سوندىقتان قازاقستان تاۋەلسىزدىگى شەجىرەسى كوشباسشى مەن كۋاگەرلەر كوزىمەن, سوزىمەن بۇگىن جازىلىپ جاتقانى – قاي جاعىنان دا جاراسىمدى. وتىز جىلدا تۇتاس حالىقتى ءبىر مۇددەگە جۇمىلدىرۋ, باستى بايلىعىمىز – ادام رەسۋرسى مەن سانىن كوبەيتىپ, ورتامىزدى تولتىرۋ, ءتۇرلى سىن-قاتەرگە قارسى تۇرىپ, توتەپ بەرۋ, ۇرپاعىمىزدىڭ مەملەكەتشىل سانا-سەزىمىن وياتۋ وڭايعا تۇسپەدى.
بارلىق سالادا بيىك بەلەس, ايتۋلى اسۋ بولعانى راس. سونىڭ ىشىندە كوڭىلدى دەمدەيتىن, سەزىمدى قاناعاتتاندىراتىن, ءتوزىمدى شىڭداي تۇسەتىن تۇيدەك-تۇيدەك تۇجىرىمدار جاسالىپتى. تاعى ءبىر قايتالاپ وقىپ كورىڭىزدەرشى, دەرەكتىك تە, تۇجىرىمدامالىق تا ولجاعا كەنەلەسىزدەر.
ء«بىز جاڭا زاماندا قانتوگىسكە جول بەرمەي, قاسيەتتى كيەمىز – تاۋەلسىزدىككە سابىر مەن توزىمدىلىك, اقىل مەن پاراسات ارقىلى قول جەتكىزدىك».
«ەڭبەك ەت, وتباسىڭدى اسىرا, ەلىڭە قىزمەت قىل: ءوزىڭ دە تابىستى بولىپ, وتانىڭنىڭ دا قۋاتى ارتادى».
«كوروناۆيرۋس دەرتىنەن تۋىنداعان پاندەميا الەمدىك ەكونوميكانى عانا ەمەس, ءوندىرىس پەن ەڭبەكتى ۇيىمداستىرۋدى, عىلىم مەن تەحنولوگيا دامۋىن, جالپى ادامنىڭ ويلاۋ جۇيەسىن ايتارلىقتاي وزگەرتتى».
«پرەزيدەنت اۋىسادى, بىراق تاۋەلسىزدىك ماڭگىلىك بولۋى كەرەك. ءار قازاقستاندىق الداعى ۋاقىتتا ونىڭ تۇعىرىن نىقتاپ, ەڭسەسىن تىكتەپ, ابىرويىن اسىرۋعا قىزمەت ەتۋگە ءتيىس. «ماڭگىلىك ەل» يدەياسىنىڭ تۇپكى ماقساتى وسىندا».
ءتۇسىنىپ وقىعان, زەردەلەپ توقىعان ادام ءۇشىن بۇل سىر-تولعاۋ – ازات ەلدىڭ بۇرىنعى-سوڭعى ءداۋىرناماسى, جىلناماسى عانا ەمەس, ءاربىر زامانداستىڭ, كەلەر ۇرپاقتىڭ ساناسىنا سىڭىرەتىن ساباق, تانىمىن كەڭەيتەتىن قوعامتانۋ شەبەرلىك سىنىبى بولا الادى.
دارحان مىڭباي,
ءماجىلىس دەپۋتاتى
