بۇل ناگرادالاردى مەملەكەت باسشىسىنىڭ اتىنان قاراعاندى وبلىسىنىڭ اكىمى جەڭىس قاسىمبەك تابىس ەتتى.
ەلىمىزدىڭ الەۋمەتتىك-ەكونوميكالىق جانە مادەني دامۋىنا قوسقان ۇلەسى ءۇشىن, مەملەكەتتىك جانە قوعامدىق قىزمەتتەگى ەلەۋلى ەڭبەگى ءۇشىن ءوڭىردىڭ 60 تۇرعىنى وردەن, مەدالدارمەن, قۇرمەت گراموتالارىمەن جانە العىس حاتتارمەن ماراپاتتالدى. سونىمەن بىرگە ءۇش ادامعا «قاراعاندى وبلىسىنىڭ قۇرمەتتى ازاماتى» اتاعى بەرىلدى.
سالتاناتتى جيىندا سويلەگەن ءوڭىر باسشىسى 30 جىل ىشىندە قاراعاندى وبلىسىندا كوپتەگەن جۇمىستار اتقارىلعانىن باياندادى. ءوندىرىس كولەمى مەن تۇرعىن ءۇي قۇرىلىسىنىڭ قارقىنى ارتىپ, جۇمىسسىزدىق تومەندەدى, جىل سايىن ءومىر ءسۇرۋ ساپاسى ارتىپ كەلەدى. مۇنىڭ ءبارى ايماقتا تۇراتىن ادامداردىڭ ەرەن ەڭبەگىنىڭ ارقاسىندا مۇمكىن بولعانىن ايتتى ول.
«بارلىق سانداردىڭ استارىندا ءبىزدىڭ جەرلەستەرىمىزدىڭ عىلىم مەن ءبىلىم, سپورت, مادەنيەت, مەديتسينا, ءوندىرىس پەن كاسىپكەرلىكتەگى وراسان ەڭبەگى مەن جەتىستىكتەرى تۇر. سىزدەردىڭ بارلىعىڭىز مەملەكەتىمىزدىڭ قالىپتاسۋىنا, ەگەمەندىكتىڭ نىعايۋىنا جانە ەلىمىزدىڭ الەۋمەتتىك-ەكونوميكالىق دامۋىنا ەلەۋلى ۇلەس قوستىڭىزدار. بۇل ۇلەس لايىقتى باعالاندى», دەپ قورىتتى ءسوزىن ج.قاسىمبەك.
«قۇرمەت» وردەنىمەن ماراپاتتالعان جەتى قاراعاندىلىقتىڭ اراسىندا قالي بايجانوۆ اتىنداعى قاراعاندى كونتسەرتتىك بىرلەستىگىنىڭ باسشىسى تالعات ىدىرىسوۆ بار. ونەر ادامى بۇل جوعارى ناگرادانىڭ ءوزى ءۇشىن قۇرمەتتى سىي ەكەنىن اتاپ ءوتتى. «مەن ءوزىم باسقاراتىن بارلىق مۋزىكانتتار مەن ۇجىمدارعا العىسىمدى بىلدىرەمىن جانە بارلىعىنا شىعارماشىلىق تابىس تىلەيمىن», – دەدى ت.ىدىرىسوۆ.
وبلىستىڭ بەس تۇرعىنىنا جەمىستى ەڭبەگى مەن وندىرىستىك كورسەتكىشتەرىن جاقسارتقانى ءۇشىن III دارەجەلى «ەڭبەك داڭقى» وردەنى تابىس ەتىلدى. «قازاقستان» شاحتاسىنىڭ جەراستى ەلەكتر سلەساءرى ەۆگەني سەكيرچين بۇل بولاشاقتاعى جەمىستى جۇمىسقا بەرىلگەن اۆانس ەكەنىن اتاپ ءوتتى. شاحتادا 30 جىل جۇمىس ىستەگەن مامان قازاقستان حالقىنا بەيبىتشىلىك پەن گۇلدەنۋ تىلەدى.
ەرلىگى مەن قايسارلىعى ءۇشىن چەرنوبىل اەس-ىندەگى اپاتتىڭ زارداپتارىن جويۋشى مۇقات سوتسيالوۆ «ەرلىگى ءۇشىن» مەدالىمەن ماراپاتتالدى.
سىڭىرگەن ەڭبەگى ءۇشىن 20 ادام «ەرەن ەڭبەگى ءۇشىن» وردەنىمەن ماراپاتتالدى. ولاردىڭ قاتارىندا تەمىرتاۋ قالاسىنىڭ № 24 جالپى ءبىلىم بەرەتىن مەكتەبىنىڭ پەداگوگى ولگا دۆورەتسكايا دا بولدى. ماراپات يەسى پەداگوگيكالىق قىزمەتىن جوعارى باعالاعانى, ءوزىن دالەلدەۋگە مۇمكىندىك بەرگەنى ءۇشىن العىس ايتتى.
بەلسەندى جانە جەمىستى قىزمەتى, مەيىرىمدىلىگى جانە قايىرىمدىلىعى ءۇشىن 11 قاراعاندىلىق «شاپاعات» مەدالىمەن ماراپاتتالدى.
بەلسەندى ومىرلىك ۇستانىمى مەن ەرەن ەڭبەگى ءۇشىن 13 ادام قازاقستان رەسپۋبليكاسىنىڭ قۇرمەت گراموتالارىمەن ماراپاتتالدى. ەكى قاراعاندىلىق قازاقستان پرەزيدەنتىنىڭ العىس حاتتارىنا يە بولدى.
سونداي-اق, سالتاناتتى ماراپاتتاۋ ءراسىمى بارىسىندا قاراعاندى وبلىسىنىڭ جاڭا قۇرمەتتى ازاماتتارىنىڭ ەسىمدەرى جاريالاندى. بۇل قۇرمەتكە قازتۇتىنۋوداعى قاراعاندى ەكونوميكالىق ۋنيۆەرسيتەتىنىڭ رەكتورى ەرقارا ايماعامبەتوۆ, جەزقازعان قالاسى قوعامدىق كەڭەسىنىڭ توراعاسى ساعىندىق قوجامسەيىتوۆ جانە مەديتسينا عىلىمدارىنىڭ دوكتورى, پروفەسسور سەرگەي لوحۆيتسكي يە بولدى.
كورسەتىلگەن قۇرمەتكە ريزاشىلىق بىلدىرگەن قادىرمەندى اقساقال ەرقارا ايماعامبەتوۆ تۇڭعىش پرەزيدەنت-ەلباسىنىڭ ەڭبەگىن, ونىڭ ساليقالى ىشكى جانە سىرتقى ساياساتىن جوعارى باعالاي كەلىپ, قازاقستاننىڭ بولاشاقتا مىندەتتى تۇردە رۋحاني باي, ادامگەرشىلىك جاعىنان تازا جانە ەكونوميكالىق تۇرعىدا دامىعان مەملەكەت بولاتىنىنا نىق سەنىم ءبىلدىردى.
