بانگكوكتە كولىك قوزعالىسى قالپىنا كەلتىرىلدى

بانگكوك بيلىگى قالاداعى كولىك قوزعالىسىن قالپىنا كەلتىردى, دەپ حابارلايدى يتار-تاسس اگەنتتىگى. وپپوزيتسيانىڭ «بانگكوكتى جابايىق» اتتى ءىس-شاراسى 49 كۇنگە سوزىلدى. ونىڭ بارىسىندا وپپوزيتسيونەرلەر قالاداعى ءىرى كوشەلەردى بوگەپ تاستاعان بولاتىن. بۇگىن كوشە قيىلىستارىنداعى بارريكادالار تۇگەل الىنىپ, كولىك قوزعالىسى قالپىنا كەلتىرىلدى. ەرەۋىلشىلەر ەندى بانگكوكتاعى ليۋمپيني ساياباعىنا قاراي ىعىستى. ءبىر تاۋلىك ىشىندە مۇندا ونداعان شاتىر ورناتىلدى. وندا نارازىلىق اكتسياسىنا قاجەتتى قۇرال-جابدىقتار ساتىلىپ, وپپوزيتسيونەرلەرگە تاماق ازىرلەنۋدە. ءتىپتى, ميتينگتەن شارشاپ كەلگەن ەرەۋىلشىلەرگە ارنالعان ماسساج سالوندارى دا بار كورىنەدى. ال بانگكوكتىڭ سولتۇستىگىندەگى چاەنگ ۆاتتانا اۋدانىنداعى نارازى توپ بۇلارعا قوسىلۋدى ۇيعارمادى. دەگەنمەن, ولار دا كولىك قوزعالىسىن قالپىنا كەلتىرۋ ماقساتىندا كوشەدەگى بوگەتتەرىن الىپ تاستاپ, اۋدانداعى مەملەكەتتىك قىزمەتكەرلەرگە ءوز جۇمىستارىنا ورالۋعا مۇمكىندىك بەرگەن ەكەن. ايدار ورىسباەۆ. دەرەككوز: Itar-tass.com. فوتو: Itar-tass.com.