زاڭسىز ويىنحانالار اشكەرەلەندى

جامبىل وبلىسىنىڭ ءىىد ءباسپاسوز قىزمەتى زاڭسىز جۇمىس ىستەگەن 15 ويىنحانانى انىقتادى. وڭىردە زاڭسىز ويىن اۆتوماتتارىن كاسىپكە اينالدىرعاندار از ەمەس. بىلتىر مۇندا ۇيىمداسقان قىلمىسپەن كۇرەس باسقارماسى 12 زاڭسىز ويىنحانا جۇمىسىن اشكەرەلەسە, جىل باسىنان بەرى وسىنداي 3 ويىن زالى انىقتالعان. تاركىلەنگەن 46 ويىن اۆتوماتى مەن 1 ەلەكتروندى رۋلەتكا قالا سىرتىنا شىعارىلىپ, جويىلدى. ءىس-شاراعا قۇزىرلى ورگان قىزمەتكەرلەرىمەن قاتار, قالا جاستارى دا قاتىستى. ولار قۇمار ويىنعا قارسىلىق ءبىلدىرىپ, قاتارلاستارىن بوس ادەتتەرگە قىزىقپاۋعا شاقىردى. ۇيىمداستىرۋشىلاردىڭ ايتۋىنشا, جاستاردى شاراعا قاتىستىرۋداعى باستى ماقسات تا وسى – قىلمىسقا يتەرمەلەيتىن ويىننان اۋلاق بولۋعا ۇندەۋ. «قازاقستان رەسپۋبليكاسىنىڭ «ويىن بيزنەسى تۋرالى» زاڭ تالاپتارىن بۇزۋ فاكتىلەرىن انىقتاۋ بويىنشا جۇرگىزىلگەن جەدەل ىزدەستىرۋ شارالارى بارىسىندا بىرنەشە ويىن زالىنىڭ زاڭسىز ارەكەتتەرى انىقتالدى. اتالمىش فاكت بويىنشا قىلمىستىق ءىس قوزعالدى», – دەلىنگەن وبلىستىق ءىىد ءباسپاسوز قىزمەتىنىڭ حابارلاماسىندا. ايدار ورىسباەۆ, «ەگەمەن قازاقستان».