مۇندا ەگەمەن ەلدىڭ ەلتاڭباسىن جاساعان اۆتور جانداربەك مالىبەك ۇلىنداي تاۋ تۇلعانىڭ ءومىر جولى مەن شىعارماشىلىعى, تىڭ تۋىندىلارىنىڭ تۇپنۇسقا جوبالارى, قولجازبالارى مەن سۇبەلى سۇحباتتارى, جاريالانعان ەڭبەكتەرى, فوتو-بەينە ماتەريالدارى سەكىلدى بارلىق قۇجاتتارى تاۋەلسىزدىكتىڭ 30 جىلدىعى, ۇلتتىق ءارحيۆتىڭ 15 جىلدىعى قارساڭىندا ساقتاۋعا الىندى.
سالتاناتتى شاراعا مەملەكەت قايراتكەرى, قۇجاتتانۋشى جاقىپوۆ ءمىربولات حابي ۇلى, فيلولوگيا عىلىمدارىنىڭ دوكتورى, پروفەسسور سەرىك نەگيموۆ, جازۋشى, دراماتۋرگ, جۋرناليست, تاريحشى, فيلولوگ-عالىم جولتاي جۇمات-ءالماش ۇلى, ساياسي عىلىمدارىنىڭ دوكتورى, پروفەسسور ابدىجالەل قوشقار ۇلى, قازاق ۇلتتىق ونەر ۋنيۆەرسيتەتىنىڭ پروفەسسورى بايقوڭىر يجان ۇلى, قولجازبالار جانە سيرەك كىتاپتار ۇلتتىق ورتالىعىنىڭ باسشىسى جاندوس بولدىقوۆ سىندى بەلگىلى تۇلعالار قاتىستى.
قازاقستان رەسپۋبليكاسى ۇلتتىق ءارحيۆىنىڭ ديرەكتورى ساعيلا ەسىمسەيىتقىزى ۇلتتىق ءارحيۆتىڭ جەكە تەكتىك قورىنا قابىلدانعان جانداربەك مالىبەك ۇلىنىڭ قۇندى قۇجاتتارى مەن قولجازبا-سىزبالارىنىڭ قانشالىقتى ماڭىزدى ەكەنىن ايتا كەلىپ, ەلتاڭبا اۆتورىنىڭ ۇلگى بولارلىق باستاماسىنا العىسىن ءبىلدىردى.
«مەملەكەتىمىزدىڭ ەلتاڭباسىنىڭ اۆتورى رەتىندە عانا ەمەس, كوپتەگەن ەلدەردەگى ساۋلەتتى عيماراتتاردىڭ ارحيتەكتورى رەتىندە, قازاق حالقىنىڭ سان عاسىرلىق ساۋلەت ونەرىن بويىنا سىڭىرگەن دارا تۇلعا رەتىندەگى ءسىزدىڭ قۇندى جازبالارىڭىز بەن ەسكيزدەرىڭىز ۇلتتىق ارحيۆ قورىندا كەلەشەك ۇرپاققا امانات رەتىندە ساقتالاتىن بولادى», دەدى س. ەسىمسەيىتقىزى.
جانداربەك مالىبەك ۇلى ۇلتتىق ارحيۆ ۇجىمىنا العىسىن ءبىلدىرىپ, كوزىنىڭ قاراشىعىنداي ساقتاپ كەلگەن دۇنيەسىن كەلەشەك ۇرپاققا جەتكىزەر دەگەن ۇلكەن سەنىممەن تابىستاپ وتىرعانىن ايتتى.
«ەرتەڭگى تاريحتى ساقتايتىن ارحيۆ. سوندىقتان ەل اعالارى ەرتەڭگى ۇرپاققا ۇلگى بولاتىنداي قۇندى دۇنيەلەرىن ارحيۆ قويمالارىنا تابىس ەتۋدى قولعا الۋ كەرەك», دەدى.
سونىمەن قاتار ۇلتتىق ءارحيۆتىڭ ديرەكتورى ساعيلا نۇرلانوۆاعا العىس رەتىندە ءوز جوباسىمەن قۇيىلىپ ازىرلەنگەن, ەلتاڭبا پىشىنىندەگى اشەكەي بويتۇماردى سىيلادى.
ماڭگىلىك ەلدىڭ قورجىنىندا ماڭگىلىككە ساقتاۋعا الىنعان بۇل التىن قور بولاشاق ۇرپاقتىڭ وتانسۇيگىشتىگى مەن ۇلتجاندىلىعىن وياتاتىن, ماڭدايىندا جارقىراعان ايبىنى بولىپ تۇرعان ەلتاڭبانىڭ قالاي بارلىققا كەلىپ, ۇلت رۋحىن كوتەرۋ مەن الەم الدىنداعى ابىرويىن اسقاقتاتىپ تۇرعاندىعىن زەرتتەپ, سەزىنىپ جانە ماقتان تۇتۋىنا بۇيىرعان تەڭدەسى جوق سىباعا دەپ بىلەمىز.
