«سۋدىڭ دا سۇراۋى بار» دەيدى اتام قازاق. وسى سوزدەن كەيىن-اق ونىڭ ماڭىزىنىڭ قانشالىقتى ەكەنىن ايتىپ جاتۋدىڭ ءوزى دە ارتىق پا دەرسىڭ. ال وسى اۋىز سۋ ماسەلەسىنىڭ شەشىمدەرى ەلىمىز ايماقتارىندا بۇگىندە قانشالىقتى جۇزەگە اسىرىلۋدا؟ مىنە, وسى ماقساتپەن «قازاقستان تەمىر جولى» ۇك» اق باسشىلىعى جۇزەگە اسىرىپ جاتقان «ءمولدىر بۇلاق» باعدارلاماسى قانشالىقتى ومىرشەڭ, اۋىزسۋ ساپاسى قانداي دارەجەدە ەكەندىگىن ءبىلۋ تۇرعىسىندا قۇرىلعان ارنايى تەكسەرۋ توبى پاۆلودار ماڭىنداعى ستانسالاردا بولىپ قايتتى. توپ قۇرامىندا دەنساۋلىق ساقتاۋ مينيسترلىگى مەملەكەتتىك سانيتارلىق-ەپيدەميولوگيالىق كوميتەتتىڭ وكىلى رايحان وماروۆا, پاۆلودار تەمىرجول بولىمشەسىنىڭ سانيتارلىق-ەپيدەميولوگيالىق باسقارماسىنىڭ باستىعى قاناتبەك بەيسەباەۆ جانە «تەمىرجولسۋ-ارىس» جشس-ءنىڭ ديرەكتورى اسەمحان ءامىرحانوۆ بار.
«قازاقستان تەمىر جولى» ۇك» اق-تا 2012-2016 جىلدارعا ارنالعان «ءمولدىر بۇلاق» باعدارلاماسى قولعا الىندى. وسى باعدارلاما اياسىندا ۇلتتىق كومپانياعا ەنشىلەس بارلىق ستانسالار مەن رازەزدەردى قاجەتتى مولشەردە ساپالى سۋمەن قامتاماسىز ەتۋ كەرەك بولاتىن. بۇگىنگى تاڭدا «ءمولدىر بۇلاق» باعدارلاماسى بويىنشا 2012-2013 جىلعا جوسپارلانعان ينۆەستيتسيالىق جوبالار ءجۇز پايىزعا ورىندالعان. وسى اۋقىمدى جوبانى اتقارۋدى ءوز مويىندارىنا العان «تەمىرجولسۋ» اق ەكى جىل كولەمىندە 238 تەمىرجول ستانسالارى مەن رازەزدەردەگى 314 نىساندى ساپالى سۋمەن قامتاماسىز ەتىپ قانا قويماي, كارىز جۇيەلەرىن قايتا جاڭارتىپ, تولىق كۇردەلى جوندەۋ جۇمىستارىن جۇرگىزگەن.
– «ءمولدىر بۇلاق» باعدارلاماسى بويىنشا ءبىزدىڭ وبلىستا اتقارىلىپ جاتقان جۇمىستاردى كوزىمىزبەن كوردىك. بايقاساق, باعدارلاما اياسىندا بىرقاتار شارالار جاسالعان. اسىرەسە, ماعان تازا سۋدىڭ تالاپقا ساي ساپالى بولعانى باستى نازار اۋدارتتى. ءبىز جىلىنا ءبىر رەت جوسپار بويىنشا بارلىق ستانساداعى سۋدىڭ ساپاسىن تەكسەرىپ, قاداعالاۋ جۇمىستارىن جۇرگىزەمىز. ەگەر, اۋىزسۋ سانيتارلىق تالاپقا ساي بولماسا ءبىر ادام ەمەس, بارلىق اۋىل تۇرعىندارى اۋىرىپ قالۋى مۇمكىن. سوندىقتان اۋىزسۋدىڭ ساپاسىنا قويار تالاپ وتە جوعارى بولماق, – دەيدى پاۆلودار تەمىرجول بولىمشەسى سانيتارلىق-ەپيدەميولوگيالىق باسقارماسىنىڭ باستىعى قاناتبەك بەيسەباەۆ.
شاھاردىڭ ىرگەسىندە سىلدىراي اققان ەرتىس وزەنىندە وڭتۇستىك جانە سولتۇستىك سۋ قويماسى ورنالاسقان. وڭتۇستىك سۋ قويماسى قالا تۇرعىندارىن تازا سۋمەن قامتاماسىز ەتسە, سولتۇستىك سۋ قويماسىندا وندىرىسكە جۇمسالعان قالدىق سۋلار ساقتالعان. وسى قالدىق سۋ ارنايى اپپاراتتارمەن تازارتىلىپ سۋ سورعىش ستانساسىنداعى ۇلكەن ىدىستارعا قۇيىلادى. ول ىدىستاردا ارنايى سۇزگىش ورناتىلعان. سول سۇزگىشتەن وتكەن سۋ سانيتارلىق تالاپقا ساي جاسالىپ, سۋ ايداعىش مۇناراعا بارادى. بۇل سۋدىڭ ساپالىلىعى ءار ساعات سايىن تەكسەرىلىپ وتىرادى. سۋداعى كەزدەسەتىن ءتۇرلى باكتەريالاردى ولتىرەتىن ارنايى قۇرىلعىلار مۇلتىكسىز جۇمىس ىستەيدى.
«تەمىرجولسۋ» اق پرەزيدەنتى قۋات ەسىمحانوۆ «تەمىرجولسۋ-پاۆلودار» جشس-ءنىڭ ۇجىمىمەن كەڭەيتىلگەن جيىن وتكىزىپ, وندا وتكەن جىلى جاسالعان جۇمىستارعا باعا بەرىپ, الداعى تاڭدا اتقارىلاتىن شارالارعا توقتالدى.
«ءبىزدىڭ بۇگىنگى رەيدكە شىققانداعى ماقساتىمىز «ءمولدىر بۇلاق» باعدارلاماسىنىڭ ەكى جىل كولەمىندەگى اتقارىلعان جۇمىستارىنا ساراپتاما جاساپ, كوزبەن كورۋ بولاتىن. العاشقى تەكسەرۋ شاراسى الماتى وبلىسىندا باستالىپ, ەندى مىنە, كەرەكۋدە جالعاسىن تاپتى. پاۆلودار وبلىسىندا باعدارلاما اياسىندا كوپ جۇمىستار اتقارىلدى. «ءمولدىر بۇلاق» باعدارلاماسى بويىنشا 2012-2013 جىلدارعا ارنالعان 2 ملرد. 745 مىڭ تەڭگە قارجى تولىق يگەرىلدى. ال, «تەمىرجولسۋ-پاۆلودار» جشس وسى جىلدارى جۇرگىزگەن كۇردەلى جوندەۋ جۇمىستارىنا 270 ملن. تەڭگە قارجى يگەرگەن. دەگەنمەن, الدا اتقارىلار جۇمىس وتە كوپ. بيىل ەلىمىز بويىنشا 56 ستانسا مەن بەكەتتەرگە كۇردەلى جوندەۋ جۇمىستارىن جۇرگىزەمىز. 2015 جىلى كتج-نىڭ بالانسىنداعى بارلىق 544 ستانسا مەن رازەزدەرگە اۋىزسۋ جەتكىزۋدى اياقتاۋدى مەجەلەپ وتىرمىز», دەيدى قۋات ەسىمحان ۇلى.
ءابدىراحمان قىدىربەك,
«ەگەمەن قازاقستان».
