ءىس-شارا تۇركيا ءۇشىن سيمۆولدىق ءمانى بار انكارادان شىعىسقا قاراي 80 شاقىرىم جەردەگى كىرىككالە ولكەسىندە ۇيىمداستىرىلدى. سەبەبى ءدال وسى جەردە تۇركيانىڭ 43 ولكەسىن توعىستىراتىن جول وتەدى. بايراكتەپە قىراتىنان قاشىقتا جەلبىرەپ تۇرعان ەلدىڭ ۇلكەن تۋى انىق كورىنەدى.
فلەشموبتى تۇركىستان قالاسىنىڭ قۇرمەتتى ازاماتى, قوجا احمەت ياسساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ تۇلەگى دوكتور فاتما سەنمەز ۇيىداستىردى. وعان جەرگىلىكتى مەملەكەتتىك جانە اتقارۋشى ورگاندار, تۇرىك جاستارى, ەرىكتىلەر جانە قازاقستاندى جاقسى كورەتىن جەرگىلىكتى تۇرعىندار كومەك كورسەتتى.
سوڭعى 27 جىل بويى فاتما سەنمەز ەلىمىزدى تۇركيادا تانىتۋعا زور ۇلەس قوسىپ كەلەدى. ول وسى ۋاقىتقا كەيىن قازاقستانمەن تىكەلەي بايلانىستى 530 ءىس-شارا ۇيىمداستىرعان.
«530 سانىنا تۋرا كەلگەن وسىناۋ ءىس-شارانى قازاقستان تاۋەلسىزدىگىنىڭ 30 جىلدىق مەرەيتويىنا وراي ادەيى ۇيىمداستىردىم. كەزىندە رۋحاني استانامىز تۇركىستاندا ءبىلىم العانىمدى ماقتان تۇتامىن. سول كەزدە تۇركى الەمىنىڭ نەگىزىن قالاۋشى ەلباسىمىزدى العاش رەت كورگەن ەدىم. بۇگىنگى ءىس-شارا سول كىسىنىڭ دە قۇرمەتىنە ارنالادى. ويتكەنى, كوشباسشىمىز ءارى تۇركى الەمىنىڭ اقساقالى ن.نازارباەۆ تەك قازاق حالقىنىڭ عانا ەمەس سونىمەن بىرگە بۇكىل تۇركى الەمىنىڭ يگىلىگى ءۇشىن ەڭبەك ەتىپ ءجۇر», دەدى ول.
