مارتەبەلى سىيلىقتى تاپسىرۋ ءراسىمى ارالاس فورماتتا ۇيىمداستىرىلدى. كەلە الماعان ازاماتتار zoom پلاتفورماسى ارقىلى قاتىسۋعا مۇمكىندىك الدى. سالتاناتتى ءىس-شارا بارىسىندا ولجاس سۇلەيمەنوۆتەن بولەك, ماسكەۋ مەملەكەتتىك حالىقارالىق قاتىناستار ينستيتۋتىنىڭ رەكتورى, رەسەي عىلىم اكادەمياسىنىڭ اكادەميگى اناتولي توركۋنوۆ, رەسەي-ارميان ۋنيۆەرسيتەتىنىڭ رەكتورى ارمەن داربينيان (ارمەنيا), فيزيك-عالىمداردىڭ اۆتورلىق ۇجىمىنان الەكساندر تۋزيكوۆ, سەرگەي زولوتوي جانە سەرگەي كورەنياكو (بەلارۋس), استروفيزيكا ينستيتۋتىنىڭ ديرەكتورى گۇلچەحرا كوحيروۆا (تاجىكستان), ۇلتتىق عىلىم اكادەميالارىنىڭ پرەزيدەنتتەرى مۇرات جۇماتاەۆ (قىرعىز رەسپۋبليكاسى) جانە يون تيگينيانۋ (مولدوۆا) سىيلىققا يە بولدى.
جالپى, تمد مەملەكەتتەرىنىڭ بەلگىلى تۇلعالارىنا تابىستالىپ كەلە جاتقان «دوستاستىق جۇلدىزدارى» مەملەكەتارالىق سىيلىعىنىڭ تاريحى 2009 جىلدان باستالادى. سول جىلدىڭ 21 مامىرىندا رەسمي تۇردە بەكىتىلگەن ماراپات جىل سايىن لاۋرەاتتارعا تابىستالۋدا. گۋمانيتارلىق ىنتىماقتاستىق مەملەكەتارالىق قورى تاعايىندايتىن ءداستۇرلى سىيلىقتى يەلەنگەن ازاماتتارعا قۇرمەت بەلگىسى, ارنايى ديپلوم, كۋالىك جانە 2 ميلليون رەسەي ءرۋبلى تاپسىرىلادى.
لاۋرەاتتاردى ماراپاتتاۋ راسىمىنە گۋمانيتارلىق ىنتىماقتاستىق مەملەكەتارالىق قورىنىڭ اتقارۋشى ديرەكتورى اناتولي يكسانوۆ باستاعان وزگە دە مارتەبەلى مەيماندار قاتىستى. سىيلىق يەگەرلەرى بەينەبايلانىسقا شىعىپ, ريزاشىلىعىن جەتكىزدى.
بۇدان بولەك ءىس-شارا كەزىندە «دەبيۋتتەر دوستاستىعى» مەملەكەتارالىق سىيلىعى دا تاپسىرىلدى. بۇل ماراپات قازاقستاندىق بەينەلەۋ ونەرىنىڭ شەبەرى الماس نۇرعوجاەۆقا بۇيىردى.
