ەلوردانى كوشىرۋ تۋرالى ۇسىنىستى قازاقستاننىڭ تۇڭعىش پرەزيدەنتى نۇرسۇلتان نازارباەۆ 1994 جىلى قازاقستان رەسپۋبليكاسى جوعارعى كەڭەسىنىڭ وتىرىسىندا جاريا ەتتى. حالىق قالاۋلىلارى بۇل يدەيانى قولداپ, بىرنەشە جىلدان كەيىن ورتالىق مەملەكەتتىك ورگانداردىڭ ەلىمىزدىڭ جاڭا باس قالاسىنا كوشۋى باستالدى.
1995 جىلدىڭ 15 قىركۇيەگىندە نۇرسۇلتان نازارباەۆ «قازاقستان رەسپۋبليكاسىنىڭ استاناسى تۋرالى» جارلىققا قول قويىپ, وندا بيلىكتىڭ جوعارى جانە ورتالىق ورگاندارىن اقمولا قالاسىنا كوشىرۋ جونىندەگى جۇمىستى ۇيىمداستىرۋ ءۇشىن مەملەكەتتىك كوميسسيا قۇرۋدى تاپسىردى.
1997 جىلعى 20 قازاندا ەلىمىزدىڭ تۇڭعىش پرەزيدەنتى «اقمولا قالاسىن قازاقستان رەسپۋبليكاسىنىڭ استاناسى دەپ جاريالاۋ تۋرالى» جارلىققا قول قويدى. قۇجاتقا سايكەس اقمولا 1997 جىلدىڭ 10 جەلتوقسانىندا تاۋەلسىز قازاقستاننىڭ جاڭا استاناسىنا اينالدى.
جارتى جىلدان كەيىن, 1998 جىلدىڭ ماۋسىم ايىندا قالانىڭ رەسمي تۇساۋكەسەرىن وتكىزدى.
نۇرسۇلتان نازارباەۆتىڭ 2005 جىلى جارىق كورگەن «ەۋرازيا جۇرەگىندە» اتتى كىتابىندا ەلباسى استانانى كوشىرۋ جانە ەلدىڭ باس قالاسى رەتىندە اقمولانى تاڭداۋ سەبەپتەرى تۋرالى اڭگىمەلەدى.
«جاڭا استانانى ىرىكتەۋدىڭ بارلىق كريتەريلەرى نەگىزىندە تاۋەلسىز قازاقستاننىڭ اكىمشىلىك جانە ساياسي ورتالىعىن اقمولا قالاسىنا ورنالاستىرۋ مۇمكىندىگى باسىم بولدى. ماسەلەن, 1994 جىلعى شىلدەدە استانانى 1000 شاقىرىمنان استام سولتۇستىككە, دالالى اقمولاعا اۋىستىرۋ تۋرالى شەشىم قابىلداندى. اقمولا قازاقستاننىڭ گەوگرافيالىق ورتالىعىنا جاقىن جانە قازاقستان ەكونوميكاسىنىڭ جەتەكشى جانە قارقىندى ءوسۋ نۇكتەلەرى بولىپ تابىلاتىن ماڭىزدى شارۋاشىلىق وڭىرلەرىنە جاقىن ورنالاسقان. قالا ءىرى كولىك ماگيسترالدارىنىڭ قيىلىسىندا ورنالاسقان جانە وسىعان بايلانىستى ەلىمىزدىڭ بارلىق وڭىرلەرىمەن بايلانىسقان. سونىمەن قاتار, قالا قازاقستان ءۇشىن كوپتەگەن شەت ەلدەرگە شىعۋدىڭ ەڭ وڭاي جولى بولىپ تابىلاتىن ترانسەۋرازيالىق ماگيسترالداردىڭ جانىندا ورنالاسقان», دەلىنگەن كىتاپتا.
استانانى كوشىرۋ تۋرالى شەشىم قابىلدانعان ساتتە اقمولا حالقىنىڭ سانى 290 مىڭ ادامدى قۇرادى. وسى جىلدار ىشىندە ءوسىم ميلليونعا جۋىق بولدى, ال قازىرگى نۇر-سۇلتاندا 1 ملن 200 مىڭنان استام ازامات تۇرادى.
ۋاقىت ەلوردانى كوشىرۋ بۇكىل قازاقستاندى جاڭعىرتۋ جونىندەگى جۇيەلى رەفورمالاردىڭ ماڭىزدى قۇرامداس بولىگىنە اينالعانىن كورسەتتى. بۇل ءۇشىن ەلدىڭ باس قالاسى تانىماستاي وزگەردى.
بۇگىندە ەلباسىنىڭ تاريحي جانە تاعدىرشەشتى جوباسى بولىپ تابىلاتىن نۇر-سۇلتان قالاسى - الەمدەگى ەڭ جاس استانا جانە ورتالىق ازياداعى ەڭ جىلدام دامىپ كەلە جاتقان قالا.
جىل سايىن قالادا تۇرعىن ءۇي, الەۋمەتتىك ينفراقۇرىلىم قۇرىلىسىنىڭ قارقىنى ارتىپ كەلەدى. Nur Otan پارتياسىنىڭ سايلاۋالدى باعدارلاماسىن ىسكە اسىرۋ اياسىندا 2025 جىلعا دەيىن ەلوردادا 50 مىڭ الەۋمەتتىك پاتەر, ءبىلىم بەرۋ, مەديتسينا, سپورت جانە ت. ب. نىساندار سالۋ جوسپارلانعان.
