تۇركيانىڭ قازاقستانداعى ەلشىلىگىنىڭ قولداۋىمەن وتكەن كورمەگە اتالعان ورتالىقتىڭ ءۇش وقۋشىسىنىڭ 35 كارتيناسى ۇسىنىلدى. مازمۇندى ءىس-شارانىڭ اشىلۋىندا تۇركيانىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى ۋفۋك ەكيدجي ءسوز الىپ, كورمەنىڭ ماڭىزىنا توقتالىپ ءوتتى.
− نۇر-سۇلتان قالاسىندا يۋنۋس ەمرە اتىنداعى تۇرىك مادەني ورتالىعى ون جىلدان بەرى جۇمىس ىستەيدى. بۇل ورتالىق تۇرىك تىلىنەن ءدارىس بەرىپ قانا قويمايدى, ءتۇرلى مادەني شارالاردى وتكىزۋگە ۇيىتقى بولىپ ءجۇر. سونىڭ ءبىر بەلگىسى رەتىندە بۇگىنگى كورمەنى ايتۋعا بولادى. ماسەلەن, كەز كەلگەن ادام باسقا ەلگە ساپارلاپ بارسا, سول جەردىڭ تابيعاتى مەن مادەنيەتىن كورىپ, اسەرلەنەدى. ءبىزدىڭ جاس سۋرەتشىلەرىمىز تۇركياعا بارىپ, سول ەلدى, جەردى كورگەن اسەرلەرىن ءتۇرلى-ءتۇستى بوياۋ تۇسىمەن كوركەم جەتكىزە ءبىلدى. ولار وسى ەڭبەكتەرى ارقىلى ەكى ەل اراسىنداعى مادەني بايلانىستى بايىتىپ وتىر, − دەدى ەلشى.
كورمەگە سۋرەتى قويىلعان يۋنۋس ەمرە تۇرىك مادەنيەت ورتالىعىنىڭ وقۋشىسى, جاس سۋرەتشى ءاليا سۇلتانوۆانىڭ ايتۋىنشا, ول سۋرەتتى 5-سىنىپتان باستاپ سالادى ەكەن.
«مەن تۇركيانى كوپشىلىك بىلەتىن ەمەس, باسقا قىرىنان كورسەتكىم كەلدى. وسى كورمەگە 16 كارتينام قويىلدى. ونىڭ ىشىندە تۇركيانىڭ حالىق ءبيى «زەيبەك», ء«دارۋىش بي», «تاكسيم ترامۆايى», «اتاتۇرىك» پورترەتتەرى سەكىلدى جۇمىستارىم بار. سولار ارقىلى تۇركيا ەلىنىڭ سالت-ءداستۇرى مەن مادەنيەتىن تانىستىرۋعا كۇش سالدىم» دەسە, تاعى ءبىر جاس سۋرەتشى نەللي ۇركەنوۆا: «سۋرەتشىنىڭ شىعارمالارى – ونىڭ ىشكى ويىنىڭ ايناسى. مەنىڭ مەشىتتەرگە دەگەن ىقىلاسىم بولەك, ال تۇركياداعى مەشىتتەر وتە ەرەكشە. سوندىقتان كارتينالارىمنىڭ كوپشىلىگىندە سونى بەدەرلەدىم» دەدى. ال ءۇشىنشى جاس قىلقالام شەبەرى اينۇر مىرزاحمەتوۆانىڭ ء«دارۋىش», «تۇرىك شايى», «باكلاۆا», «تۇرىك اياق كيىمى», «كوز مونشاق», «گالاتا مۇناراسى» اتتى سۋرەتتەرى كەلۋشىلەردىڭ قىزىعۋشىلىعىن تۋعىزدى.
