شاراعا ماڭعىستاۋ وبلىسىنىڭ اكىمى نۇرلان نوعاەۆ قاتىستى.
الدىمەن وبلىس اكىمى ءسوز سويلەپ, جيىنعا كەلگەن انەس تولەندى ۇلىنىڭ جۇبايى پروزايك, دراماتۋرگ, قوعام قايراتكەرى التىنشاش قايىرجانقىزى جاعانوۆا مەن قازاقستان جازۋشىلار وداعىنىڭ باسقارما توراعاسىنىڭ ورىنباسارى, قوعام قايراتكەرى قۇلكەنوۆ مەرەكە ابدەش ۇلىن تانىستىردى.
«بۇگىن ءبىز مەرەيتوي اياسىندا ۇيىمداستىرىلىپ وتىرعان ەلىمىزدىڭ ءتول پەرزەنتى, جازۋشى, دراماتۋرگ, قازاقستاننىڭ ەڭبەك سىڭىرگەن قايراتكەرى, قازاقستان رەسپۋبليكاسىنىڭ مەملەكەتتىك سىيلىعىنىڭ لاۋرەاتى, «بارىس» جانە «پاراسات» وردەندەرىنىڭ يەگەرى, انەس ساراي تولەندى ۇلى اعامىزدىڭ «اداي تاريحى» كىتابىنىڭ تۇساۋكەسەر راسىمىنە جينالىپ وتىرمىز.
ولاي بولسا, باسپادان جاقىندا عانا شىققان, ءالى سياسى دا كەپپەگەن كوركەم بەزەندىرىلگەن مازمۇندى كىتاپتىڭ لەنتاسىن كەسۋ مارتەبەسىن اقىن, ساۋلەتشى, قازاقستاننىڭ ەڭبەك سىڭىرگەن قايراتكەرى, قازاقستان جازۋشىلار وداعىنىڭ مۇشەسى سايىن نازاربەك اعامىزعا جانە ولكەتانۋشى, جازۋشى, قازاقستان جازۋشىلار وداعىنىڭ مۇشەسى وتىنشى كوشباي ۇلى اعامىزعا ۇسىنامىن», دەدى وبلىس اكىمى
شارانىڭ نەگىزگى ءبولىمى, ياعني كىتاپتىڭ تۇساۋكەسەرىنەن سوڭ ءسوز كەزەگى و. كوشباي ۇلى مەن م. قۇلكەنوۆكە بەرىلدى. سونىمەن قاتار بۇگىنگى جيىنعا قاتىسا الماعان ەل اعالارىنىڭ بەينەجازباسى كوپشىلىككە كورسەتىلدى.
انەس تولەندى ۇلىنىڭ ەل تاريحىن, ونىڭ ىشىندە ماڭعىستاۋ تاريحىن زەرتتەۋگە قوسقان ۇلەسى زور. ول قازاق تاريحىنا قاتىستى بۇرىن ايتىلماي, اينالىسقا تۇسپەي جۇرگەن عىلىمي دەرەكتەردى زەرتتەپ, «ەدىل-جايىق» تريلوگياسى, «يساتاي مەن ماحامبەت», «اسىلدىڭ سىنىعى», تاعى دا باسقا ادەبي ەڭبەكتەردى جارىققا شىعاردى. وسى رەتتە ايماق باسشىسى نۇرلان اسقار ۇلى وڭىردەگى تاريحي ەسكەرتكىشتەر بويىنشا ماڭعىستاۋ وبلىستىق مادەنيەت, ارحيۆتەر جانە قۇجاتتاما باسقارماسىنىڭ باسشىسى سارمۋرزينا ءپانيا وڭالبايقىزىنا بىرنەشە تاپسىرما بەردى.
انەس تولەندى ۇلى 1937 جىلى رەسەيدە, استراحان وبلىسى, ۆولودارسكي اۋدانى, كىرمالاي اۋىلىندا تۋعان. قازۇۋ-دى بىتىرگەن. «ەگەمەن قازاقستان», «جاس الاش» گازەتتەرىندە ادەبي قىزمەتكەر, ءبولىم مەڭگەرۋشىسى, «جازۋشى» باسپاسىندا رەداكتور, قازاقستان جازۋشىلار وداعىندا ادەبي كەڭەسشى بولىپ قىزمەت اتقارعان.
بۇعان دەيىن جازۋشىنىڭ «مۇنارلار شاقىرادى» دەگەن اتپەن العاشقى اڭگىمەلەر جيناعى 1969 جىلى جارىق كوردى. 1989 جىلى ورىس تىلىندە «قاراشا ايى كەلگەندە» كىتابى شىقتى. اعامىزدىڭ «قۋ تازشا», «ارۋ الماتى», «مۇقىم مەنىڭ», «اڭساۋ», «تىمىرسىق» پەسالارىن بىلەمىز. ء«بىز – جاستارمىز», «اتامان اننەنكوۆتىڭ كۇيرەۋى» فيلمدەرىنىڭ ستسەناريلەرىن جازعان. اعامىز «ەدىل-جايىق» رومانى ءۇشىن 1992 جىلى قر مەملەكەتتىك سىيلىعىنا يە بولعان.
