بيزنەس • 03 جەلتوقسان، 2021

22،5 ملرد تەڭگە: وڭىرلەردەگى بيزنەستى ميكروقارجىلاندىرۋعا اگرارلىق نەسيە كورپوراتسياسى قارجى ءبولدى

62 رەت كورسەتىلدى

«بايتەرەك» ۇبح ەنشىلەس ۇيىمى «اگرارلىق نەسيە كورپوراتسياسى» اق ميكروقارجى ۇيىمدارىن (مقۇ) قورلاندىرۋ ءۇشىن كرەديتتىك جەلىلەر اشتى. ناتيجەسىندە، ەندى جىلدىق مولشەرلەمەسى 6% بولاتىن جەڭىلدەتىلگەن نەسيە شاعىن بيزنەس ءۇشىن قولجەتىمدى بولىپ وتىر. «اتامەكەن» ۇكپ جانە جەرگىلىكتى اتقارۋشى ورگانداردىڭ قاتىسۋىمەن قۇرىلعان 15 مقۇ – اگرارلىق نەسيە كورپوراتسياسىنىڭ سەرىكتەسى. بۇل قارجى ينستيتۋتتارى نۇر-سۇلتان جانە الماتى قالالارىنان باسقا، ەلىمىزدىڭ بارلىق وڭىرىندە جۇمىس ىستەيدى.

اتالعان بيۋدجەتتىك قارىزدى «باستاۋ بيزنەس» جوباسىنىڭ جانە دە باسقا مەم­لەكەتتىك باعدارلامالار شەڭبەرىندەگى كاسىپكەرلىك نەگىزدەرىن وقىتۋ كۋرستارىنىڭ تۇلەكتەرى الا الادى.

– كاسىپكەرلەردىڭ بيزنەس-باستامالارىن قولداۋ ءۇشىن «جۇمىسپەن قامتۋدىڭ جول كارتاسى» باعدارلاماسى اياسىندا 22،5 ملرد تەڭگە ءبولىندى. بۇل قاراجات جاڭادان ءىس باستاعان كاسىپكەرلەرگە، شاعىن بيزنەس، ميكروكاسىپكەرلىك وكىلدەرىنە، ونىڭ ىشىندە وتباسىلىق جانە الەۋمەت­تىك كاسىپكەرلىكتى دامىتۋعا باعىتتالعان. كاسىپ­كەرلەر وسى ماقساتتا تومەندەتىلگەن پايىز­دىق مولشەرلەمەمەن جەڭىلدەتىلگەن كرە­ديتتەر الا الادى. مال شارۋاشىلىعى سالاسىنداعى جوبالاردىڭ كرەديتتەۋ مەرزىمى 7 جىل بولسا، باسقا سالالاردا 5 جىلدى قۇرايدى، – دەپ اتاپ ءوتتى اگرارلىق نەسيە كورپوراتسياسى باسقارما توراعاسىنىڭ ورىنباسارى ايجان كەنجەباەۆا.

جەڭىلدەتىلگەن نەسيە الۋعا قويىلاتىن تالاپ قيىن ەمەس. قارجىلاي كومەك الۋعا نيەتتىلەردە «باستاۋ بيزنەس» جوباسى­نىڭ نەمەسە باسقا دا مەملەكەتتىك باعدار­لامالاردىڭ سەرتيفيكاتى، سونداي-اق كەپىل مۇلكى بولۋى قاجەت. ياعني ارنايى كۋرستار­دا ءبىلىمى جەتىلدىرىلگەنىن ايعاقتايتىن قۇجات­تىڭ بولۋى شارت. بيزنەس-جوسپاردى ءساتتى قورعاعان قاتىسۋشى مقۇ-دان نە­سيەنى راسىمدەي الادى.

اۋىلدىق ەلدى مەكەندەر (ولاردىڭ اكىم­شىلىك باعىنىستىلىعىنا قاراماستان) جانە شاعىن قالالارداعى كاسىپكەرلەر – 2،5 مىڭ اەك-كە دەيىن (7،2 ملن تەڭگە); قالالار، مونوقالالاردا ءىس باستاعاندار (شىمكەنت، اقتاۋ، اتىراۋدان باسقا) – 6،5 مىڭ اەك-كە دەيىن (18،9 ملن تەڭگە); شىمكەنتتە، اقتاۋدا، اتىراۋدا كاسىپ يەلەرى 8 مىڭ اەك-كە دەيىن (23،3 ملن تەڭگە) الا الادى.

قازىر كاسىپكەرلەردىڭ مقۇ-دان بيۋدجەتتىك نەسيە الۋعا مۇمكىندىكتەرى بار. بۇگىنگە دەيىن بولىنگەن 22،5 ملرد تەڭگەدەن «اگرارلىق نەسيە كورپوراتسياسى» اق ميكروقارجى ۇيىمدارىنان جالپى سوماسى 4،7 ملرد تەڭگەگە ءوتىنىم قابىلدادى. ونىڭ ىشىندە قازىرگى ۋاقىتتا 2،6 ملرد تەڭگەگە ميكروكرەديت بەرىلدى.

وسى باعدارلامانى ىسكە اسىرۋ ناتي­جەسىندە اگرارلىق نەسيە كورپوراتسياسى قولجەتىمدى قارجىلاندىرۋمەن كاسىپكەرلىك سۋبەكتىلەرىنىڭ كەڭ اۋقىمىن قامتۋعا سەپتىگىن تيگىزەدى. ءوز كەزەگىندە بۇل اۋىلدىق جەرلەردەگى ازاماتتاردىڭ ءال-اۋقاتىنىڭ ارتۋىنان كورىنەدى. كەيىنگى جىلدارى جاڭا وندىرىستەر اشىلىپ، جۇمىس ورىندارى پايدا بولۋدا، قىزمەت كورسەتۋ سالاسى دامىپ جاتىر.

جىل باسىندا مينيسترلىك ءتيىستى زاڭ جوبالارىن قابىلداۋ ارقىلى Doing Business رەيتينگىندە 20 ۇزدىك ەلدىڭ قاتارىنا كىرۋ كوزدەلىپ وتىرعانىن حابارلادى. ول ءۇشىن بىرقاتار ءىس-شارا ازىرلەنىپ جاتقانى دا ءمالىم بولدى. پرەزيدەنت تە جاقىندا قازاقستاندا اككرەديتتەلگەن شەتەلدەردىڭ ديپلوماتيالىق ميسسيالارىنىڭ باسشىلارىمەن كەزدەسۋ بارىسىندا ەلدەگى ەكونوميكانىڭ ءوسۋ قارقىنىنا توقتا­لىپ، ءدال وسى جوسپار تۋرالى ءسوز قوزعادى. «مەملەكەتتىك اپپاراتتىڭ ساياسي تۇراق­تىلىعى مەن تيىمدىلىگىن ەكونوميكالىق وسىمنەن ءبولىپ قاراۋعا بولمايدى. بۇل با­عىتتا بىرقاتار جەتىستىك بار. 2019 جىل­دىڭ 10 ايىندا ەلىمىزدىڭ ىشكى جالپى ءونىمى 4،4 پايىزعا ءوستى. Doing Business-2020 رەيتينگىندە قازاقستان 25-ورىندا. باسەكەگە قابىلەتتىلىكتىڭ جاھاندىق يندەكسىندە ەلىمىز 55-ورىندا تۇر. الداعى بەس جىل ىشىن­دە حالىقارالىق رەيتينگتەگى پوزيتسيا­مىز­دى ايتارلىقتاي جاقسارتۋدى جوسپارلاپ وتىرمىز»، دەدى قازاقستان پرەزيدەنتى.

بۇل باعدارلاما پرەزيدەنت قاسىم-جومارت توقاەۆتىڭ ميكروقارجىلاندىرۋ­دى دامىتۋ بويىنشا تاپسىرمالارىن ىسكە اسىرۋعا ىقپال ەتە وتىرىپ، جاڭادان كاسىپ باستاعان كاسىپكەرلەردىڭ قارجىعا قول­جە­تىمدىلىگىن ايتارلىقتاي جەڭىلدەتۋگە مۇمكىندىك بەرەدى.

سوڭعى جاڭالىقتار

مۇناي باعاسى ارزاندادى

ەكونوميكا • بۇگىن، 13:23

دوستىق بەسىگى

ايماقتار • بۇگىن، 08:43

ەل كۋبوگى ءۇشىن تالاسادى

فۋتبول • بۇگىن، 08:40

شيرەك فينالدا ۇتىلدى

تەننيس • بۇگىن، 08:39

دايارلىقتارىن پىسىقتادى

حوككەي • بۇگىن، 08:37

ۇقساس جاڭالىقتار