ەل استاناسىن گازداندىرۋ ەلباسىنىڭ اۋقىمدى جوباسى ەكەنى بارشاعا ءمالىم. ەلدىڭ يگىلىگىنە ارنالعان جوبا مەملەكەت باسشىسىنىڭ نازارىنان تىس قالعان ەمەس.
«نۇر-سۇلتان قالاسىنىڭ اكىمدىگى 2019 جىلدىڭ قىركۇيەگىنەن باستاپ ەلوردا اۋماعىندا گازبەن جابدىقتاۋ جەلىلەرىن سالۋ بويىنشا وتە ۇلكەن جوبانى جۇزەگە اسىرۋدا. ەكى جىلدان استام ۋاقىت ءوتتى. وسى كەزەڭدە قالادا 650 شاقىرىم گاز تاراتۋ جەلىلەرى سالىندى. بۇگىنگى تاڭدا 9 تۇرعىن ءۇي الابىن قوسۋعا قولجەتىمدىلىك قامتاماسىز ەتىلگەن, ياعني 14 مىڭعا جۋىق ابونەنت گازعا قول جەتكىزە الادى. بۇگىندە العاشقى ەكى تۇرعىن ءۇي كەشەنى گازعا كوشىرىلدى. ءبىرىنشى ءۇي «كوكتال-1», ەكىنشى ءۇي «پرومىشلەننىي» تۇرعىن الابىندا ورنالاسقان. بۇل ايتارلىقتاي ۇلكەن ۇيلەر, بىرەۋىندە شامامەن 70, ەكىنشىسىندە – 190 پاتەر بار. تۇتىنۋدىڭ العاشقى كەزەڭىندە تۇرعىنداردىڭ بۇرىنعى تولەماقىسىمەن سالىستىرعاندا 3 ەسەدەن استام ۇنەمدەۋ بايقالادى. ولار گازعا كوشۋدىڭ جايلىلىعىن سەزىندى», دەدى نۇر-سۇلتان قالاسىنىڭ وتىن-ەنەرگەتيكالىق كەشەنى جانە كوممۋنالدىق شارۋاشىلىق باسقارماسىنىڭ ءبولىم باسشىسى ماقسات ەسماعۇلوۆ.
كوگىلدىر وتىنمەن قامتىلعان تۇرعىن ءۇي كەشەندەرى ءبىرىنىڭ قۇرىلىسىن جۇرگىزگەن كومپانيانىڭ وكىلى وكسانا رەسنوۆانىڭ ايتۋىنشا, ۇيگە گاز جەتكىزۋگە ەش كەدەرگى جوق.
«بۇل ءۇي تابيعي گازعا قوسىلعان. سونىڭ ارقاسىندا ءبىز گاز جەتكىزۋ ماسەلەسىن شەشتىك, بىزدە جوسپاردان كەشىگۋ سىندى پروبلەمالار جوق, الداعى ۋاقىتتا دا سولاي بولادى دەپ ۇمىتتەنەمىز. كەزىندە ءبىزدىڭ ءۇيدى تابيعي گازعا قوسۋعا باستاماشى بولعان قالامىزدىڭ اكىمدىگىنە ۇلكەن راحمەت. بۇگىنگى تاڭدا بۇل ءبىز ءۇشىن وتە ۇلكەن جەڭىلدىك», دەپ ءتۇسىندىردى و.رەسنوۆا.
تۇرعىن ءۇي كەشەندەرىنىڭ تۇرعىندارى گازعا كوشۋدىڭ ارتىقشىلىقتارىن باعالادى. مايرا نۇراليەۆا متك-دا التى ايدان بەرى تۇرىپ جاتىر. ونىڭ ايتۋىنشا, ءۇي وتە جىلى, بارلىق جىلۋ جۇيەسى زاماناۋي ستاندارتتارعا ساي جابدىقتالعان.
ء«ۇي وتە جىلى. بىزگە گاز جۇرگىزىپ بەرگەنى جاقسى بولدى», دەپ پىكىرىن ءبىلدىردى كوپ پاتەرلى تۇرعىن ءۇي كەشەنىنىڭ تاعى ءبىر تۇرعىنى احات تولىمحان.
ەستەرىڭىزگە سالا كەتەيىك, بۇگىندە الماتى مەن سارىارقا اۋداندارى گازداندىرىلدى. گاز تاراتۋ جەلىلەرى 9 تۇرعىن الاپتارىندا جۇرگىزىلدى. ولار: «كوكتال-1», «كوكتال-2», «جەلەزنودوروجنىي», «پرومىشلەننىي», «اگروقالاشىق», «وڭتۇستىك-شىعىس», «ينتەرناتسيونالنىي», «ميچۋرينو», «كۇيگەنجار». «قازاقاۋىل», «اقبيداي» شاعىن اۋداندارى. سونداي-اق قالانىڭ پوتانين كوشەسىنىڭ ەسكى بولىگىندە گاز قوسۋ ءۇشىن ىسكە قوسۋ-جوندەۋ جۇمىستارى جالعاسۋدا.
