كەلىسسوز بارىسىندا تاراپتار «بايقوڭىر» كەشەنىن بىرلەسىپ پايدالانۋ جانە ودان ءارى دامىتۋ پەرسپەكتيۆالارىنا, سونداي-اق بايقوڭىر قالاسىنىڭ تىرشىلىك دەڭگەيىن جاقسارتۋعا قاتىستى قازاقستان-رەسەي ىنتىماقتاستىعىنىڭ اعىمداعى باعىتتارىن تالقىلادى.
ۇكىمەتارالىق كوميسسيا مۇشەلەرى «بايتەرەك» عارىشتىق زىمىران كەشەنىن قۇرۋدىڭ بىرلەسكەن جوباسىنا ەرەكشە نازار اۋداردى, شارالار تىزبەسى مەن جۇزەگە اسىرۋ مەرزىمدەرى بەلگىلەندى. كەشەن مۇلكىن ۇتىمدى پايدالانۋ, ينفراقۇرىلىم مەن الەۋمەتتىك سالانى جاڭعىرتۋ مىندەتتەرى دە قاراستىرىلعان.
جيىنعا قاتىسۋشىلار ايماق پەن عارىش ايلاعىنىڭ ەكولوگيالىق قاۋىپسىزدىگىن ارتتىرۋدىڭ ماڭىزدىلىعىنا, كەشەننىڭ پايدالانىلماي تۇرعان نىساندارىن جالعا بەرۋدەن شىعارۋ, ەسەپتەن شىعارۋ جانە كادەگە جاراتۋ ماسەلەلەرىنە جەكە-جەكە توقتالدى.
كۇن تارتىبىندەگى ماسەلەلەر بويىنشا ساراپشىلار ءوزارا قولايلى شەشىمدەر تاپتى, بۇل ۇاك وتىرىسىنىڭ حاتتاماسىندا كورسەتىلگەن.
كەزدەسۋ سوڭىندا تاراپتار ءوزارا ءىس-قيمىلدىڭ جوعارى دەڭگەيىن جانە «بايقوڭىر» كەشەنىنىڭ ستراتەگيالىق باعىتتارىنداعى مىندەتتەردى تابىستى جۇزەگە اسىرۋ ءۇشىن قاجەتتى الەۋەتتىڭ بار ەكەنىن اتاپ ءوتتى.
