اشم سۋبسيديالاۋدا جەمقورلىققا قارسى كۇرەستى كۇشەيتەدى

سىبايلاس جەمقورلىققا قارسى ءىس-قيمىل اگەنتتىگىندە مەملەكەت باسشىسىنىڭ تاپسىرماسى بويىنشا جۇرگىزىلگەن اۋىل شارۋاشىلىعىن سۋبسيديالاۋ سالاسىنداعى سىبايلاس جەمقورلىق تاۋەكەلدەرىنە كەشەندى تالداۋ ناتيجەلەرىن قاراۋ جونىندەگى كەڭەستىڭ وتىرىسى ءوتتى.

ءىس-شاراعا قارجى، ۇلتتىق ەكونوميكا، تسيفرلىق دامۋ جانە اەروعارىش ونەركاسىبى مينيسترلەرى، باس پروكۋروردىڭ، قارجى مونيتورينگى اگەنتتىگى توراعاسىنىڭ ورىنباسارلارى، سونداي-اق اۋىل شارۋاشىلىعى ءمينيسترىنىڭ (اشم) مىندەتىن اتقارۋشى جانە اشم سالالىق دەپارتامەنتتەرىنىڭ باسشىلارى قاتىستى.

سونىمەن قوسا، كەڭەسكە اگەنتتىكتىڭ كونسۋلتاتيۆتىك-كەڭەسشى ورگاندارىنىڭ جانە قوعامنىڭ وكىلدەرى شاقىرىلدى.

كەڭەستى اشقان اگەنتتىك توراعاسى م. احمەتجانوۆ مەملەكەت باسشىسىنىڭ تاپسىرماسىن ورىنداۋ بويىنشا سالالىق مينيسترلىك قابىلداپ جاتقان شارالارعا الاڭداۋشىلىق ءبىلدىردى:

ء«بارىن كوزبوياۋشىلىق پەن تاپسىرمانى ورىنداۋ تۋرالى ەسەپ ءۇشىن جاساۋعا بولمايدى. بۇل رەتتە جۇرتشىلىق پەن فەرمەرلەردى جۇمىسقا ءفورمالدى تۇردە تارتپاۋ كەرەك. ولاردى بۇل جۇمىسقا شىنايى جۇمىلدىرۋ قاجەت، ولار ءوز ۇسىنىستارىن ءبىلدىرىپ، ەگەر ناقتى ۇسىنىستارى بولسا، ءتىپتى ەرەجەلەردى «جازۋى» ءتيىس»، دەپ اتاپ ءوتتى م. احمەتجانوۆ.

اگەنتتىك توراعاسى مۇددەلى تاراپتاردى تارتا وتىرىپ، تالقىلاۋ بارىسىندا جاعدايدى تۇزەتۋ بويىنشا وڭتايلى شەشىمدەر ازىرلەنەتىن تالداۋ قورىتىندىلارى بويىنشا ازىرلەنگەن ۇسىنىمداردى بىرلەسىپ پىسىقتاۋ قاجەتتىگىنە ەرەكشە نازار اۋداردى.

«اگەنتتىك اگروساياساتقا ەش ارالاسپايدى. ءبىز مامان ەمەسپىز، فەرمەر ەمەسپىز. ءبىز ءۇشىن بيۋدجەت اقشاسىنىڭ ۇرلانباۋى جانە وندا جەمقورلىقتىڭ بولماۋى ماڭىزدى. ەڭ باستىسى، سۋبسيديالاردى شىنىمەن لايىقتى، ءوندىرىستى دامىتىپ، جۇمىس ورىندارىن قۇرىپ، حالىق ءۇشىن ءونىمدى ارزانداتىپ، ەل ەكونوميكاسىن كوتەرەتىندەر الۋى كەرەك»، دەپ اتاپ ءوتتى سىبايلاس جەمقورلىققا قارسى ۆەدومستۆو باسشىسى.

ءوز كەزەگىندە اگەنتتىكتىڭ سوتقا دەيىنگى تەرگەۋ قىزمەتىنىڭ باسشىسى ا. جۇماعالي تالداۋ بارىسىندا انىقتالعان نەگىزگى سىبايلاس جەمقورلىق تاۋەكەلدەرىن بەلگىلەپ، تەرگەۋدىڭ وزەكتى ناتيجەلەرىن اتاپ ءوتتى. بۇگىندە وندىرىستە 54 ءىس بار. 22 ادام كۇدىكتى دەپ تانىلىپ، 16 ادامنىڭ ءىس-ارەكەتى سارالاندى. ونىڭ 14-ءى قاماۋدا، ەكەۋى ءۇي قاماعىندا. قىلمىستىق جاۋاپكەرشىلىككە تارتىلعانداردىڭ اراسىندا - 11 لاۋازىمدى تۇلعا، ونىڭ ىشىندە ۇاعبو-نىڭ 2 قىزمەتكەرى بار. 2 ادام سوتتالدى. بۇل ىستەر بويىنشا الدىن الا شىعىن 2،6 ملرد تەڭگەدەن اسادى.

سالاداعى جىمقىرۋدى بولدىرماۋ ءۇشىن تسيفرلىق دامۋ جانە اەروعارىش ونەركاسىبى ءمينيسترى ب.مۋسين سۋبسيديالاۋ پروتسەسىنىڭ قاراپايىمدىلىعىن، اشىقتىعىن جانە دۇرىستىعىن قامتاماسىز ەتۋگە مۇمكىندىك بەرەتىن شەشىمدەردى ۇسىندى.

باسقا مەملەكەتتىك ورگانداردىڭ وكىلدەرىنەن دە بىرقاتار ناقتى ۇسىنىستار ءتۇستى. ونى اشم جانىنان قۇرىلعان جۇمىس توبى پىسىقتاۋعا الدى.

اۋىل شارۋاشىلىعى ۆيتسە-ءمينيسترى ا. ساپاروۆ ءوز بايانداماسىندا اگەنتتىككە اتقارعان جۇمىسى ءۇشىن العىسىن ءبىلدىردى، سونداي-اق كەڭەسكە قاتىسۋشىلاردى بەيىندى ۆەدومستۆونىڭ انىقتالعان جەمقورلىق تاۋەكەلدەرىن جويۋ بويىنشا بارلىق قاجەتتى شارالاردى قابىلدايتىنىن ايتتى.