قمدب قاجىلىق ءبولىمى ۇمرا جانە قاجىلىق پارىزىن وتەۋگە نيەت بىلدىرگەن ازاماتتارعا قويىلاتىن تالاپتاردى ءتۇسىندىردى. تالاپ بويىنشا, ساۋد ارابياسىنىڭ ەل جانە شەتەل ازاماتتارىن ىندەتتەن ساقتاندىرۋ ماقساتىندا بەكىتىلگەن ەكپەنىڭ ءبىرىن سالدىرۋ تالابى ورىندالۋى ءتيىس. بۇل تىزىمدە Pfizer-BioNTech, AstraZeneca, Johnson&Johnson جانە Moderna ەكپەلەرى عانا بار. قازاقستاندا ولاردىڭ تەك ءبىرىنشىسىن عانا الۋعا بولادى.
«ەندى دارىگەرلەردىڭ كەڭەسىمەن Pfizer ۆاكتسيناسىن قابىلداعان كەز كەلگەن ازامات سەنىمدى دەپ سانالعان قاجىلىق كومپانيالارىنىڭ بىرىمەن زاڭدى جولمەن ۇمرا قاجىلىعىن اتقارىپ قايتۋىنا بولادى. قازىرگى ۋاقىتتا كىشى قاجىلىق وتەۋگە نيەت ەتكەن جانداردىڭ قاتارى كوبەيۋدە. مەككە مەن ءمادينا قالاسىنداعى مەشىتتەردە كۇنىنە بىرنەشە رەت زالالسىزداندىرۋ جۇمىستارى جۇرگىزىلىپ, قاجىلاردىڭ قاۋىپسىزدىگى باستى نازارعا الىنۋدا», دەلىنگەن قمدب حابارلاماسىندا.
