ءبىرىنشى تۇعىر ول – تاۋەلسىزدىك. كەز كەلگەن ازامات ءۇشىن ەڭ قاستەرلى قۇندىلىق. ەل ەڭسەسىن تىكتەگەن ەگەمەندىكتىڭ ءبىز ءۇشىن ماڭىزى ەرەكشە. ەلباسى بۇل قاستەرلى تۇسىنىكتى تاۋەلسىزدىك العان جىلداردان بەرى سانامىزعا سىڭىرۋدە. وسكەلەڭ ۇرپاق ءۇشىن تاۋەلسىزدىك تاريحي قۇندىلىق, ەل ەرتەڭىنە دەگەن سەنىم, العا جوسپارلاعان بولاشاعىنا باعىت بەرەتىن ەڭ ماڭىزدى ماسەلە بولۋىنا كۇش جۇمساۋىمىز كەرەك. ول ءۇشىن ەل بولىپ بىرىگىپ, ەڭبەك ەتۋ ماڭىزدى دەپ وي سالادى ەلباسى. ەكىنشىسى – بىرلىك پەن كەلىسىم – ەلدىگىمىزدىڭ مىزعىماس تۇعىرى. كوپەتنوستى قازاقستان حالقى ءۇشىن بۇل تۇعىر ەتنوسارالىق, كونفەسسياارالىق تاتۋلىقتى ساقتاپ قالۋ ماسەلەسى سىندى ماڭىزدى بولماق. ەلباسى ەگەمەندىك العان جىلداردان بەرى قازاقستان حالقى اسسامبلەياسىنىڭ ماڭىزدىلىعىن ەسكەرتىپ, حالىقتار دوستىعىنىڭ مىزعىماس سيمۆولى رەتىندە جىل سايىن ەلىمىزدە ءتۇرلى حالىقارالىق شارالاردى ۇيىمداستىرۋدى نازاردان تىس قالدىرمايدى. بۇل ءۇردىس الداعى ۋاقىتتا دا جالعاسىن تاپپاق. ءۇشىنشى تۇعىر – جەر – اتا-بابا مۇراسى, حالىق قازىناسى. جەر ماسەلەسى قازاق حالقىنا بولمىسىنان بەرىلگەن, قانىمەن ءسىڭىپ, بويىنا بىتكەن ەرەكشە ماڭىزدى ماسەلە. جەرى مەن ەلى ءۇشىن ءومىرىن قيىپ, عۇمىرىن ارناعان اتا-بابالارىمىزدىڭ اماناتىن ارقالاپ, وسكەلەڭ ۇرپاققا وسى ۇلان-عايىر اتىرابىمىزدى ميراس ەتۋ ءبىزدىڭ ورتاق مىندەتىمىز ەكەنىن تاعى ءبىر مارتە ەسكە تۇسىرەدى. ءتورتىنشى تۇعىر – وتباسى مەن سالت-ءداستۇر – قوعامنىڭ التىن دىڭگەگى. ەلباسى: «وتباسى – ۇرپاق تاربيەسىنىڭ ۇستاحاناسى, قوعامدىق قاتىناستاردىڭ باستاۋى سانالاتىن بىرەگەي ينستيتۋت» دەپ بۇگىنگى قوعامدا جانۇيانىڭ ماڭىزدىلىعى مەن ءرولىن تاعى ءبىر مارتە ەرەكشەلەيدى. ادام ساناسى ازعىنداعان جاڭا زاماندا جاس وتباسىلار اراسىندا بەلەڭ العان كەلەڭسىز جاعدايلار, اجىراسۋ, ءبىر جىنىستى نەكە, تولىق ەمەس وتباسىلار, جەتىم بالالاردىڭ كوبەيۋى ماسەلەلەرى ءدال وسى وتباسى ينستيتۋتىنا ەلىمىزدە جەتكىلىكتى دەڭگەيدە كوڭىل بولىنبەيتىندىگىنىڭ كورسەتكىشى. بۇل ماسەلە ەل كولەمىندە نازارعا الىنىپ, شەشىلۋىنە ىقپال ەتۋ ءۇشىن ەلباسى ءوزى باستاپ وتباسىنىڭ ماڭىزدىلىعىن ايقىنداپ بەرىپ وتىر. بۇل – يگىلىكتىڭ نىشانى. بەسىنشى تۇعىر – ۇلتتىق مادەنيەت – حالىقتىڭ رۋحاني تىرەگى. بۇگىنگى كۇنى جاھاندىق باسەكەگە قابىلەتتى بولۋ ءۇشىن بىرەگەي ۇلتتىق مىنەز, اسقاق رۋح كەرەك دەيدى نۇرسۇلتان ءابىش ۇلى. شىنىمەن-اق, ەلدىكتىڭ تۇتقاسى – ۇلتتىق مۇرا, ءتىل مەن مادەنيەت, سالت-ءداستۇر مەن ادەبيەت. ۇلت مادەنيەتىن قاجەتتى دەڭگەيدە دامىتپايىنشا, رۋحاني قۇندىلىقتارىمىزدىڭ مارتەبەسى ەشقاشان بيىكتەمەيدى. ەلباسى نازار اۋدارعان ۇلتتىق مادەنيەت سالاسىن دامىتۋ ارقىلى عانا ءبىز باسقا حالىقتاردى ونەر قۇدىرەتىمەن, عىلىمي ىزدەنىسپەن مويىنداتا الامىز. التىنشى تۇعىر – ءبىلىم مەن ەڭبەك – باقۋاتتى ءومىردىڭ كىلتى. تابىستىڭ كىلتى ۇزدىكسىز ءبىلىم الۋ مەن تىنىمسىز ەڭبەك ەتۋدە دەيدى نۇرسۇلتان ءابىش ۇلى. باسەكەگە قابىلەتتى ۇرپاق تاربيەلەۋ جولىندا ءبىلىم مەن عىلىمدى دامىتۋدىڭ مەملەكەت ءۇشىن ماڭىزى مول. جەتىنشىسى – پراگماتيزم – باسەكەگە قابىلەتتى بولۋدىڭ كەپىلى. پراگماتيزم پرينتسيپتەرى بارىنشا قاناعاتشىل, ۇنەمشىل, ۇستامدى بولىپ, ۋاقىتتى ورىندى پايدالانۋعا تالپىنۋدى كوزدەيدى. ەلباسى بۇل پرينتسيپتەر جاستاردى توزىمدىلىككە تاربيەلەپ, جاڭا زامان تالابىنا ساي دامۋىنا مۇمكىندىك بەرەتىن قابىلەت دەپ سانايتىنىن ايتادى.
جالپى, نۇرسۇلتان ءابىش ۇلى «ەلدىكتىڭ جەتى تۇعىرى» اتتى جاڭا قاعيداسىمەن بارشا قازاقستاندىقتاردىڭ رۋحىن قايراپ, ەڭسەمىزدى تىكتەپ, بۇدان دا بيىك اسۋلارعا جەتۋ ءۇشىن جانە تاۋەلسىز قازاقستاننىڭ جارقىن بولاشاعى جولىندا تىنباي جۇمىس ىستەۋگە شاقىردى.
گۇلنار تويلىباەۆا,
Nur Otan پارتياسى الماتى وبلىستىق فيليالى توراعاسىنىڭ ءبىرىنشى
ورىنباسارى, دەپۋتاتتىق فراكتسيا جەتەكشىسى
