«تاعى جەتى مەكتەپتىڭ قۇرىلىسى اياقتالدى. بۇل مەكتەپتەر 20 مىڭنان استام وقۋشى ورنىن قۇرۋعا مۇمكىندىك بەرەدى. مىسالى, BINOM SCHOOL جاڭا فورماتتاعى يننوۆاتسيالىق مەكتەبىنە باردىم. جاڭا بەس قاباتتى مەكتەپ 4 مىڭ وقۋشىعا ەسەپتەلگەن (2 اۋىسىمدا). بۇل مەكتەپتە وقۋ تەگىن. مەكتەپتە روبوتوتەحنيكا كابينەتتەرى, كينوزال, مۇعالىمدەر مەن بالالارعا ارنالعان كوۆوركينگ-ايماقتار, تەلەستۋديا, سمارت-سىنىپتار, مەتالل جانە اعاش كەسۋ شەبەرحانالارى, TedxBinom, Speaking Club, ۇلكەن كىتاپحانا, ويىن بولمەلەرى جانە ت.ب. بار. Binom مەكتەبىنىڭ باستى ارتىقشىلىقتارىنىڭ ءبىرى – ەرەكشە قاجەتتىلىگى بار بالالار ءۇشىن بارلىق جاعداي جاسالعان. جاڭا مەكتەپتەردىڭ ەسىگى 3 توقساننان باستاپ اشىلادى.
بيىل بارلىعى 15 مەكتەپ سالىندى. بۇل شامامەن 40 مىڭ وقۋشى ورنى. جاڭا مەكتەپتەر سالىنعاندىقتان 5 مەكتەپ ەندى ءۇش اۋىسىمدا وقىتپايدى, سونداي-اق, 10 مەكتەپتە شامادان تىس جۇكتەمە ماسەلەسى شەشىلمەك.
ەلوردادا جىل سايىن ادامدار سانى ارتىپ كەلەدى. سوڭعى 10 جىلدا وقۋشىلار سانى 3 ەسەگە ارتتى. جىل سايىن ءبىرىنشى سىنىپ وقۋشىلارىنىڭ سانى تۇلەكتەر سانىنان 3 ەسە اسادى. مىسالى, مامىر ايىندا 7 مىڭ تۇلەك مەكتەپ ءبىتىرىپ شىقسا, ءبىرىنشى سىنىپقا 25 مىڭ وقۋشى كەلەدى. وسى ماسەلەلەردى شەشۋ ءۇشىن قالادا جىل سايىن كەم دەگەندە 10 مەكتەپ سالىپ وتىرۋ قاجەت.
2022 جىلى 16 مەكتەپ سالۋدى جوسپارلاپ وتىرمىز. كەشەندى جوسپار اياسىندا 5 جىلدىق كەزەڭگە 70-كە جۋىق مەكتەپ سالۋ جوسپارلانعان. مەكتەپ قۇرىلىسىنا جەكە ينۆەستيتسيانى دا تارتامىز. مەكتەپتەر قالانىڭ بارلىق اۋدانىندا, سونىڭ ىشىندە ەلدى مەكەندەردە سالىنىپ جاتىر. وقۋ ورىندارىنا قاجەتتىلىك بار اۋداندارعا نازار اۋدارامىز», دەپ جازدى ەلوردا اكىمى.
