سالتاناتتى شارانىڭ مودەراتورى, جۋرناليستيكا فاكۋلتەتىنىڭ دەكانى سانسىزباي ماديەۆ ەڭبەك جولىن قاتارداعى تىلشىلىكتەن باستاپ, جوعارى لاۋازىمدى جاۋاپتى قىزمەتتەرگە دەيىن اتقارعان نۇرتىلەۋ يمانعالي ۇلىنىڭ شىعارماشىلىق جولىنان سىر شەرتەتىن فوتوكورمەمەن تانىستىرىپ, ءومىر تاريحىنىڭ كەزەڭدەرى تۋرالى باياندادى.
العاشقى ءسوز تىزگىنىن العان اقپارات جانە قوعامدىق دامۋ ءمينيسترى ا.بالاەۆا بۇل ۇيىمداستىرىلعان شارانىڭ ەڭ الدىمەن, ءوزى باقيلىق بولسا دا, سوڭىندا ۇلگى بولاتىن ءىسى قالعان جۋرناليستيكا ساردارىنىڭ رۋحىنا قۇرمەت كورسەتۋ ەكەنىن ەرەكشە اتاپ ءوتتى. ەكىنشىدەن, ءباسپاسوز جۇيرىگىنىڭ ەسىمى بەرىلگەن بۇل اۋديتوريانىڭ ستۋدەنتتەر ءۇشىن دە ماڭىزى زور ەكەنىنە توقتالدى. وسىندا ءبىلىم الاتىن ءاربىر ستۋدەنتتىڭ جۋرناليست اعالارىنىڭ ەسىمىن كىرلەتپەي, لايىقتى دەڭگەيدە وقيتىنىنا سەنىم ءبىلدىردى. «نۇرتىلەۋ يمانعالي ۇلى عۇمىرىنىڭ 35 جىلىن تەلەۆيزياعا ارناپ, ءتۇرلى باعدارلامالار اياسىندا 4000-نان ارتىق حابار جۇرگىزگەن تىنىمسىز تۇلعا بولدى. ول تەك ساۋاتتى تەلەجۇرگىزۋشى عانا بولعان جوق, قازاق تەلەۆيزياسىندا وزىندىك مەكتەپ قالىپتاستىرا ءبىلدى. وزىنە قاراپ بوي تۇزەگەن جاس جۋرناليستەر قاتارىنان قانشاما بۋىن شاكىرت تاربيەلەدى. ءومىرىنىڭ سوڭىنا دەيىن جۋرناليستيكاعا ادال قىزمەت ەتتى. ءتۇرلى حابارلارعا قاتىسىپ, وي-پىكىرىن ءبىلدىرىپ ءجۇردى. ءوز كاسىبىنە دەگەن ادالدىق, جۋرناليستيكاعا دەگەن قۇرمەت وسىلاي كورىنەدى» دەدى ايدا بالاەۆا.
قازۇۋ رەكتورى ج.تۇيمەباەۆ تا تەرەڭ بىلىمىمەن, ىزدەنىمپازدىعىمەن بيىك بەلەستەردى باعىندىرعان مايتالمان ءجۋرناليستىڭ كاسىبي قىرى مەن ادامگەرشىلىك تۇلعاسى تۋرالى كەڭىنەن اڭگىمەلەدى. «نۇرتىلەۋ يمانعالي ۇلىن قازاقستاندا بىلمەيتىن, تانىمايتىن ادام جوق. «باي-قۋاتتى بولايىق!» دەگەن قاناتتى ءسوزدىڭ اۆتورى سانالى عۇمىرىنىڭ جارتى عاسىرىن تەلەۆيزياعا ارنادى. ناعىز جۋرناليست قايدا جۇرسە دە, قولىنان قالامى تۇسپەيتىن, جاڭالىقتىڭ جارشىسى, حالىق پەن بيلىكتىڭ اراسىنداعى التىن كوپىر. ەل مەن جەر, مەملەكەت پەن ۇلت دەگەندە جان اياماي ەڭبەك ەتكەن نۇرتىلەۋ يمانعالي ۇلىنىڭ عيبراتتى عۇمىرى سونىڭ ناقتى دالەلى. ۋنيۆەرسيتەتىمىزدەگى «Qazaqstan» ۇلتتىق ارناسىنىڭ وقۋ زەرتحاناسى ەندى نۇرتىلەۋ يمانعالي ۇلىنىڭ ارداقتى ەسىمىمەن اتالىپ, تەلەجۋرناليستيكاعا قانات قاققان شاكىرتتەردىڭ ۇستاحاناسى بولاتىنىنا سەنەمىن» دەدى ۋنيۆەرسيتەت رەكتورى ج.تۇيمەباەۆ.
كەڭ ءارى جارىق, بولاشاق تەلەجۋرناليستەردى ازىرلەۋگە كەرەكتى قۇرالدارمەن جابدىقتالعان اۋديتوريادا «نۇرتىلەۋ يمانعالي ۇلى دەگەن كىم؟ ونىڭ ۇلت رۋحانياتى الدىندا قانداي ەڭبەگى بار؟» دەگەن سۇراققا تولىقتاي جاۋاپ بەرەتىن مالىمەتتەر مولىنان جيناقتالعان.
«Qazaqstan» ۇلتتىق ارناسىنىڭ اتىنان الماتى بولىمشەسىنىڭ جەتەكشىسى, بەلگىلى جۋرناليست ساۋلە جيرەنشينا ن.يمانعالي ۇلىنىڭ ءوز اۆتورلىق باعدارلامالارىندا پايدالانعان قامشىسى مەن اسىقتارىن زەرتحاناعا تابىس ەتتى. «TV – مەنىڭ بۇكىل عۇمىرىم, تىرشىلىگىمنىڭ باستاۋ-بۇلاعى, تاعدىرىمنىڭ تۇمارى, بىردە شايقالعان, ەندى بىردە شالقايعان كوڭىلىمنىڭ سىڭارى, قىراعى, ءومىرىمنىڭ شىراعى» دەگەن نۇرتىلەۋ يمانعالي ۇلى تۋرالى بىرگە قىزمەت ىستەپ, ومىردەگى ساۋلەلى ساتتەرىن بىرگە بولىسكەن ارىپتەس زامانداستارى, جارى قارلىعاش سوۆەتبەكقىزى, بەلگىلى باق وكىلدەرى, ۋنيۆەرسيتەت ۇستازدارى مەن ستۋدەنتتەردىڭ ەستەلىگى, نەگىزىنەن, ءبىر ارناعا توعىسىپ, ءوز كاسىبىن جاۋاپكەرشىلىكپەن ءمىنسىز اتقارعان بىلىكتى تۇلعانى سۇيسىنە دە, ساعىنا دا ەسكە الدى.
