مازمۇندى ءىس-شارادا العاشقى ءسوزدى العان اتالعان جوعارى وقۋ ورنىنىڭ رەكتورى, اكادەميك ەرلان سىدىقوۆ اباي اتامىزدىڭ اسىل مۇراسى مەن ونەگەلى ءومىرى تۋرالى پاراساتتى وي قوزعاپ, قازىرگى قازاقستان قوعامىن اقىننىڭ رۋحاني ۇستانىمىنا ساي دامىتۋ اسا ماڭىزدى ەكەنىن اتاپ ءوتتى.
− مەملەكەت باسشىسىنىڭ تىكەلەي تاپسىرماسىمەن اشىلعان «اباي اكادەمياسى» عىلىمي-زەرتتەۋ ينستيتۋتىنىڭ نەگىزگى قىزمەتىنىڭ ءبىرى – اباي مۇراسىمەن قازاقستاندىق قوعامدى جاڭعىرتۋ باسىمدىقتارى جانە اقىن شىعارماشىلىعىن بۇگىنگى قوعامنىڭ دامۋىمەن ساباقتاستىقتا قاراستىرۋ, − دەي كەلىپ, ەل پرەزيدەنتىنىڭ «اباي جانە ءححى عاسىرداعى قازاقستان» جانە «اباي – رۋحاني رەفورماتور» باعدارلامالىق ماقالالارىنا سايكەس «اباي – مەملەكەت ءىسىنىڭ مۇددەلەسى, جاڭا قوعامنىڭ جاناشىرى», «اباي – ۇلتتىق بولمىستىڭ ۇلگىسى», «اباي – الەمدىك مادەنيەت تۇلعاسى» باعىتتارى بويىنشا تالدامالىق, ساۋالدامالىق زەرتتەۋلەر جۇرگىزىپ, ەلىمىزدەگى ابايتانۋمەن اينالىساتىن عىلىمي-زەرتتەۋ ورتالىقتارىن اكادەميانىڭ توڭىرەگىنە توپتاستىرۋ, عىلىمي تۇرعىدان ۇيلەستىرۋ ەكەنىن العا تارتتى.
جالپى, جيىندا اباي اكادەمياسىنىڭ جىل ىشىندە اتقارعان جۇمىستارى قورىتىندىلاندى. ماسەلەن, بيىل ۇلى تۇلعانىڭ مۇراسىن كەڭىنەن ناسيحاتتاۋ ماقساتىندا اكادەميا ءبىلىم جانە عىلىم مينيسترلىگى عىلىم كوميتەتىنىڭ تاپسىرىسى نەگىزىندە «اباي قۇنانباي ۇلىنىڭ مۇراسى قوعامدىق-گۋمانيتارلىق عىلىمدار اسپەكتىسىندە» جانە «قازىرگى قازاقستان جانە اباي قۇنانباي ۇلى» اتتى ەكى كەشەندى جوبانى ىسكە اسىرعان.
«اباي اكادەمياسى» عىلىمي-زەرتتەۋ ينستيتۋتىنىڭ ديرەكتورى, عالىم جاندوس اۋباكىر جىل ىشىندە اتقارىلعان جۇمىستارعا توقتالىپ ءوتتى.
− بيىل ينستيتۋتتىڭ نەگىزگى قىزمەت باعىتتارىن قازاقستاندىق قوعامدى جاڭعىرتۋ باسىمدىقتارىمەن قامتۋ اياسىندا «اباي مۇراسى جانە قازاقستاندىق قوعامنىڭ مادەني قۇندىلىقتارى», «ابايدىڭ شىعارماشىلىق مۇراسى جانە قازاق ءتىلىنىڭ ۇلتارالىق قارىم-قاتىناس ءتىلى رەتىندە قالىپتاسۋ جولدارى», «اباي دۇنيەتانىمى جانە قازىرگى قوعامداعى ءدىننىڭ ءرولى», «اباي شىعارماشىلىعى جانە قازىرگى قازاقستاننىڭ مادەنيەتارالىق ىنتىماقتاستىعى», «ابايدىڭ قوعامدىق-ساياسي كوزقاراستارى جانە «حالىق ۇنىنە قۇلاق اساتىن مەملەكەت» تۇجىرىمداماسى», «اباي مۇراسى كونتەكستىندە قازاقستاندىق ءپاتريوتيزمدى قالىپتاستىرۋ», «اباي شىعارماشىلىعى جانە قازاق ادەبيەتىنىڭ قالىپتاسۋى», «ابايدىڭ شىعارماشىلىق مۇراسىنىڭ تاريحي-ەتنوگرافيالىق كونتەكستى», «اباي ءتىلى جانە قازاق ءتىل ءبىلىمىنىڭ وزەكتى ماسەلەلەرى», «ابايدىڭ ەكونوميكالىق كوزقاراستارى جانە قازاق حالقىنىڭ شارۋاشىلىق قۇرىلىمى», «اباي مۇراسى جانە تۇركى الەمىنىڭ وركەنيەتتىك نەگىزدەرى» اتتى ارنايى سەريالارمەن 24 عىلىمي-تانىمدىق كىتاپ ازىرلەندى, − دەدى.
سونىمەن اتالعان ارنايى سەريامەن ە.سىدىقوۆ, ج.دادەباەۆ, ش.يبراەۆ, س.نەگيموۆ, ت.جۇرتباي, ت.شاپاي, ق.مادىباەۆا, س.انانەۆا, ج.ايمۇحامبەت, ا.كەمەلباي, گ.مۇراتوۆا, ا.دوعالوۆ, ى.پالتورە, ب.قورعانبەكوۆ, م.الپىسبەس, ق.بيبەكوۆ, ە.تىلەشوۆ, س.قوراباي, ا.كەڭشىلىك ۇلى, ق.باتتالوۆ, ءا.قايشاتاەۆا, ا.سماعۇلوۆا, ا.قاليەۆا سەكىلدى بەلگىلى ابايتانۋشىلار باستاعان عالىمداردىڭ, زەرتتەۋشىلەردىڭ زەردەلى ەڭبەكتەرى وقىرمانعا جول تارتىپ وتىر. سونداي-اق «اباي – الەمدىك مادەنيەتتىڭ تۇلعاسى» شەڭبەرىندە الىس-جاقىن شەتەلدەگى جانە رەسپۋبليكالىق باق-تا اباي مۇراسى قوعامدىق-گۋمانيتارلىق باعىتتا جاڭاشا پايىمدالعان تانىمدىق ماقالالار جاريالانعان.
ايتا كەتەيىك, بيىل ينستيتۋتتىڭ نەگىزگى قىزمەتى «اباي مۇراسى – تۇركى الەمىنىڭ مادەني كاپيتالى» اتتى باعىتىمەن تولىعىپ, سونىڭ اياسىندا حاكىم اتامىزدىڭ جالپىادامزاتتىق ماسەلەلەردى كوتەرگەن شىعارمالارىن 23 تۇركى تىلىنە اۋدارۋ جۇمىستارى جۇزەگە اسىپ, اقىن شىعارمالارىنىڭ تۇركى تىلىندەگى اۋدارماسى «اباي مۇراسى جانە تۇركى الەمىنىڭ وركەنيەتتىك نەگىزدەرى» اتتى سەريامەن ەكى تومدىق جيناق جارىققا شىققان.
