«رەسپۋبليكالىق بيۋدجەت جۇكتەمەسىن تومەندەتۋ, ورمانداردى قورعاۋ ماسەلەسىندە جەرگىلىكتى اتقارۋشى ورگانداردىڭ جاۋاپكەرشىلىگىن ارتتىرۋ ماقساتىندا 2002 جىلى وبلىس اكىمدىكتەرىنىڭ جەدەل باسقارۋىنا ورمان جانە جانۋارلار دۇنيەسىن قورعاۋ جونىندەگى 124 مەملەكەتتىك مەكەمە بەرىلگەن بولاتىن. قازىرگى ۋاقىتتا ەرەكشە قورعالاتىن تابيعي اۋماقتار مەملەكەتتىك ورمان شارۋاشىلىعى مەكەمەلەرىنىڭ بازاسىندا جاڭا ورمان شارۋاشىلىقتارىنىڭ قۇرىلۋىنا بايلانىستى وبلىس اكىمدىكتەرىنىڭ قاراۋىندا 120 ورمان شارۋاشىلىعى بار. ولارعا 22,6 ملن گەكتار نەمەسە مەملەكەتتىك ورمان قورى جالپى اۋماعىنىڭ 74,7 پايىزى بەكىتىلگەن», دەدى ۆيتسە-پرەمەر جاۋابىندا.
ونىڭ اتاپ وتۋىنشە, بيىل بۇۇ دامۋ باعدارلاماسى مەن جاھاندىق ەكولوگيالىق قورى ورمانداردى باسقارۋدىڭ ماقساتتى ستسەناريىنە ساراپتاما جۇرگىزگەن. ساراپتاما قورىتىندىسى اتالعان كەزەڭدە وبلىس اكىمدىكتەرىنىڭ قاراماعىنا بەرىلگەن ورمان شارۋاشىلىعى مەملەكەتتىك مەكەمەلەرىنىڭ لايىقتى دەڭگەيدە دامىماعانىن كورسەتكەن.
«وسىعان وراي وكىلەتتى مەملەكەتتىك ورگان قازىرگى قولدانىستاعى ورمان شارۋاشىلىعىن باسقارۋ, جوسپارلاۋ جانە بيۋدجەت قاراجاتىن ءبولۋ تيىمدىلىگىنە باعالاۋ جۇرگىزەدى. بۇعان قوسا, مەملەكەت باسشىسىنىڭ 2021 جىلعى 1 قىركۇيەكتەگى قازاقستان حالقىنا جولداۋىنا سايكەس, ۇكىمەتكە وسى جىلدىڭ سوڭىنا دەيىن ازاماتتىق قىزمەتشىلەردىڭ ەڭ تومەنگى جالاقىسىن ارتتىرۋ بولىگىندە زاڭناماعا قاجەتتى وزگەرتۋلەر ەنگىزۋدى قامتاماسىز ەتۋ تاپسىرىلعان. وسىعان بايلانىستى قازىرگى ۋاقىتتا ازاماتتىق قىزمەتشىلەر لاۋازىمى تىزىلىمىنە ورمان شارۋاشىلىعى جانە جانۋارلار دۇنيەسى قىزمەتكەرلەرىن قوسۋ ماسەلەسى قاراستىرىلىپ جاتىر», دەدى رومان سكليار.
