شۋ قالاسىنىڭ اينالما ۋچاسكەسىندە 7 كوپىر مەن جول وتپەلەرىنىڭ, سونىڭ ىشىندە ۇزىندىعى 204 مەتر بولاتىن شۋ وزەنى ارقىلى وتەتىن ەڭ ۇلكەن كوپىردىڭ قۇرىلىسى بويىنشا جۇمىستار بەلگىلەنگەن مەرزىمنەن بۇرىن اياقتالدى. جوبالىق قۇنى – 15 ملرد.تەڭگە.
اتالعان ۋچاسكەدە قوزعالىستىڭ اشىلۋى ترانزيتتىك كولىكتىڭ كەدەرگىسىز ءوتۋىن قامتاماسىز ەتەدى جانە شۋ قالاسىن مويىنقۇم, بىرلىك, ايدارلى, بايدىبەك سياقتى جاقىن ماڭداعى ەلدىمەكەندەرمەن بايلانىستىرادى.
«قازاۆتوجول» ۇك» اق جامبىل وبلىسى بويىنشا فيليالىنىڭ ديرەكتورى ايجان تۋعانوۆانىڭ ايتۋىنشا, ۇزىندىعى 62 شاقىرىم بولاتىن «شۋ-حانتاۋ» ۋچاسكەسىندەگى جۇمىستار تولىعىمەن اياقتالعان. نىسان جوسپارلانعان مەرزىمنەن التى اي بۇرىن پايدالانۋعا بەرىلدى.
«مەركى-شۋ» جانە «حانتاۋ-بۋرىلبايتال» ۋچاسكەلەرى بويىنشا ءبىر باعىتتا قوزعالىس اشىلدى, 4 كوپىرگە كىرەبەرىستە جۇمىستار جۇرگىزىلۋدە. جۇمىستاردىڭ تولىق اياقتالۋى 2022 جىلعى قاراشاعا جوسپارلانعان.
اۋقىمدى جوبا اياسىندا 6 كوپىر, تەمىر جول ارقىلى 3 جول وتپەسى, جارىقتاندىرىلاتىن 11 كولىك ايرىعى, 9 جايلاستىرىلعان دەمالىس الاڭى مەن 34 كولىك پاۆيلونى سالىنباق.
«قۇرىلىس جۇمىستارىنا 800-دەن استام قىزمەتكەر مەن 400-دەن استام تەحنيكا بىرلىگى جۇمىلدىرىلعان», دەپ جەتكىزدى ا.تۋعانوۆا.
ۇكىمەت باسشىسىنىڭ قولداۋىنىڭ ارقاسىندا كەلەسى جىلى «شۋ-بلاگوۆەششەنكا» اۆتوموبيل جولىنا كۇردەلى جوندەۋ جۇرگىزۋ ءۇشىن قاراجات بولىنەتىن بولادى.
اتالعان جوبالاردى اياقتاۋ قازاقستاننىڭ سولتۇستىگى مەن وڭتۇستىگى ارالىعىنداعى, سونداي-اق, قىرعىزستان رەسپۋبليكاسىمەن ترانزيتتىك الەۋەتتى ەداۋىر ارتتىرۋدى قامتاماسىز ەتەدى.
