ەلورداداعى بەيبىتشىلىك جانە كەلىسىم سارايىندا سۋرەتشىلەرىمىزدىڭ تاڭدامالى تۋىندىلارىنان تۇراتىن بەس تومدىق «قازاق ونەرى» اتتى كىتابىنىڭ تۇساۋكەسەرى مەن بەينەلەۋ ونەرى شەبەرلەرىنىڭ شىعارماشىلىق كورمەسى ءوتتى.
«قازاقستان سۋرەتشىلەر وداعىنىڭ 80 جىلدىق مەرەيتويى اتالىپ وتكەن بولاتىن. سوعان بايلانىستى مادەني ءىس-شارالار باعدارلاماسى اياسىندا «قازاق ونەرى» اتتى جيناقتى شىعارعان ەدىك. بۇل كىتاپ بەس تومنان تۇرادى. ءبىرىنشى تومى «ەجەلگى ءداۋىر» اتالسا, «حالىقتىق جانە قولدانبالى ساندىك ونەر», «ءمۇسىن مونۋمەنتالدى ساندىك ونەر», «كەسكىندەمە» جانە «گرافيكا» بولىپ جالعاسادى. اتالعان جيناققا بەلگىلى تاريحشىلار, ونەرتانۋشىلار, ادەبيەتشىلەر مەن سۋرەتشىلەر, مادەنيەت جانە ونەر قايراتكەرلەرى تۋىندىلارىنىڭ باسىن قوسىپ, ىرگەلى ەڭبەكتى بۇگىن حالىققا ۇسىنىپ وتىرمىز», – دەدى استانا قالاسى سۋرەتشىلەر وداعىنىڭ باسقارما توراعاسى, قازاقستاننىڭ ەڭبەك سىڭىرگەن قايراتكەرى قوڭىر مۇحامەديەۆ. سونداي-اق, ول بۇل جيناقتىڭ, اسىرەسە, جوعارى وقۋ ورىندارىندا ءبىلىم الىپ جاتقان ستۋدەنت قاۋىمى مەن ىزدەنۋشىلەرگە تيگىزەر پايداسى مولىنان ەكەنىن دە نازاردان تىس قالدىرمادى. جيناقتاعى ونەرتانۋ ماقالالارى قازاق, ورىس, اعىلشىن تىلدەرىندە وقىرمانعا ۇسىنىلىپ وتىرعانىن دا تىلگە تيەك ەتتى.
تۇساۋكەسەرگە ارنايى كەلگەن بەلگىلى عالىم عاريفوللا ەسىم بۇل كورمەدەن العان اسەرىنىڭ ەرەكشە ەكەنىن اتاپ ايتتى. «مەن سۋرەتشىلەر قاۋىمىن وتە جاقسى كورەمىن. سەبەبى, كەزىندە ون ءبىر جىل كوركەمسۋرەت فاكۋلتەتىندە دەكان بولعانمىن. جالپى, سۋرەتشىلەر بالا مىنەزدى, پاك جاندار. ءبىر سوزبەن ايتقاندا, بالا مىنەزدى ەرەسەك ادامدار. نەگە بالا مىنەزدى بولادى؟ ويتكەنى, بۇلار تابيعاتقا, قوعامعا, ادامعا سول بالالىق تازا كوڭىلمەن قارايدى دا, سول تازا كوڭىلدەرىن وزدەرىنىڭ شىعارمالارىندا بوياۋ تىلىمەن سويلەتەدى. ءبىر مىسال, مارات توقسەيىتوۆتىڭ «الاڭ», «كەشتىڭ ءتۇسۋى» اتتى جۇمىستارى قانداي كەرەمەت! اۋىلدىڭ بەينەسىن ادەمى كورسەتكەن. وسىنداي تالانتتار كوبەيە بەرگەي», – دەيدى فيلوسوف.
ءابدىراحمان قىدىربەك,
«ەگەمەن قازاقستان».
––––––––––––––––––––––
سۋرەتتەردى تۇسىرگەن
ەرلان وماروۆ.
