ونلاين شەبەرلىك سىنىپتارىنا قازاقستاننىڭ وبلىس ورتالىقتارىندا ورنالاسقان 11 فيلارمونيانىڭ سەكسەننەن استام قىزمەتكەرى قاتىستى. 4 اپتا بويى كۇنىنە 8 ساعاتتان تىڭداۋشىلار ماركەتينگ, مەنەدجمەنت, رەجيسسۋرا, شىعارماشىلىق ءونىمدى ىلگەرىلەتۋ, حور جۇمىسىنىڭ, وركەستر ديريجەرى جۇمىسىنىڭ ەرەكشەلىكتەرى مەن مۇمكىندىكتەرى, قازاق ءبيىنىڭ نەگىزدەرى, زاماناۋي كومپوزيتسيا تەحنيكاسى, ءداستۇرلى ۇجىممەن جۇمىس بويىنشا دارىستەر تىڭداپ, وزەكتى ماسەلەلەردى تالقىلادى.
شەبەرلىك سىنىپتارىنىڭ دارىستەرى 20 ساعاتتان تۇراتىن 8 مودۋلگە بولىنگەن. ءار مودۋل بويىنشا ءوز سالاسىندا ايتۋلى جەتىستىكتەرگە جەتكەن, كاسىبي ماماندار ءدارىس وقىدى. ولاردىڭ قاتارىندا قازاقستاننىڭ ەڭبەك سىڭىرگەن قايراتكەرى, «استانا وپەرا» تەاترىنىڭ مۋزىكالىق جەتەكشىسى, ديريجەر ابزال مۇحيتدەنوۆ, قازاق ۇلتتىق ونەر ۋنيۆەرسيتەتىنىڭ پروفەسسورى, قازاقستاننىڭ ەڭبەك سىڭىرگەن قايراتكەرى, ەركەعالي راحماديەۆ اتىنداعى مەملەكەتتىك اكادەميالىق فيلارمونيانىڭ كامەرالىق حورىنىڭ جەتەكشىسى ءارى باس ديريجەرى گۇلميرا قۇتتىباداموۆا, نۇر-سۇلتان قالاسى اكىمدىگىنىڭ سيمفونيالىق وركەسترىنىڭ كوركەمدىك جەتەكشىسى جانە ديريجەرى بەرىك باتىرحان, «قازاقستان كومپوزيتورلار قاۋىمداستىعى» قوعامدىق بىرلەستىگىنىڭ توراعاسى ارتىق توقسانباەۆ, قازاقستاننىڭ ەڭبەك سىڭىرگەن قايراتكەرى, كومپوزيتور, پيانينوشى گۇلجان وزەنباەۆا, قازاق ۇلتتىق ونەر ۋنيۆەرسيتەتىنىڭ پروفەسسورى جانعالي ءجۇزباي, جامبىل اتىنداعى قازاق مەملەكەتتىك فيلارمونياسىنىڭ ديرەكتورى, «تۇران» ەتنو-فولكلورلىق ءانسامبلىنىڭ مۇشەسى سەرىك نۇرمولداەۆ, قازاق ۇلتتىق حورەوگرافيا اكادەمياسىنىڭ اعا وقىتۋشىسى انۆارا سادىقوۆا, قازاقستاننىڭ ەڭبەك سىڭىرگەن قايراتكەرى, رەجيسسەر قارلىعاش اجيەۆا, JD Expert اگەنتتىگىنىڭ نەگىزىن قالاۋشى, كونسۋلتانت يۋليا دميتريەۆا, بيزنەس-ترەنەر, فاسيليتاتور اننا پاتسيۋك بار.
قازاقستاننىڭ ەڭبەك سىڭىرگەن قايراتكەرى, داۋلەسكەر كۇيشى جانعالي ءجۇزباي قازاق حالقىنىڭ كۇي ونەرى, ءداستۇرلى كۇيشىلىك مەكتەپتەر, ونىڭ ىشىندە التاي-تارباعاتاي, ارقا, جەتىسۋ, قاراتاۋ, جيدەلى-بايسىن, سىر, اتىراۋ, ماڭعىستاۋ كۇيشىلىك مەكتەپتەرى جايلى دارىستەر وقىدى. كۇيشى شەرتپە جانە توكپە كۇيلەردىڭ تاريحىن بايانداپ, ارقايسىنىڭ ەرەكشەلىكتەرىن تالداپ, كۇي ونەرىنىڭ دامۋىنا وتكەن زاماندارى ۇلەس قوسقان تۇلعالار جايلى جانە بۇگىندە اتسالىسىپ جۇرگەن قايراتكەرلەر تۋرالى ماعلۇمات بەردى.
«بۇل – ارنايى عىلىمي نەگىزدەلگەن ۇلگىسى بار ۇلكەن جوبا. ارينە, وسىنداي جۇمىستاردىڭ كوپ بولعانى دۇرىس. مىنا ءبىزدىڭ قازىرگى مۋزىكالىق, فيلارمونيالىق, كونتسەرتتىك قايراتكەرلىگىمىزدەگى جينالىپ قالعان قىرۋار پروبلەمالارىمىز وتە كوپ. سولاردى مىناۋ ارىپتەستىك اياسىندا شەشۋدىڭ ءبىر جاقسى جولدارى مىنا ونلاين دارىستەر بولدى. سوندىقتان ونلاين دارىستەردى ۇيىمداستىرعان بارشا ارىپتەستەرىمە, جوبانىڭ جەتەكشىسى گۇلميرا قۇتتىباداموۆاعا مەن العىسىمدى بىلدىرەمىن», دەدى جانعالي ءجۇزباي.
ونلاين شەبەرلىك سىنىپتارىنا قاتىسۋشىلار «جوبالىق كوماندانى ءتيىمدى باسقارۋدىڭ زاماناۋي ادىستەرى» تاقىرىبىنا زور قىزىعۋشىلىق تانىتتى. مودۋل دارىسكەرى اننا پاتسيۋك تىڭداۋشىلارمەن مەنەدجمەنتتىڭ نەگىزگى مىندەتتەرى, جينالىستار مەن كەڭەستەردى قالاي وتكىزۋ كەرەك, ءار قىزمەتكەردى ورتاق ىسكە قالاي جۇمىلدىرىپ, ىنتالاندىرۋعا بولادى, جۇمىس بارىسىندا كەتكەن قاتەلىكتەر جايلى قىزمەتكەرلەرمەن قالاي اڭگىمەلەسۋ قاجەت دەگەن سياقتى ماسەلەلەردى ەگجەي-تەگجەي تالقىلادى.
«مادەنيەت سالاسىندا مۇنداي اۋقىمدى دارىستەر وقىعان جوق ەدىم. بىراق بۇل مەن ءۇشىن وتە ماڭىزدى بولدى. سەبەبى باسقارۋ تەحنولوگياسى, ماركەتينگ تەحنولوگياسى بيزنەس, مادەنيەت سالاسى بولسىن, بارلىق جەردە بىردەي. ونەر ادامدارىنىڭ, شىعارماشىلىق ماماندىقتارداعى باسقارۋشىلاردىڭ, جەتەكشىلەردىڭ وسىنداي زاماناۋي باسقارۋ تاسىلدەرىن زەرتتەۋى, وقىپ-ۇيرەنۋى اسا ماڭىزدى. سونداي-اق, مۇنداي اقپاراتتىڭ قولجەتىمدى بولۋى ەكى ەسە ماڭىزدى. ەكىنشىدەن, مەنەدجمەنت تاقىرىبىنا بولىنگەن ساعات وتە كوپ. ياعني, ءبىز وسى ۋاقىت ىشىندە بۇل سالانى جان-جاقتى, كەشەندى قاراستىرىپ, تالقىلاپ ۇلگەردىك. باسقا دا, بيزنەسكە, مىسالى ماركەتينگكە ءدال وسىلاي كوپ كوڭىل بولىنگەن جانە بارلىق مودۋلدەر, دارىستەر ءبىر جۇيەگە نەگىزدەلىپ قۇرىلعان. بۇل وتە تاماشا دەپ سانايمىن. سوندىقتان بۇل جوباعا مەن قۋانا قاتىسىپ, بار بىلگەنىممەن ءبولىستىم», دەدى اننا پاتسيۋك.
ونلاين شەبەرلىك سىنىپتارىنا بەلسەندى قاتىسقان بارلىق تىڭداۋشىلارعا سەرتيفيكاتتار تابىستالدى.
