلدارعا ارنالعان كوشى-قون ساياساتى تۇجىرىمداماسىنىڭ جوباسىن دايىنداۋ سياقتى نەگىزگى ءتورت باعىتتى اتاپ ءوتتى.
قاسىم-جومارت توقاەۆ مينيسترگە وسى باعىتتاعى جۇمىستاردى جۇيەلى تۇردە جالعاستىرۋدى تاپسىردى.
