ەكونوميكا • 03 جەلتوقسان، 2021

اۋىل شارۋاشىلىعىندا پروبلەما از ەمەس

40 رەت كورسەتىلدى

سالاداعى نەگىزگى كۇرمەۋلى ماسەلەلەردى اۋىل شارۋاشىلىعى ءمينيسترى ەربول قاراشوكەەۆ سەناتتاعى پارلامەنتتىك تىڭداۋدا مالىمدەدى، دەپ حابارلايدى Egemen.kz.

«ەڭ الدىمەن، وسى جىلدىڭ 10 ايىندا سالانىڭ دامۋ قورىتىندىلارى تۋرالى قىسقاشا بايانداۋعا رۇقسات ەتىڭىزدەر. وسى كەزەڭ ىشىندە سالانىڭ جالپى ءونىمىنىڭ كولەمى 2،3%-عا تومەندەپ، 6،4 ترلن تەڭگەنى قۇرادى. سەبەبى - بيىلعى انومالدى قۇرعاقشىلىق. سونىڭ سالدارىنان وسىمدىك شارۋاشىلىعىنىڭ ءونىمى 6،1%-عا ازايدى. ال مال شارۋاشىلىعىندا ءونىم 3،7%-عا، تاماق وندىرىسىندە 3،6%-عا ءوستى. سالانىڭ نەگىزگى كاپيتالىنا قۇيىلاتىن ينۆەستيتسيالار تۇراقتى تۇردە ءوسىپ، ولاردىڭ جالپى كولەمى 41،9%-عا كوبەيدى، بۇل كورسەتكىش تاماق ونەركاسىبىندە 5،9%-عا ارتتى»، دەدى ە. قاراشوكەەۆ «اۋىل شارۋاشىلىعىن دامىتۋدىڭ وزەكتى ماسەلەلەرى مەن پەرسپەكتيۆالارى» تاقىرىبىنا ارنالعان پارلامەنتتىك تىڭداۋدا.

مينيستر مالىمەتىنشە، سالا ءالى دە بولسا تاۋەكەلى جوعارى، تابيعي-كليماتتىق جاعدايلارعا تاۋەلدى بولىپ وتىر. ونىڭ نەگىزگى سەبەپتەرى – تەحنيكالىق جانە تەحنولوگيالىق ارتتا قالۋشىلىق پەن وندىرىستەگى ەكستەنسيۆتىك ادىستەردىڭ باسىمدىعى.

«اتاپ ايتسام، وسىمدىك شارۋاشىلىعى ءارتاراپتاندىرۋدى اياعىنا جەتكىزۋدى قاجەت ەتەدى. وندا قولدانىستا ارتتا قالعان اگروتەحنولوگيالار ءالى دە بولسا باسىم، اۋىسپالى ەگىس قاعيدالارى دۇرىس ساقتالمايدى، توپىراق قۇنارلىلىعى تومەندەۋدە. وسىنىڭ ءبارى جەر پروتسەستەرىن باقىلاۋدىڭ جەتىك تەتىكتەرىنىڭ ءالى دە بولسا جوقتىعىنان بولىپ وتىر. سونىمەن قاتار، سەلەكتسيانىڭ ەسكىرگەن ادىستەرىنە نەگىزدەلگەن تۇقىم شارۋاشىلىعى جۇيەسى دە ۋاقىت تالاپتارىنا ساي ەمەس جانە سونىڭ سالدارىنان تۇقىمدار بويىنشا يمپورتقا تاۋەلدى بولۋ قاۋپى بار»،  دەدى مينيستر.

ونىڭ سوزىنە قاراعاندا، مال شارۋاشىلىعىنىڭ نەگىزگى كەمىستىگى – ول سالانى جەم-ءشوپ بازاسىنىڭ مۇمكىندىگىنە قاراماي دامىتۋىندا. ەلىمىزدە مال ازىعى زووتەحنيكالىق نورمادان 2 ەسە از وندىرىلەدى. جايىلىمداردىڭ 20%-دان 60%-عا دەيىنگى بولىگى توزعان، ال جايىلىمدىق القاپتاردىڭ 42%-ى سۋلاندىرۋدىڭ جوقتىعىنان پايدالانىلماۋدا.

«ۆەتەريناريا سالاسىندا دا كەمشىلىكتەر بار. اۋىلدى جەرلەردە ۆەتەريناريالىق قىزمەت كورسەتۋ ءتيىستى دەڭگەيدە دامىماۋدا. بۇل سالاعا تسيفرلاندىرۋ ىستەرى ءالى دە بولسا جەتپەگەن، ماماندار قاعازباستى جۇمىستان ارىلماعان. سونىمەن قاتار، ورتالىق جانە جەرگىلىكتى اتقارۋشى ورگانداردىڭ ۆەتەريناريالىق قىزمەتتەرى اراسىندا وكىلەتتىكتەردىڭ اراجىگىن تولىق اجىراتۋ قاجەت. مال دارىگەرلەرىنىڭ جالاقىسى وتە تومەنگى دەڭگەيدە»، دەدى ەربول قاراشوكەەۆ.

سوڭعى جاڭالىقتار

نگاننۋ ءجۋرناليستىڭ اۋزىن جاپتى

جەكپە-جەك • بۇگىن، 18:00

ۇقساس جاڭالىقتار