پرەزيدەنت • 08 جەلتوقسان، 2021

توقاەۆ: جاستاردىڭ تىڭ يدەيالارى حالىقتىڭ يگىلىگىنە اينالادى

71 رەت كورسەتىلدى

قاسىم-جومارت توقاەۆ جاستاردى ەل تاۋەلسىزدىگىنىڭ 30 جىلدىق مەرەيتويىمەن قۇتتىقتاپ، بۇگىنگى كەزدەسۋدىڭ ەرەكشە ءمان-ماڭىزى بار ەكەنىن ايتتى. پرەزيدەنت تاۋەلسىزدىك ۇرپاقتارىن، شىن مانىندە، جاڭا قازاقستاننىڭ باستى سيمۆولدارىنىڭ ءبىرى رەتىندە اتاپ ءوتتى، دەپ حابارلايدى Egemen.kz.

– ەلىمىز دەربەس مەملەكەت بولعاننان بەرى ويى ەركىن، رۋحى ازات تۇتاس بۋىن ءوسىپ جەتىلدى. تاۋەلسىزدىك پەرزەنتتەرىنىڭ الدىڭعى تولقىنى ەرجەتىپ، ەل ىسىنە ارالاسۋدا. ولار وتانىمىزدىڭ ءوسىپ-وركەندەۋىنە ءوز ۇلەسىن قوسىپ كەلە جاتىر. مەن ەگەمەندىك كەزەڭىندە تۋىپ-وسكەن جاستارىمىزعا ارنايى گرانت ءبولۋدى تاپسىرعانمىن. بۇل – تالاپتى ۇل-قىزدارىمىزدىڭ باستامالارىن قولداۋ ءۇشىن جاسالعان قادام. قازاقتا «جاس كەلسە – ىسكە» دەگەن جاقسى ءسوز بار. حالقىمىز جاستارعا ءاردايىم زور سەنىم ارتىپ، ەرەكشە ءۇمىت كۇتەدى. ۇرپاقتىڭ تاربيەلى، ءبىلىمدى جانە  بىلىكتى بولۋىنا ايرىقشا دەن قويادى، – دەدى مەملەكەت باسشىسى.

قاسىم-جومارت توقاەۆ دارىندى جاستارىمىز ەلىمىزدىڭ بولاشاعىنا دەگەن سەنىمدى نىعايتا تۇسەتىنىن، ولاردىڭ تۋعان ەل ءۇشىن قىزمەت ەتۋگە قۇلشىنىسى قۋانتاتىنىن ايتتى.

– مەن گرانت جەڭىمپازدارى ۇسىنعان جوبالارمەن تانىسىپ شىقتىم. بۇل جوبالاردىڭ كوپشىلىگىندە ەكولوگياعا باسا ءمان بەرىلگەنىن بايقادىم. بۇل – وتە دۇرىس. ويتكەنى، قورشاعان ورتانى قورعاۋ – قازىر بارشا ادامزات ءۇشىن اسا ماڭىزدى ماسەلە. كەڭ بايتاق جەرىمىزدىڭ بىرەگەي تابيعاتىن ساقتاۋ – ءبارىمىزدىڭ قاسيەتتى بورىشىمىز. جاستاردىڭ تىڭ يدەيالارى ناقتى جۇزەگە اسىپ، حالىقتىڭ يگىلىگىنە اينالادى دەپ سەنەمىن. شىن مانىندە، بۇل ەلىمىزدىڭ مەرەيتويىنا تاۋەلسىزدىك ۇرپاقتارىنىڭ تارتۋى بولماق، – دەدى مەملەكەت باسشىسى. 

پرەزيدەنت جاستاردى قولداۋ مەملەكەتتىك ساياساتتىڭ نەگىزگى باعىتى ەكەنىنە توقتالدى. قاسىم-جومارت توقاەۆ وتكەن عاسىردىڭ 90-شى جىلدارىنداعى داعدارىس كەزىندە «بولاشاق» اتتى اۋقىمدى ءبىلىم باعدارلاماسىنىڭ جۇزەگە اسىرىلعانىن جانە ونىڭ تۇڭعىش پرەزيدەنتىمىز نۇرسۇلتان ءابىش ۇلى نازارباەۆتىڭ باستاماسى ەكەنىن اتاپ ءوتتى.

– سونىڭ ارقاسىندا الەمنىڭ ۇزدىك جوعارى وقۋ ورىندارىندا ەلىمىز بويىنشا مىڭداعان جاس ءبىلىم الدى جانە ءالى دە وقىپ جاتىر. ولاردىڭ كوبى قازاقستاننىڭ قارقىندى دامۋىنا زور ۇلەس قوسىپ كەلەدى. پرەزيدەنتتىك جاستار كادرلىق رەزەرۆى ءتيىمدى الەۋمەتتىك ليفتكە اينالدى. بۇل باستاما جاستاردىڭ، ءورشىل كاسىبي مامانداردىڭ مەملەكەتتىك باسقارۋ جۇيەسىندە ءوزىن تاعى ءبىر مارتە دالەلدەۋىنە مۇمكىندىك بەرەدى، – دەدى قاسىم-جومارت توقاەۆ.

سونىمەن قاتار پارتيالاردىڭ سايلاۋ تىزىمىندەگى 30 پايىزدىق كۆوتا ءماجىلىس پەن ءماسليحاتتاردا جاستار قاتارىنىڭ كوبەيۋىنە ىقپال ەتكەنىن ايتتى. پرەزيدەنت جاستاردى الەۋمەتتىك تۇرعىدان قولدايتىن جوبالار مەن باعدارلامالاردىڭ جۇزەگە اسىرىلىپ جاتقانىنا توقتالدى.

– جاستاردى قولداۋ ءۇشىن تۇرعىن-ءۇي باعدارلامالارى جانە ارنايى جوبالار جۇزەگە اسىرىلۋدا. مادەنيەت، عىلىم مەن ءبىلىم سالاسىندا تابىسقا جەتكەن دارىندى جاستارعا مەملەكەتتىك سىيلىق بەرىلۋدە. بۇگىنگى ءىس-شارا سىزدەردىڭ باستامالارىڭىزدى جانە شىعارماشىلىق جوسپارلارىڭىزدى جۇزەگە اسىرۋعا تىڭ سەرپىن بەرەتىنىنە كامىل سەنەمىن، – دەدى مەملەكەت باسشىسى.

قاسىم-جومارت توقاەۆ قازىرگى ۋاقىتتا تابىستى ادام ءبىلىمدى، ەڭبەكقور بولۋ، ماقساتقا ۇمتىلۋ جانە بەلسەندىلىك تانىتۋ سياقتى قاسيەتتەرىمەن عانا ەرەكشەلەنەتىنىن اتاپ ءوتتى. قاسىم-جومارت توقاەۆ گرانت جەڭىمپازدارىنا جوبالارىن ىسكە اسىرۋعا جاقسى مۇمكىندىك بەرىلىپ وتىرعانىن ايتتى.

– قازاقتا «تالاپتىعا جول بەر» دەگەن ناقىل ءسوز بار. مەملەكەت جاستاردىڭ تالابىن ۇشتاۋعا بارىنشا جاعداي جاساپ كەلە جاتىر. اتقارىلىپ جاتقان اۋقىمدى جۇمىستىڭ، رەفورمالاردىڭ يگىلىگىن سىزدەر مىندەتتى تۇردە كورەسىزدەر. جاقىندا ەلباسى جاستارعا تەرەڭ ماعىنالى ۇندەۋىن جولدادى. وسكەلەڭ ۇرپاق اعا بۋىننىڭ ءۇمىتىن اقتايتىنى ءسوزسىز. سول ءۇشىن ءاربىر جاس بويىنا تەك جاقسى قاسيەتتەردى ءسىڭىرۋى كەرەك، – دەدى پرەزيدەنت.

جيىن سوڭىندا مەملەكەت باسشىسى جاسامپاز، وتانشىل ءارى ۇلتجاندى جاستار عانا ەلىمىزدى وركەندەتە الاتىنىن ايتىپ، جاستاردىڭ بولاشاقتا كاسىبي مامان، ءوز ءىسىنىڭ ناعىز مايتالمانى بولاتىنىنا، سول ارقىلى اعا بۋىننان اسىپ تۇسەتىنىنە سەنىم ءبىلدىردى.

جاستار ءوز كەزەگىندە مەملەكەتتىڭ قولداۋى ءۇشىن پرەزيدەنتكە العىس ايتتى.

سوڭعى جاڭالىقتار

شابىت پەن شاراپ

ادەبيەت • بۇگىن، 22:13

ديلەتانتتان داۋىرگە دەيىن

ادەبيەت • بۇگىن، 21:57

ەرتەڭ اۋا رايى قانداي بولادى؟

قازاقستان • بۇگىن، 16:20

اندرادەنى مۋنگيا الماستىرۋى مۇمكىن

كاسىپقوي بوكس • بۇگىن، 14:25

ۇقساس جاڭالىقتار