پرەزيدەنت • 03 جەلتوقسان، 2021

پرەزيدەنت قايىرىمدى ىستەر مارافونىنىڭ تابىستى اياقتالۋىمەن قۇتتىقتادى

88 رەت كورسەتىلدى

قر پرەزيدەنتى قاسىم-جومارت توقاەۆ تاۋەلسىزدىگىمىزدىڭ 30 جىلدىعىنا وراي ۇيىمداستىرىلعان قايىرىمدى ىستەر مارافونىنىڭ تابىستى اياقتالۋىمەن قۇتتىقتادى، دەپ حابارلايدى Egemen.kz

مەملەكەت باسشىسىنىڭ قۇتتىقتاۋىن «جومارت جۇرەك» سىيلىعى لاۋرەاتتارىن ماراپاتتاۋ سالتاناتتى ءىس-شاراسىندا قر اقپارات جانە قوعامدىق دامۋ ءمينيسترى ايدا بالاەۆا وقىپ بەردى.

«بارشاڭىزدى تاۋەلسىزدىگىمىزدىڭ 30 جىلدىعىنا وراي ۇيىمداستىرىلعان قايىرىمدى ىستەر مارافونىنىڭ تابىستى اياقتالۋىمەن قۇتتىقتايمىن! بۇل – حالقىمىزدىڭ اسىل قاسيەتتەرىن دارىپتەپ، كوپشىلىكتى جاقسىلىق جاساۋعا جۇمىلدىراتىن جالپىۇلتتىق جوبا. مەرەيلى جىلدا ەلىمىزدە قوعامدىق ماڭىزى بار ناقتى جۇمىستار اتقارىلۋدا. وسى مارافون – سونىڭ جارقىن مىسالى»، دەپ اتاپ وتەدى قر پرەزيدەنتى.

مەملەكەت باسشىسىنىڭ دەرەگىنشە، باستامانى ءبىر جىلدىڭ ىشىندە 3 ميلليون وتانداسىمىز قولدادى. 15 مىڭنان استام قايىرىمدىلىق شاراسى ۇيىمداستىرىلىپ، 200 مىڭ ادامعا كومەك بەرىلدى. مۇنىڭ ءبارى ۆولونتەر جىلىنداعى يگىلىكتى ىستەر جالعاسىن تاۋىپ، داستۇرگە اينالعانىن كورسەتەدى.

«الەمگە ىندەت تاراعان كەزدە حالقىمىز ۇلت بولىپ ۇيىسۋدىڭ وزىق ۇلگىسىن تانىتتى. جومارت جاندار كارانتين شەكتەۋلەرىنە بايلانىستى تابىسىنان ايىرىلعان جۇرتقا قولىنان كەلگەن كومەگىن اياعان جوق. ءوز قارجىسىنا ءدارى-دارمەك مەن مەديتسينالىق قۇرال-جابدىق الىپ بەرگەن ازاماتتار دا از ەمەس. شىن مانىندە، قيىندىققا تاپ بولعان ادامعا قامقورلىق جاساۋ – قانىمىزدا بار قاسيەت. سونداي-اق باسپاناعا مۇقتاج جۇزدەگەن وتباسىنا قۋانىش سىيلاعان «AsarUme»، «قارەكەت» قورلارىنىڭ قىزمەتى جوعارى باعالاۋعا لايىق. مەرەيتويلىق مارافون اياقتالعانىمەن، كوپشىلىككە شاراپاتى تيەتىن قايىرىمدى ىستەر جالعاسا بەرەدى دەپ سەنەمىن. جۇرتقا جاناشىرلىق تانىتىپ، حالىققا قامقورلىق كورسەتىپ جۇرگەن ازاماتتارعا شىنايى ريزاشىلىعىمدى بىلدىرەمىن. بارشاڭىزعا زور دەنساۋلىق، باق-بەرەكە تىلەيمىن!»، دەپ اتاپ وتەدى قاسىم-جومارت توقاەۆ.

سوڭعى جاڭالىقتار

مۇناي باعاسى ارزاندادى

ەكونوميكا • بۇگىن، 13:23

ۇقساس جاڭالىقتار