سۋرەتتى تۇسىرگەن ەرلان ومار, «EQ»
ەلوردا تورىندە ەلىمىزدىڭ رۋحاني قۇندىلىقتارى قاشان دا الدىڭعى ورىنعا قويىلىپ كەلەدى. ەلباسىنىڭ ەڭ ۇلى تۋىندىسى سانالاتىن شالقار شاھاردا حالقىمىزدىڭ اسىل قاسيەتتەرى اسقاقتاپ تۇر. وسىلايشا بۇگىنگى ەلوردادا اجارى مەن كەلىستى كەلبەتىن ساقتاي وتىرىپ, ۇلتتىق ۇلى رۋحىنا دا ماڭىزدى ءمان بەرىلەدى. قالانى «نۇر-سۇلتان – جايلى قالا» ماستەر-جوسپارىنا سايكەس دامىتۋدامىز. وسى جىلى 200-گە جۋىق اۋلا مەن قوعامدىق كەڭىستىكتى اباتتاندىردىق. دەنساۋلىققا پايداسى بار تازا اۋادا جايلى ۋاقىت وتكىزۋگە ارنالعان جاڭا ورىندار اشىلدى. اتاپ ايتقاندا, NS street life كوشە سپورتىنىڭ كوليزەيى, قالاداعى العاشقى «تەاترالنىي» جاياۋ جۇرگىنشىلەر جەلەكجولى, Demalys Promenade جاياۋ جۇرگىنشىلەر كوشەسى, قۇتقارۋشىلار, مۇعالىمدەر جانە تاعى باسقالاردىڭ قۇرمەتىنە ارنالعان تاقىرىپتىق الاڭقايلار. اباتتاندىرۋ كەزىندە قالانى كوگالداندىرۋعا نازار اۋدارامىز. بيىل 1 ملن-نان استام جاسىل جەلەك وتىرعىزامىز, تەاترلار مەن كورىكتى جەرلەردە وزىندىك «جاسىل ارالدار» پايدا بولدى», دەيدى نۇر-سۇلتان قالاسىنىڭ اكىمى التاي كولگىنوۆ.
جۋىردا ەلوردا تورىندە «رۋحاني جاڭعىرۋ» قازاقستاندىق قوعامدىق دامۋ ينستيتۋتىنىڭ ۇيىمداستىرۋىمەن وتكەن ينفوگرافيكا تۇرىندەگى «قاجىرلى ەڭبەك – تابىس كىلتى» اتتى ەلەكتروندى فلاەرلەرىن ازىرلەۋ جوباسىنىڭ نۇر-سۇلتان قالاسى بويىنشا جەڭىمپازدارى ماراپاتتالدى. Ulttyq tárbıe يدەولوگيالىق پلاتفورماسى اياسىندا ينستيتۋت جۇزەگە اسىرىپ وتىرعان جوبا بار كۇش-جىگەرىن بوسقا سارپ ەتپەي, ومىردە كەزدەسكەن ءتۇرلى قيىندىقتارعا مويىماي, قوعامعا پايداسىن تيگىزگەن تۇلعالارعا ارنالدى. سول ارقىلى جاستاردى ەڭبەكسۇيگىشتىككە باۋلىپ, ەڭبەك ادامىن قۇرمەتتەۋگە, ۇلگى تۇتۋعا شاقىردى.
بيىل تامىز ايىندا باستاۋ العان جوباعا ءبىلىم بەرۋ, عىلىم, مەديتسينا, مادەنيەت, اۋىل شارۋاشىلىعى جانە ونەركاسىپ سياقتى 6 سالا بويىنشا ازاماتتار قاتىستى. ولار وزدەرىنىڭ كاسىبي بىلىكتىلىگىمەن جەتىستىككە جەتكەن ءومىربايانى, قىزمەتى جانە جەتىستىكتىكتەرى تۋرالى اقپاراتتاردى الەۋمەتتىك جەلىدە جاريالادى. جاريالانعان 654 پوستتىڭ 282-ءسى اقپاراتتىق بولسا, 372-ءسىن ەلىمىزدىڭ وڭىرلەرىندەگى تۇلعالاردىڭ وزدەرى ۇسىندى. اتالعان جوباعا نۇر-سۇلتان قالاسىنان 10-عا جۋىق ادام قاتىستى. سولاردىڭ اراسىنان قازكسر ەڭبەك سىڭىرگەن ءارتىسى, ونەرتانۋ كانديداتى, ونەرتانۋ پروفەسسورى, قازاق ۇلتتىق حورەوگرافيا اكادەمياسىنىڭ حورەوگرافيا فاكۋلتەتى رەجيسسۋرا كافەدراسىنىڭ پروفەسسورى تويعان ءىزىم مەن اۋىلشارۋاشىلىق عىلىمدارىنىڭ كانديداتى, دوتسەنت, «ستاندارتتاۋ جانە سەرتيفيكاتتاۋ» سالاسىنىڭ مامانى زاريفا قاشقاروۆا جەڭىمپاز اتاندى. ەڭ باستىسى, Ulttyq tárbıe يدەولوگيالىق پلاتفورماسى جاستارعا ادال ەڭبەكپەن تاپقان استىڭ قانشالىقتى ءدامدى, ءماندى بولاتىنىن ۇلگى ەتتى دەۋگە بولادى. ەل ىشىنەن ىرىكتەلگەن 30 تۇلعانىڭ ەسىم-سويى الەۋمەتتىك جەلىلەردە جاريالانىپ, جاستاردىڭ نازارىنا ۇسىنىلدى. وسى جوبا ەڭبەك ەردى دە, ەلدى دە العا جەتەلەيتىنىن ويعا سالدى. ەلگە ەلباسى باعدارلاماسىنىڭ يدەيالارى وسىلاي ءماندى دە ماعىنالى مانەردە ءتۇسىندىرىلدى.
