بۇل كۇنى ساحنا تورىنە بەلگىلى انشىلەر كوتەرىلىپ, تاۋەلسىز قازاقستان تاريحىنداعى تانىمال اندەردى شىرقادى.
«تاۋەلسىزدىك داستانى» كونتسەرتىندە وتاندىق ەسترادا جۇلدىزدارىنىڭ ورىنداۋىندا تاۋەلسىز قازاقستاننىڭ 30 ۇزدىك ءانى ورىندالدى. ورىنداۋشىلار ەستافەتانى ءبىر-بىرىنە ۇسىنىپ, قازاقستاننىڭ ونداعان ايتۋلى اندەرىنىڭ بىرىڭعاي كومپوزيتسياسىن جاساۋعا دەن قويدى.
«30 جىل بەدەرىندە حالىق اراسىندا كەڭىنەن تانىلعان اندەر ورىندالدى. وتە جاقسى كەش بولدى. سۇيىكتى اندەرىمىزدى شىرقادىق. ۇيىمداستىرۋشىلارعا راحمەت», دەدى قازاقستاننىڭ ەڭبەك سىڭىرگەن قايراتكەرى جەڭىس ىسقاقوۆا.
«قالا اكىمدىگىنىڭ قولداۋىمەن وسىنداي تاماشا كەش ءوتتى. 20 جىلدان استام ۋاقىت جۇمىس ىستەپ كەلە جاتقان ارىپتەستەرمەن كەزدەسكەنىمە قۋانىشتىمىن. وسىنداي ءىس - شارالار مۇمكىندىگىنشە كوبىرەك وتكىزىلگەنى ءجون», دەپ اتاپ ءوتتى قازاقستاننىڭ ەڭبەك سىڭىرگەن قايراتكەرى ساكەن مايعازيەۆ.
وتاندىق حيتتەردى نۇرلان ونەرباەۆ, ناعيما ەسقاليەۆا, ايجان نۇرماعامبەتوۆا, تولقىن زابيروۆا, جەڭىس سەيدوللا ۇلى, جەڭىس ىسقاقوۆا, پارۆيز نازاروۆ, نۇرلان ابدۋللين, «ۇركەر», «ياشلىك» توبى, باۋىرجان يساەۆ, ۇلىقپان جولداسوۆ, ديلناز احماديەۆا, يۆان برەۋسوۆ, اسىلبەك ەڭسەپوۆ, رينات گايسين, «بايتەرەك», «ازيا», «مۋزارت», « ۇلىتاۋ», قىدىرالى جانە قاراقات, جۇبانىش جەكسەن ۇلى, «دەرۆيشي» توبى, التىناي جوراباەۆا, بەيبىت قورعان, ءمادينا سادۋاقاسوۆا, قۇرماش ماحان, الماس كىشكەنباەۆ, ايقىن تولەپبەرگەن, ماقپال يسابەكوۆا, نۇرجان كەرمەنباەۆ, «جىگىتتەر», «كز», «كەشYOU» توپتارى, قايرات باەكەنوۆ, ەركە ەسماحان, مارجان اراپباەۆا سىندى ەسترادا جۇلدىزدارى ورىندادى.
