ەلباسىمىز ايتىپ كورسەتكەندەي, سول قيىندىق اتاۋلىعا قاسقايا قارسى تۇرىپ, ۇزدىكسىز العا جىلجىعان ولاردىڭ قايسار رۋحى ەكەنى ءسوزسىز.
شىندىعىندا دا, الەمدى جايلاعان سوعىس ورتتەرىندە, باسقا تۇسكەن زوبالاڭ كەزەڭدەردە ۇلتىمىزدىڭ ايتۋلى تۇلعالارى حالقىنا باس بولىپ, بىرلىكتىڭ تۇتقاسىن ۇستاپ, ۇلتتى امان الىپ قالعانى ايداي انىق. سونىڭ ارقاسىندا ۇلى دالانى ساقتاپ, بۇگىنگى تاۋەلسىزدىككە قول جەتكىزدىك.
ەگەمەندىك العان جىلدارى دا اياقتان تىك تۇرىپ كەتۋ وڭايعا سوققان جوق. سول قيىن كەزەڭدەردە حالقىن قاناتتىعا قاقتىرماي, تۇمسىقتىعا شوقتىرماي, قايراڭعا قالدىرماي الەمدىك وركەنيەتتىڭ الدىڭعى شەبىنە قوسقان تۇڭعىش پرەزيدەنتىمىزدىڭ ەڭبەگى ەرەسەن. «بولاشاق» باعدارلاماسى ارقىلى «الەمدىك عىلىم مەن مادەنيەتتىڭ ەڭ ۇزدىك جەتىستىكتەرىن مەڭگەرگەن جاڭا ۇرپاق قالىپتاستىرۋدا» كەمەڭگەرلىكپەن جول اشقان ەلباسى ەكەنى ءسوزسىز.
كورەگەن كوشباسشى تەك قازاقستان حالقىنىڭ الدىندا عانا ەمەس, الەم حالقىنىڭ الدىندا دا بەدەلى وتە بيىك ساياساتكەر ەكەنىنە ماقتانامىز. الەمدە ەڭ ءبىرىنشى بولىپ اتوم سىناق الاڭىن جويعان, ارقا توسىندە الەمدەگى ەڭ ادەمى استانا نۇر-سۇلتان قالاسىن سالدىرعان تۇڭعىش پرەزيدەنت ن.ءا.نازارباەۆتىڭ كەمەل ساياساتى ومىرشەڭ بولعانىن تاريح بەتتەرىندە التىن ارىپتەرمەن جازىلىپ قويدى.
سارالاپ ايتا بەرسەك, سايىپقىران ساياساتكەر تۇلعا – ەلباسىنىڭ ەڭبەگى ەگەمەندىك ءۇشىن ەرەكشە. ول جاساعان ساياسي, ەكونوميكالىق رەفورمالار, رۋحاني جاڭعىرۋ, ينفراقۇرىلىمدىق دامۋ, ۇلتتىق تەڭگەنى اينالىمعا ەنگىزۋ, مۇنىڭ ءبارى تاۋەلسىزدىگىمىزدى تۇعىرلى ەتۋ جولىندا ەلباسى اتقارعان قاداۋ-قاداۋ سونى قادامدار بولاتىن. بۇل يگى ىستەردىڭ قاتارىندا سونداي-اق دۇنيە جۇزىنە تارىداي شاشىلعان ميلليوننان استام قانداستى قايتارۋ ءىسىن دە ايرىقشا اتاپ كەتكەنىمىز ءجون.
ءبىر سوزبەن ايتقاندا, تاۋەلسىزدىككە تۇعىر بولعان تۇلعا رەتىندە ەلباسى ەڭبەگى قازاق ءۇشىن ارقاشان ۇمىتىلماق ەمەس.
كەڭەس جۇمابەكوۆ,
مەملەكەتتىك سىيلىقتىڭ لاۋرەاتى, اكتەر-دراماتۋرگ
