مازمۇندى جيىندى جۇرگىزگەن ەۋرازيا ۇلتتىق ۋنيۆەرسيتەتىنىڭ رەكتورى, اكادەميك ەرلان سىدىقوۆ مەرەيتوي يەسىنىڭ قاراپايىم جۋرناليستەن, ەل بيلىگى مەن ەلشىلدىك قىزمەتتەردىڭ جاۋاپتى ساتىلارىنا دەيىن, سونىڭ ىشىندە مادەنيەت ءمينيسترىنىڭ ورىنباسارى, «ەگەمەن قازاقستان» رگ» اق پرەزيدەنتى, اقپارات ءمينيسترى, پارلامەنت ءماجىلىسىنىڭ دەپۋتاتى سەكىلدى قىزمەتتەردى باعىندىرعان ايتۋلى ازاماتتىڭ مەرەيتويىنا ارنالعان كونفەرەنتسيانىڭ ماڭىزى بولەك ەكەنىنە توقتالىپ, العاشقى ءسوزدى مەملەكەتتىك حاتشى قىرىمبەك كوشەرباەۆقا بەردى.
قىرىمبەك ەلەۋ ۇلى ءوز سوزىندە تانىمال تۇلعانىڭ تاۋەلسىز قازاقستاندى قۇرۋعا جانە رۋحانيات سالاسىن بايىتۋعا ولشەۋسىز ۇلەس قوسقانداردىڭ ءبىرى ەكەندىگىن باسا ايتتى.
– ساۋىتبەك ابدراحمانوۆ – جەمىسى مول جەتپىس جاسقا مەملەكەت جانە قوعام قايراتكەرى, ساليقالى ساياساتكەر, قارىمدى قالامگەر اتانىپ, ابىرويمەن جەتىپ وتىر. شىعارماشىلىعى لايىقتى باعالانىپ, مەملەكەتتىك سىيلىقتىڭ لاۋرەاتى بولدى, ەل-جۇرتتىڭ الدىندا بەدەلدى حالىق قالاۋلىسىنا اينالدى. اۋدارمانىڭ قىر-سىرىن, پۋشكين تۋىندىلارىنىڭ تابيعاتىن زەرتتەپ, ادەبيەتتانۋشى-عالىم اتاندى. ءسوزىنىڭ سالماعى, ءىسىنىڭ ونەگەسى بار ساۋكەڭدى قۇرمەتتەپ, بۇگىنگىدەي حالىقارالىق كونفەرەنتسيا وتكىزۋ – وتە ورىندى.
ول – ەل ىسىنە ەرتە ارالاسىپ, اتقا قونعان ازامات. جەر ءجۇزىن شارلاپ, كوپتى كوردى. الەمنىڭ 61 مەملەكەتىن ارالاپ, قىزىقتى رەپورتاجدار مەن وچەركتەر جازدى, − دەي كەلىپ, مەرەيتوي يەسىنىڭ مىقتى اۋدارماشى رەتىندە بىرقاتار الەمدىك تۋىندىنى انا تىلىمىزدە سويلەتىپ, «ەگەمەن قازاقستان» گازەتىن باسقارعاندا تاۋەلسىزدىك شەجىرەسىن جازىپ, «شەرحاننىڭ شەكپەنى», «بەردىقۇلوۆتىڭ بەشپەنتى» سەكىلدى «ساۋىتبەكتىڭ ساۋىتىنان» شىققان جۋرناليستەردىڭ ءوزى ءبىر قاۋىم ەكەندىگىن اتاپ ءوتتى.
ودان كەيىن مەملەكەت جانە قوعام قايراتكەرى, كورنەكتى عالىم مىرزاتاي جولداسبەكوۆ ەلىمىز ەگەمەندىك العان جىلداردا بىرگە قىزمەت ىستەگەن ىزەتتى ءىنىسىنىڭ قايراتكەرلىك قىرى مەن ازاماتتىق كەلبەتى جايىندا پاراساتتى وي قوزعاپ, ونىڭ ماقتاۋعا دا, ماقتانۋعا دا تۇراتىن ۇلكەن ازامات ەكەندىگىن جەتكىزدى.
جۋرناليستيكا جامپوزىنىڭ سوڭىنان قالام ۇستاپ ەرگەن ىنىلەرىنە دەگەن ءىلتيپاتى مەن قۇرمەتى دە ەرەكشە. ونى قازاقستان پرەزيدەنتىنىڭ كەڭەسشىسى, اكادەميك باۋىرجان ومار ۇلى مەرەيتوي يەسىن ادەمى ءازىل, ورنەكتى سوزبەن ورگەن بايانداماسىندا جان-جاقتى جەتكىزدى.
«ساۋىتبەك ابدراحمانوۆ – انىقتاۋىشى التى اۋىز ءسوزدى قۇرايتىن ەلەۋلى ەسىم, قارىمدى قالامگەر, قاجىرلى قايراتكەر, ساليقالى ساياساتكەر, ماڭعاز مەملەكەتتىك قىزمەتشى, داڭقتى دەپۋتات, شيراق شەنەۋنىك, مارتەبەلى مينيستر, ايبارلى اقپاراتشى, ازۋلى اپپاراتشى, الىمدى اۋدارماشى, الەۋەتتى ادەبيەتتانۋشى, پاراساتتى پۋشكينتانۋشى. وسى اسەرلى ەپيتەتتەردىڭ ءبارى ونىڭ ءومىر جولىنىڭ ءار تۇسىن ورنەكتەيدى, ەندى, مىنە, وعان جەتپىستەگى جىگىت دەگەن تاماشا تىركەس قوسىلدى», دەپ جينالعانداردى ءبىر جەلپىندىرىپ الدى.
ابزال ازاماتتىڭ سانالى عۇمىرىنىڭ باسىم بولىگى ەلىمىزدىڭ باس باسىلىمىندا ءوتىپ, ەل گازەتىنىڭ كەڭ قانات جايۋىنا ۇلكەن ۇلەس قوستى. «ەگەمەن قازاقستان» رگ» اق باسقارما توراعاسى, اكادەميك دارحان قىدىرالى قازىعۇرتتان شىعىپ, قازاق دالاسىن كوزىنىڭ قاراشىعىنا سىيدىرىپ, قالامىنىڭ ۇشىنا قوندىرعان قالامگەر تۋرالى سالماقتى ءسوز ءوربىتتى.
– ساۋىتبەك اعا ءوزى ەڭبەك جولىن باستاعان «سق»-نىڭ مۇراگەرى – «ەگەمەن قازاقستان» گازەتىنىڭ باسشىلىعىنا كەلگەن سوڭ, ەكىنشى تىنىسى اشىلىپ, كەڭىنەن كوسىلدى. شىعارماشىل ينتەللەكتۋالدىق الەۋەتى, قايراتكەرلىك قارىمى باس باسىلىمدا جارقىراي كورىنىپ, تۇتاستاي سالانىڭ جاۋاپكەرشىلىگىن ارقالاعان مينيسترلىك مانساپقا, بۇگىنگى حالىق قالاۋلىلارىنىڭ قاتارىنا, ەلدىكتىڭ ءسوزى ايتىلاتىن بيىك مىنبە – دەپۋتاتتىق دارەجەگە جەتتى. وسى جىلدار بەدەرىندە جۋرناليستىك قابىلەتىن قارىمدى قالامگەرلىك ساپادان, قاجىرلى عالىمدىق دەڭگەيگە, ۇلاعاتتى ۇستازدىققا ۇشتاستىرعان تۇلعانىڭ مادەنيەتتانۋشى, زەرتتەۋشى, اۋدارماشى, پۋبليتسيست رەتىندە بويىنا جيناعان مول ءبىلىمىن قالام قۋاتى ارقىلى ۇلت رۋحانياتىنا سۇبەلى قازىنا رەتىندە قوستى, – دەدى ول.
سونداي-اق جيىندا قازاقستان رەسپۋبليكاسى ارداگەرلەر كەڭەسىنىڭ توراعاسى, مەملەكەت جانە قوعام قايراتكەرى باقتىقوجا ىزمۇحامبەتوۆ, مادەنيەت جانە سپورت ۆيتسە-ءمينيسترى نۇرعيسا داۋەشەۆ, نۇر-سۇلتان قالاسى اكىمىنىڭ ورىنباسارى اسحات ورالوۆ جانە كورشى رەسەي ەلىنەن «حۋدوجەستۆەننايا ليتەراتۋرا» باسپاسىنىڭ ديرەكتورى, قوعام قايراتكەرى گەورگي پرياحين ونلاين بايلانىسقا شىعىپ, مەرەيتوي يەسىنە جىلى لەبىزىن ءبىلدىردى. سونىمەن قاتار كونفەرەنتسيا بارىسىندا ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى عىلىمي كەڭەسىنىڭ شەشىمىمەن ساۋىتبەك ابدراحمانوۆقا اتالعان وقۋ ورنىنىڭ «قۇرمەتتى پروفەسسورى» اتاعى بەرىلىپ, قالامگەردىڭ «ەلدىك ەرلىگى» اتتى 5 تومدىق پۋبليتسيستيكالىق شىعارمالارى تانىستىرىلدى. ودان كەيىن حالىقارالىق كونفەرەنتسيا سەكتسيالىق ماجىلىسكە جالعاستى.
